ເປັນຫຍັງເວລາເມົາ ຄົນມັກຄິດຮອດແຟນເກົ່າ ເປັນເພາະສະໝອງສັ່ງການ ຫຼື ເປັນເພາະໃຈສັ່ງມາ

ຈຸດຈົບຂອງສາຍເມົາ ຄືຄິດຮອດແຟນເກົ່າແລ້ວຮ້ອງໄຫ້ ເຫດການແບບນີ້ເຄີຍເກີດຂຶ້ນກັບທ່ານບໍ່? ເມື່ອນ້ຳເມົາເມຣັຍເຂົ້າປາກ ເໝືອນຈຸດປະກາຍຄວາມຄິດຮອດ… ຄິດຮອດວັນເກົ່າ ໆ ທີ່ມີລາວຢູ່ຂ້າງກາຍ ຄິດຮອດຊ່ວງເວລາທີ່ຢູ່ນຳກັນ ເມື່ອນຶກຍ້ອນກັບໄປ ຢູ່ ໆ ນ້ຳຕາກໍໄຫຼຊະນີ່ ເພາະວັນຄືນອັນແສນຫວານຂອງຄວາມສຳພັນສິ້ນສຸດລົງ ເລື່ອງລາວຂອງເຂົາກາຍເປັນພຽງເລື່ອງເລົ່າ ທີ່ເຮັດໃຫ້ພວກເຮົາແຄ່ຄິດຮອດ

ແຕ່ເຖິງຢ່າງໃດພວກເຮົາກໍຕ້ອງກັ້ນນ້ຳຕາໄວ້ບໍ່ໃຫ້ຮ້ອງອອກມາ ໄດ້ແຕ່ບອກກັບຕົວເອງວ່າ ຢົດນ້ຳຕາຊ້າລົງໜ້ອຍໄດ້ບໍ່ ຢາກຈະຮ້ອງຄ່ອຍຮ້ອງໃຫ້ໝົດໃຈ….ໃນຕອນທີ່ຢູ່ຄົນດຽວ ແລະໃນຕອນນີ້ມວນມະຫາຄວາມເສົ້າກໍແຜ່ປົກຄຸມຢ່າງທີ່ບໍ່ເຄີຍເປັນມາກ່ອນ ດ້ວຍສາເຫດນີ້ ຫຼາຍຄົນຈຶ່ງຕັ້ງຄຳຖາມວ່າ ‘ເປັນຫຍັງເວລາເມົາ ຄົນມັກຄິດຮອດແຟນເກົ່າ’

ອາດເປັນເພາະລິດຂອງແອລກໍຮໍ ທີ່ສົ່ງຜົນຕໍ່….ຄວາມຄິດຮອດ

ຄວາມຈິງຂອງອາການທີ່ບອກວ່າພໍເມົາແລ້ວມັກຄິດຮອດແຟນເກົ່າ ທີ່ຈິງແລ້ວ ມັນເກີດຈາກລິດຂອງແອລກໍຮໍທີ່ສົ່ງຜົນຕໍ່ສະໝອງແລະຫົວໃຈຂອງພວກເຮົາໂດຍກົງ ອັນດັບແລກຕ້ອງເຂົ້າໃຈກ່ອນວ່າ ແອລກໍຮໍເປັນສານກົດປະສາດທີ່ສາມາດເຂົ້າໄປທຳລາຍສົມດຸນຂອງສານເຄມີໃນສະໝອງໄດ້ ຊຶ່ງສົ່ງຜົນໃຫ້ສະໝອງຂອງພວກເຮົາເຮັດວຽກຊ້າລົງ ການຍັບຍັ້ງຊັ່ງໃຈແລະຄິດໄຕ່ຕອງແຍ່ລົງ ມີອາການທີ່ຜິດແປກໄປຈາກປົກກະຕິ ເມື່ອທຽບກັບເວລາທີ່ຍັງບໍ່ມີແອລກໍຮໍເຂົ້າສູ່ຮ່າງກາຍ

ການເຮັດວຽກຂອງສະໝອງເມື່ອດື່ມແອລກໍຮໍ ສະໝອງຈະກະຕຸ້ນ Limbic system ໃຫ້ຫຼັ່ງສານ dopamine ອອກມາ ຊຶ່ງສານນີ້ ເປັນສານທີ່ກ່ຽວຂ້ອງກັບຄວາມສຸກ ສົ່ງຜົນໃຫ້ອາການຂະນະທີ່ດື່ມ ຮູ້ສຶກເພີດເພີນເໝືອນຢູ່ໃນຫ້ວງຂອງຄວາມຄິດແລະຄວາມຮູ້ສຶກທີ່ພັ່ງພູຄວາມສຸກອອກມາ ລວມເຖິງອາການເມົາແລ້ວຫວນຄິດຮອດຄວາມຫລັງ ເພາະແອລກໍຮໍຈະໄປກົດການເຮັດວຽກສະໝອງສ່ວນ Hippocampus ສະໝອງສ່ວນທີ່ເກັບສະສົມຄວາມຊົງຈຳໄລຍະຍາວ (ທີ່ມີລາວ) ເຮັດໃຫ້ຄວາມຊົງຈຳສ່ວນນັ້ນເສຍຫາຍຊົ່ວຂະນະ ຈຶ່ງບໍ່ແປກທີ່ຈະພົບວ່າຄົນເມົາມັກຈະຊອບຮ້ອງໄຫ້ ເພາະຫວນຄິດຮອດຄວາມຫລັງ

ຫຼືເປັນເພາະແອລກໍຮໍອະນຸຍາດໃຫ້ພວກເຮົາ….ຄິດຮອດເຂົາ(ຄົນໃນຄວາມຊົງຈຳ)ໄດ້

ອີກໜຶ່ງການເຮັດວຽກຂອງແອລກໍຮໍທີ່ໜ້າຈະເປັນຄຳຕອບຂອງຄຳຖາມທີ່ວ່າ ‘ເປັນຫຍັງເວລາເມົາ ຄົນມັກຄິດຮອດແຟນເກົ່າ’ ອາດຈະເປັນເພາະວ່າ ລິດຂອງແອລກໍຮໍສາມາດປົດລັອກຕົວເຮົາໃຫ້ກ້າເປີດເຜີຍພຶດຕິກຳແລະຄວາມຮູ້ສຶກທີ່ຖືກຊ່ອນຢູ່ພາຍໃນໃຈ ຕົວຢ່າງເຊັ່ນ ໝູ່ສະໜິດຂອງພວກເຮົາໄດ້ເລົ່າເລື່ອງລາວຄວາມຮັກທີ່ມີການເລີກລາໃຫ້ພວກເຮົາຟັງ ພ່ຳເພ້ອຄິດຮອດແຟນເກົ່າ ຕະຫຼອດເວລາເພາະທີ່ຜ່ານມາຍັງບໍ່ເຄີຍລືມເຂົາຄົນນັ້ນໄດ້ເລີຍ ແຕ່ກັບບໍ່ກ້າບອກອີກຝ່າຍ ແຕ່ເມື່ອແອລກໍຮໍເລີ່ມອອກລິດໝູ່ຄົນນີ້ກັບໂທລະສັບໄປບອກຄວາມຮູ້ສຶກຂອງຕົນໃຫ້ອີກຝ່າຍຮູ້ເອງເສຍຢ່າງນັ້ນ

ເຫດການນີ້ຈຶ່ງເປັນຂໍ້ສັນນິຖານໃຫ້ເຫັນວ່າລິດຂອງແອລກໍຮໍສາມາດສະຫຼັດຄວາມຢ້ານ ແລະ ເປັນເຄື່ອງມືໃນການປຸກຄວາມກ້າຫານທີ່ຫລັບຢູ່ໃຫ້ຕື່ນຂຶ້ນ ຈຶ່ງເປັນຄຳຕອບຂອງອາການທີ່ບອກວ່າພໍເມົາແລ້ວມັກຄິດຮອດແຟນເກົ່າ ເປັນເພາະວ່າ ແອລກໍຮໍສົ່ງຜົນຕໍ່ສະໝອງແລະຫົວໃຈຂອງພວກເຮົາໂດຍກົງ ຊ່ວຍໃຫ້ເຮັດຢ່າງທີ່ໃຈຕ້ອງການໄດ້ໂດຍງ່າຍທີ່ສຸດ ຄືການທີ່ອະນຸຍາດໃຫ້ຕົວພວກເຮົາເອງຄິດຮອດແຟນເກົ່າໄດ້

ແຕ່ເຖິງຢ່າງໃດ ການດື່ມບໍ່ໄດ້ເຮັດໃຫ້ລືມໃຜ ແຄ່ເຮັດໃຫ້ລາວຫາຍຈາກໃຈໄປພຽງຊົ່ວຄາວ

ສະແດງຄຳຄິດເຫັນ