ວັນທີ 22 ເມສາ 2025 ແພດຍິງ ສຸຈິຕຣາ ເອກຕາແສງ ແພດຈາກໂຮງໝໍສິລິລາດປິຍະມະຫາຣາດການຸນ ປະເທດໄທ ໄດ້ໂພສຂໍ້ຄວາມຜ່ານເຟສບຸກສ່ວນຕົວ ຫຼັງຈາກພົບຄົນເຈັບເດັກຍິງອາຍຸ 14 ປີ ເຂົ້າຮັບການປິ່ນປົວດ້ວຍອາການຫອບເມື່ອຍ ຫາຍໃຈລຳບາກຢ່າງຮຸນແຮງ.

 

ການກວດພົບວ່າເປັນພາວະ EVALI (E-cigarette or Vaping product use-Associated Lung Injury) ຫຼື ພະຍາດປອດອັກເສບຈາກຢາສູບໄຟຟ້າ ເຊິ່ງຖືເປັນເຄສທຳອິດໃນພື້ນທີ່.

 

ເດັກຍິງລາຍນີ້ເລີ່ມໃຊ້ຢາສູບໄຟຟ້າຕັ້ງແຕ່ອາຍຸ 13 ປີ ໂດຍໃຊ້ແບບ “ຫ້ອຍຄໍ” ເຮັດໃຫ້ສາມາດຈັບສູບໄດ້ທຸກເມື່ອທີ່ຕ້ອງການ.

 

ລາວໃຊ້ສະເລ່ຍເດືອນລະໜຶ່ງອັນ ຫຼື ປະມານ 9,000 ສູບຕໍ່ເດືອນ.

 

ເຖິງແມ່ນວ່າລາວຈະຢຸດໃຊ້ມາແລ້ວກວ່າ 2 ເດືອນ ເພາະຮ້ານປະຈຳຢຸດຂາຍ ແຕ່ອາການຂອງລາວກໍ່ຍັງບໍ່ດີຂຶ້ນ ແລະ ຕ້ອງເຂົ້າຮັບການປິ່ນປົວຢ່າງຮີບດ່ວນ.

 

EVALI ປອດບອກວ່າບໍ່ໄຫວ

 

EVALI ຄືພາວະປອດອັກເສບຮຸນແຮງທີ່ເກີດຈາກການສູດສານເຄມີໃນຢາສູບໄຟຟ້າ ໂດຍອາການຂອງພະຍາດມັກຄ້າຍກັບການຕິດເຊື້ອໃນລະບົບຫາຍໃຈ ເຊັ່ນ: ໄຂ້, ໜາວສັ່ນ, ໄອ, ເມື່ອຍ ແລະ ປວດເມື່ອຍ.

 

ນອກຈາກນີ້ ຍັງພົບວ່າຄົນເຈັບສ່ວນໃຫຍ່ເຖິງ 77% ມີອາການຄື້ນເມົາ, ຮາກ ແລະ ຖອກທ້ອງຮ່ວມນຳ.

 

ຮູບພາບເອັກຊເຣ ແລະ CT Scan ມັກສະແດງໃຫ້ເຫັນວ່າປອດຂອງຜູ້ປ່ວຍມີລັກສະນະເປັນຝ້າຂາວ ເຊິ່ງສະທ້ອນເຖິງການອັກເສບຢ່າງຮຸນແຮງ. ຖ້າບໍ່ໄດ້ຮັບການປິ່ນປົວທັນເວລາ, ອາດນຳໄປສູ່ພາວະຫາຍໃຈລົ້ມເຫຼວຫຼືເສຍຊີວິດໄດ້.

 

 

ໂຮງໝໍສິລິລາດເຕືອນຊັດເຈນ ຢາສູບໄຟຟ້າບໍ່ປອດໄພຢ່າງທີ່ຄິດ

 

ຂໍ້ມູນຈາກໂຮງໝໍສິລິລາດປິຍະມະຫາຣາດການຸນ ລະບຸວ່າ ຄວາມເຂົ້າໃຈຜິດວ່າ “ຢາສູບໄຟຟ້າປອດໄພກວ່າຢາສູບແບບມ້ວນ” ຄືຄວາມສ່ຽງທີ່ໃຫຍ່ຫຼວງ ໂດຍສະເພາະໃນກຸ່ມຊາວໜຸ່ມທີ່ມອງວ່າຜະລິດຕະພັນນີ້ວ່າເປັນ “ແຟຊັ່ນ” ຫຼາຍກວ່າ “ໄພສຸຂະພາບ”.

 

ເຖິງແມ່ນວ່າຢາສູບໄຟຟ້າຈະບໍ່ກໍ່ໃຫ້ເກີດນ້ຳມັນດິນ ແລະ ຄາບອນມອນນ໊ອກໄຊຈາກການເຜົາໄໝ້ຄືກັບຢາສູບທຳມະດາ, ແຕ່ກໍ່ຍັງມີສານພິດຫຼາກຫຼາຍຊະນິດ ເຊັ່ນ: ນິໂຄຕິນ, ໂລຫະໜັກ, PM 2.5, ສານກໍ່ມະເຮັງ ແລະ ສານເຄມີລະຄາຍເຄືອງຕໍ່ປອດທີ່ສາມາດກະຕຸ້ນໃຫ້ເກີດ EVALI ໄດ້ໂດຍກົງ.

 

ໂຮງໝໍສິລິລາດຍັງລະບຸ 5 ຄວາມເຊື່ອຜິດທີ່ພົບເລື້ອຍໆ ເຊັ່ນ: ຢາສູບໄຟຟ້າຊ່ວຍເຮັດໃຫ້ເຊົາສູບຢາ, ບໍ່ມີສານກໍ່ມະເຮັງ, ບໍ່ຕິດ ແລະ ເປັນພຽງແຕ່ໄອນ້ຳປອດໄພ.

 

ທັງໝົດນີ້ລ້ວນຂັດແຍ້ງກັບຂໍ້ເທັດຈິງທາງວິທະຍາສາດແລະການແພດ.

ສະແດງຄຳຄິດເຫັນ