ຜົມຂອງຄົນເຮົາເປັນເໝືອນເຄື່ອງປະດັບຊິ້ນສຳຄັນທີ່ຊ່ວຍເພີ່ມຄວາມໝັ້ນໃຈ ເປັນເໝືອນທຸກຢ່າງຂອງໃບໜ້າ. ມື້ໃດຜົມດີໜ້າກໍ່ງາມ, ມື້ໃດຜົມບໍ່ດີກໍ່ເໝືອນໜ້າເສຍໄປໝົດທັງໜ້າ. ດັ່ງນັ້ນການດູແລຜົມຈຶ່ງເປັນສິ່ງສຳຄັນທີ່ຊ່ວຍເສີມຄວາມງາມ ແລະ ຄວາມໝັ້ນໃຈຂອງພວກເຮົາຫຼາຍຂຶ້ນ. ມື້ນີ້ພວກເຮົາຈຶ່ງໄດ້ລວບລວມຂໍ້ມູນ, ວິທີດູແລຜົມດ້ວຍວິທີທຳມະຊາດທີ່ສາມາດເຮັດໄດ້ທຸກມື້ກ່ອນນອນ. ສູດໃດຊ່ວຍແກ້ບັນຫາໃດມາຕາມເບິ່ງໄດ້ເລີຍໃນ 5 ວິທີບຳລຸງຜົມໃຫ້ສວຍດ້ວຍສູດທຳມະຊາດ.

1. ບຳລຸງຜົມດ້ວຍນ້ຳມັນໝາກພ້າວ: ນ້ຳມັນໝາກພ້າວເປັນນ້ຳມັນຈາກທຳມະຊາດທີ່ຊ່ວຍເພີ່ມຄວາມຊຸ່ມຊື່ນ ພ້ອມມີສານຈາກທຳມະຊາດທີ່ຊ່ວຍບຳລຸງຜົມ. ສັນພະຄຸນຊ່ວຍປັບສະພາບຜົມ, ປັບສະພາບໜັງຫົວ ແລະ ຊ່ວຍໃຫ້ຜົມມີສຸຂະພາບດີ. ສຳລັບການບຳລຸງຜົມສູດນີ້ເໝາະສຳລັບຜູ້ທີ່ມີເວລາຈຳກັດ ເພາະໃຊ້ເວລາບໍ່ດົນ ແລະ ສາມາດເຮັດໄດ້ທຸກມື້ອີກດ້ວຍ. ວິທີເຮັດ: ໃຊ້ນ້ຳມັນໝາກພ້າວທາໃຫ້ທົ່ວຫົວແລ້ວປະໄວ້ປະມານ 10 ນາທີກ່ອນສະຜົມ ແລະ ເຮັດແບບນີ້ມື້ລະ 2 ຄັ້ງທັງເຊົ້າແລະແລງ ແລະ ຄວນເຮັດຕໍ່ເນື່ອງເພື່ອໃຫ້ເຫັນຜົນທີ່ຊັດເຈນ.
2. ບຳລຸງຜົມດ້ວຍເບຍ: ການບຳລຸງຜົມດ້ວຍເບຍ, ເບຍເຄື່ອງດື່ມຍາມສັງສັນນີ້ລະ, ຖ້າຫາກດື່ມບໍ່ໝົດ, ເບຍກໍ່ຍັງສາມາດນຳມາບຳລຸງຜົມໄດ້ອີກດ້ວຍ ເພາະເບຍມີໂປຣຕີນທີ່ຊ່ວຍສ້ອມແຊມຜິວນອກຂອງຜົມ ເຮັດໃຫ້ຜົມນຸ້ມສະຫຼວຍເປັນເງົາງາມ. ວິທີເຮັດ: ເຮັດໃຫ້ຜົມປຽກນ້ອຍໜຶ່ງ ຈາກນັ້ນນຳເບຍມາທາທົ່ວຫົວ, ຫຼັງຈາກນັ້ນນຳຜ້າຂົນໜູມາພັນຫົວໄວ້, ລໍຖ້າປະມານ 30-40 ນາທີ ຈາກນັ້ນລ້າງອອກດ້ວຍນ້ຳສະອາດ. ພຽງເທົ່ານີ້ກໍ່ຈະໄດ້ຜົມນຸ້ມສະຫຼວຍທີ່ບຳລຸງດ້ວຍເບຍແລ້ວເດີ.
3. ບຳລຸງຜົມດ້ວຍນ້ຳເຜິ້ງ: ການບຳລຸງຜົມດ້ວຍນ້ຳເຜິ້ງ, ນ້ຳເຜິ້ງນອກຈາກຈະມີປະໂຫຍດໃນການຮັບປະທານຫຼືໃຊ້ໃນການບຳລຸງຜິວແລ້ວ, ນ້ຳເຜິ້ງຍັງມີສານຕ້ານອະນຸມູນອິດສະຫຼະ ຊຶ່ງເປັນສານອາຫານທີ່ຈຳເປັນຕໍ່ຜົມແລະໜັງຫົວ ຊ່ວຍກະຕຸ້ນໃຫ້ຜົມຍາວໄວຂຶ້ນ, ບຳລຸງໜັງຫົວ ແລະ ຫຼຸດຜ່ອນການເກີດຂີ້ຫົວອີກດ້ວຍ. ແຕ່ສູດນີ້ຕ້ອງມີຕົວຊ່ວຍນ້ອຍໜຶ່ງນະ ຄື “ໂຢເກິດ” ນັ້ນເອງ. ວິທີເຮັດ: ນຳໂຢເກິດທຳມະຊາດມາປະສົມກັບນ້ຳເຜິ້ງ 4 ບ່ວງໂຕະ ແລ້ວຄົນໃຫ້ເຂົ້າກັນ ຈາກນັ້ນນຳມາບຳລຸງຜົມໃຫ້ທົ່ວແລ້ວ ພັນເອົາໄວ້ດ້ວຍຜ້າຂົນໜູຫຼືໝວກອາບນ້ຳ ຈາກນັ້ນລ້າງອອກດ້ວຍນ້ຳເຢັນສະຜົມດ້ວຍແຊມພູຕາມປົກກະຕິ.
4. ບຳລຸງຜົມດ້ວຍໄຂ່ໄກ່: ການບຳລຸງຜົມດ້ວຍໄຂ່ໄກ່, ໄຂ່ໄກ່ວັດຖຸດິບທີ່ສາມາດເຮັດອາຫານໄດ້ຫຼາກຫຼາຍປະໂຫຍດ ຍັງສາມາດນຳມາບຳລຸງຜົມໄດ້ອີກດ້ວຍ ເພາະໄຂ່ຂາວມີສານອາຫານຫຼາຍຫຼາຍ ລວມທັງໄບໂອຕິນ, ເລຊີຕິນ, ກົດໄຂມັນ ແລະ ອື່ນໆ ທີ່ຊ່ວຍບຳລຸງຜົມໃຫ້ໜາແລະແຂງແຮງຂຶ້ນ ຫຼຸດຜ່ອນການຫຼຸດລົ່ນຂອງຜົມໄດ້ຫຼາຍທີເດຍ. ວິທີເຮັດ: ນຳໄຂ່ຂາວແລະໄຂ່ແດງມາຕີປະສົມໃຫ້ເຂົ້າກັນ ຈາກນັ້ນນຳມາທາບຳລຸງຜົມປະມານ 15-20 ນາທີ ແລ້ວລ້າງອອກສະຜົມຕາມປົກກະຕິ. ຄວນເຮັດອາທິດລະ 1-2 ຄັ້ງເປັນປະຈຳ ເພື່ອຮັກສາສຸຂະພາບຂອງຜົມໃຫ້ເບິ່ງດີຢ່າງສະໝ່ຳສະເໝີ.
5. ດູແລຜົມກ່ອນນອນກໍ່ສຳຄັນ: ການດູແລຜົມກ່ອນນອນ ດ້ວຍການດູແລສຸຂະພາບຜົມລວມທັງດູແລຄວາມສະອາດກໍ່ສຳຄັນ ຄືການຫວີຜົມກ່ອນນອນກໍ່ຊ່ວຍໃຫ້ຜົມບໍ່ພັນກັນຫຼຸດລົ່ນ ຫຼືການນວດໜັງຫົວເພີ່ມຄວາມຜ່ອນຄາຍ ຊ່ວຍໃຫ້ເລືອດໝູນວຽນຜົມຍາວໄວຂຶ້ນໄດ້ອີກດ້ວຍ. ແລະ ທີ່ສຳຄັນທີ່ສຸດ ຄື ຫ້າມນອນຂະນະທີ່ຜົມຍັງປຽກຢູ່ເດັດຂາດ ເພາະຜົມທີ່ປຽກຊຸ່ມຈະເຮັດໃຫ້ຂາດຫຼຸດລົ່ນໄດ້ງ່າຍ ລວມທັງຄວາມຊຸ່ມຈະເຮັດໃຫ້ໜັງຫົວເກີດຜື່ນແສບຄັນ ເຮັດໃຫ້ສຸຂະພາບຜົມແລະໜັງຫົວເສຍໄປອີກ. ດັ່ງນັ້ນ, ຈຶ່ງຄວນດູແລຜົມກ່ອນນອນເປັນປະຈຳເພື່ອສຸຂະພາບຜົມທີ່ນຸ້ມສວຍ.

ຈົບກັນໄປແລ້ວກັບ 5 ວິທີດູແລຜົມດ້ວຍສູດທຳມະຊາດ. ນອກຈາກການບຳລຸງຜົມດ້ວຍສູດຕ່າງໆ ແລະ ຄວາມສະອາດແລ້ວນັ້ນ, ການດູແລຮ່າງກາຍກໍ່ເປັນສິ່ງສຳຄັນ. ຢ່າລືມກິນອາຫານໃຫ້ຄົບ 5 ໝູ່, ນອນຫຼັບໃຫ້ພຽງພໍ ເພາະສຸຂະພາບຮ່າງກາຍທີ່ແຂງແຮງ ກໍ່ຈະເຮັດໃຫ້ຜົມສຸຂະພາບດີຕາມໄປດ້ວຍ. ຢ່າລືມໄປເຮັດຕາມກັນເດີ.

ສະແດງຄຳຄິດເຫັນ