ເບິ່ງເລົາເຕີ Wi-Fi ຄືເກົ່າບໍ່ໄດ້ອີກຕໍ່ໄປ, ລ່າສຸດນັກວິໄຈຈາກມະຫາວິທະຍາໄລໃນສະຫະລັດອາເມລິກາ ພັດທະນາເຕັກໂນໂລຢີກວດຈັບຄົນແບບ 3 ມິຕິໃໝ່ລ່າສຸດ ໂດຍໃຊ້ພຽງແຕ່ສັນຍານ Wi-Fi ທີ່ມີຢູ່ທຸກຄົວເຮືອນ, ເຮັດວຽກໃນບ່ອນມືດໄດ້ສະບາຍໆ.

ສຳລັບງານວິໄຈໃໝ່ນີ້ມີຊື່ວ່າ ‘DensePose from WiFi’ ພັດທະນາຂຶ້ນໂດຍທີມວິໄຈຈາກມະຫາວິທະຍາໄລ Carnegie Mellon University (CMU) ໃນສະຫະລັດຯ.

ໂດຍເຕັກໂນໂລຢີນີ້ຈະສາມາດກວດຈັບຄົນທັງຮູບຮ່າງ ແລະ ທ່າທາງຂອງມະນຸດແບບ 3 ມິຕິໄດ້, ບໍ່ຈຳເປັນຕ້ອງໃຊ້ກ້ອງ ຫຼື ອຸປະກອນພິເສດໃດໆ ໃນການກວດຈັບ ແຕ່ໃຊ້ສັນຍານ Wi-Fi ທີ່ໄດ້ມາຈາກເລົາເຕີທີ່ມີຕິດຕັ້ງຢູ່ທົ່ວໄປ.

ຂໍ້ດີຂອງການໃຊ້ສັນຍານ Wi-Fi ຄືສາມາດເຮັດວຽກໃນບ່ອນມືດໄດ້ ແລະ ຍັງສາມາດກວດຈັບມະນຸດທະລຸກຳແພງໄດ້ອີກດ້ວຍ.

ການມາຂອງງານວິໄຈນີ້ກໍ່ອາດນຳໄປສ້າງນະວັດຕະກຳໃໝ່ໆ ເຊັ່ນ:

• ການດູແລສຸຂະພາບ: ກວດຈັບການຫາຍໃຈ, ການລົ້ມ ຫຼື ທ່າທາງການຍ່າງຜິດປົກກະຕິຂອງຜູ້ສູງອາຍຸທີ່ຮັກສາຕົວ ແຕ່ຕ້ອງການຄວາມເປັນສ່ວນຕົວ
• ຮັກສາຄວາມປອດໄພ: ກວດຈັບຜູ້ບຸກລຸກທີ່ອາດລັກລອບເຂົ້າມາໃນຕົວເຮືອນ ໃນເວລາກາງຄືນ ຫຼື ເປັນສະຖານທີ່ມືດໆ
• ສະມາດໂຮມຍຸກໃໝ່: ກວດຈັບການເຄື່ອນໄຫວຂອງຄົນໃນເຮືອນ ແລະ ເຮັດວຽກຮ່ວມກັບເຊັນເຊີ ເພື່ອເປີດ ຫຼື ປິດເຄື່ອງໃຊ້ໄຟຟ້າ

ຫຼັກການເຮັດວຽກຂອງ ‘DensePose from WiFi’ ຄືໃຊ້ສັນຍານຈາກຄື້ນສະທ້ອນກັບຮ່າງກາຍຂອງມະນຸດ ກໍ່ໃຫ້ເກີດຮູບແບບຂອງຄື້ນທີ່ຈະຖືກປ່ຽນໄປຕາມການເຄື່ອນໄຫວ ແລະ ເຮັດວຽກຮ່ວມກັບໂມເດລ AI ‘DensePose’ ທີ່ຖືກພັດທະນາຂຶ້ນໂດຍ Meta.

ຜົນລັບທີ່ໄດ້ຄືໂມເດລ 3 ມິຕິຮ່າງກາຍມະນຸດທີ່ເຄື່ອນໄຫວຢ່າງແມ່ນຢຳ.

ຈາກງານວິໄຈໃໝ່ນີ້, ເຕັກໂນໂລຢີການກວດຈັບຄົນດ້ວຍສັນຍານ Wi-Fi ນັ້ນກໍ່ບໍ່ແມ່ນຂອງແປກໃໝ່, ແຕ່ເລົາເຕີແບຣນ Linksys ກໍ່ເຄີຍເປີດຕົວບໍລິການ Linksys Aware ທີ່ແຈ້ງເຕືອນວ່າ ມີການເຄື່ອນໄຫວພາຍໃນເຮືອນເທົ່ານັ້ນ, ແຕ່ບໍ່ໄດ້ສະແດງອອກມາເປັນພາບ 3 ມິຕິ.

ສະແດງຄຳຄິດເຫັນ