ຄວາມຄືບໜ້າສະຖານະການລະເບີດ ແລະ ໄຟໄໝ້ຂະໜາດໃຫຍ່ ທີ່ທ່າເຮືອຊາຮິດ ຣາຈາອີ ທ່າເຮືອການຄ້າຂະໜາດໃຫຍ່ທີ່ສຸດຂອງອີຣ່ານ ຕັ້ງຢູ່ໃນເມືອງບັນດາອັບບາສ ເມືອງແຖບຊາຍຝັ່ງທາງໃຕ້ ແລະ ໃກ້ຊ່ອງແຄບຍຸດທະສາດຮໍມຸຊ.

 

ສື່ລັດຖະບານອີຣ່ານລາຍງານວ່າ ເຈົ້າໜ້າທີ່ໜ່ວຍກາຊາດ, ສະມາຄົມຂີ້ນວົງເດືອນແດງຂອງອີຣ່ານ ຊ່ວຍກັນໂຮຍສານເຄມີຫນ່ວງໄຟ ຜ່ານທາງອາກາດຍານເພື່ອພະຍາຍາມສະກັດແນວໄຟທີ່ຍັງລຸກໄໝ້ ແລະ ສົ່ງກຸ່ມຄວັນດຳລອຍຂຶ້ນຝັ່ງຢ່າງຕໍ່ເນື່ອງ.

 

ບໍລິເວນທີ່ເກີດເຫດເຕັມໄປດ້ວຍເສດຊາກຄວາມເສຍຫາຍ. ສ່ວນຍອດຜູ້ເສຍຊີວິດເພີ່ມຂຶ້ນເປັນຢ່າງໜ້ອຍ 40 ຄົນ, ຜູ້ບາດເຈັບເພີ່ມຂຶ້ນເປັນຫຼາຍກວ່າ 1,200 ຄົນ.

 

ຜູ້ອຳນວຍການໜ່ວຍກາຊາດຂອງອີຣ່ານ ເປີດເຜີຍວ່າ ທີມດັບເພີງສາມາດຄວບຄຸມເພີງໄດ້ແລ້ວ 90% ກິດຈະກຳຕ່າງໆ ຂອງທ່າເຮືອໄດ້ເລີ່ມດຳເນີນການໄດ້ແລ້ວໃນບາງສ່ວນທີ່ບໍ່ໄດ້ຮັບຜົນກະທົບຈາກເຫດລະເບີດແລະໄຟໄໝ້.

 

ທັງນີ້, ຍັງມີຜົນກະທົບທີ່ເກີດຈາກກຸ່ມຄວັນພິດ ເຈົ້າໜ້າທີ່ອີຣ່ານຈຶ່ງແຈ້ງເຕືອນປະຊາຊົນທີ່ຢູ່ໃກ້ທ່າເຮືອ ໃຫ້ຢູ່ແຕ່ໃນເຮືອນຈົນກວ່າຈະມີປະກາດປ່ຽນແປງ ແລະ ໃຫ້ສວມຊຸດປ້ອງກັນທີ່ຮັດກຸມຫຼາຍຂຶ້ນ.

 

ສ່ວນທີ່ເມືອງບັນດາອັບບາສ ພື້ນທີ່ເກີດເຫດ ເຈົ້າໜ້າທີ່ສັ່ງປິດໂຮງຮຽນ ແລະ ສຳນັກງານໃນວັນອາທິດທີ່ຜ່ານມາ ເພື່ອເປີດທາງໃຫ້ເຈົ້າໜ້າທີ່ໄດ້ທຸ່ມກຳລັງໃຫ້ກັບພາລະກິດສຸກເສີນຢ່າງເຕັມທີ່.

 

ທາງການອີຣ່ານ ປະກາດໄວ້ອາໄລທົ່ວປະເທດເປັນເວລາ 1 ວັນ ຄືວັນນີ້ (28 ເມສາ) ຕາມວັນເວລາທ້ອງຖິ່ນ ແຕ່ໃນສ່ວນຂອງແຂວງຮໍມອຊກັນ ທີ່ມີບັນດາອັບບາສ ເປັນເມືອງເອກ ທາງການປະກາດໄວ້ອາໄລເປັນເວລາ 2 ມື້.

 

ດ້ານກະຊວງປ້ອງກັນປະເທດຂອງອີຣ່ານ ຖະແຫຼງປະຕິເສດລາຍງານຂ່າວຂອງສື່ລະຫວ່າງປະເທດທີ່ລະບຸວ່າ ເຫດລະເບີດອາດເຊື່ອມໂຍງກັບການຈັດການທີ່ຜິດພາດໃນສ່ວນຂອງເຊື້ອເພີງແຂງທີ່ໃຊ້ສຳລັບຂີປະນາວຸດ.

 

ສ່ວນສາເຫດທີ່ແນ່ຊັດຍັງຕ້ອງລໍຖ້າຜົນການສອບສວນຕໍ່ໄປ ແຕ່ເບື້ອງຕົ້ນມີການສົງໄສວ່າສານເຄມີນ່າຈະເປັນເຊື້ອເພີງທີ່ເຮັດໃຫ້ເກີດການລະເບີດຂຶ້ນ ທ່າມກາງການກ່າວໂທດເຈົ້າໜ້າທີ່ເຮັດວຽກບໍ່ມີປະສິດທິພາບ ປ່ອຍໃຫ້ເກັບວັດຖຸໄວໄຟໄວ້ທີ່ທ່າເຮືອ ໂດຍບໍ່ມີມາດຕະການບໍລິຫານຈັດການທີ່ດີພໍ.

ສະແດງຄຳຄິດເຫັນ