ກະຊວງສາທາລະນະສຸກ ກັບ ອົງການຊ່ວຍເຫຼືອເດັກສາກົນ ປະຈໍາ ສປປ ລາວ ແລະ ອົງການອະນາໄມໂລກ ຮ່ວມມືຈັດຕັ້ງໂຄງການການສ້າງຄວາມເຂັ້ມແຂງໃຫ້ລະບົບສາທາລະນະສຸກ ໃນ ສປປ ລາວ ໃຫ້ທົນທານຕໍ່ກັບສະພາບການປ່ຽນແປງດິນຟ້າອາກາດ, ຊຶ່ງເປັນໂຄງການຄັ້ງທຳອິດ ຂອງ ສປປ ລາວ ໂດຍໄດ້ຮັບທຶນສະໜັບສະໜູນຈາກກອງທຶນສີຂຽວທາງດ້ານການປ່ຽນແປງດິນຟ້າອາກາດ, ໄລຍະໃນການຈັດຕັ້ງປະຕິບັດໂຄງການແມ່ນ 5 ປີ ໂດຍມີເປົ້າໝາຍເພື່ອໃຫ້ຜົນປະໂຫຍດແກ່ປະຊາກອນ.

ພິທີເຊັນບົດບັນທຶກຄວາມເຂົ້າໃຈ ກ່ຽວກັບ ການຈັດຕັ້ງໂຄງການ ດັ່ງກ່າວ ໄດ້ຈັດຂຶ້ນໃນວັນທີ 29 ເມສາ 2025 ຜ່ານມານີ້  ທີ່ນະຄອນຫຼວງວຽງຈັນ ຊຶ່ງໄດ້ລົງນາມໂດຍ ທ່ານ ນາງ ພອນປະເສີດ ໄຊຍະມຸງຄຸນ ຫົວໜ້າກົມອະນາໄມ ແລະ ສົ່ງເສີມສຸຂະພາບ ແລະ ທ່ານ ລຸກ ເອັບສ໌ ຫົວໜ້າອົງການຊ່ວຍເຫຼືອເດັກສາກົນ ປະຈໍາ ສປປ ລາວ, ໂດຍໃຫ້ກຽດເຂົ້າຮ່ວມເປັນສັກຂີພິຍານ ຂອງທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ການສ້າງຄວາມເຂັ້ມແຂງໃຫ້ລະບົບສາທາລະນະສຸກ ໃນ ສປປລາວ ເນັ້ນໃສ່ສ້າງຄວາມທົນທານກັບສະພາບການປ່ຽນແປງດິນຟ້າອາກາດແມ່ນໄດ້ຮັບທຶນສະໜັບສະໜູນຫຼັກຈາກກອງທຶນສີຂຽວທາງດ້ານການປ່ຽນແປງດິນຟ້າອາກາດ ໂດຍຜ່ານອົງການຊ່ວຍເຫຼືອເດັກອົດສະຕຣາລີ ດ້ວຍການປະກອບທຶນຊ່ວຍເຫຼືອຈາກອົງການຊ່ວຍເຫຼືອເດັກສະຫະລັດອາເມລິກາ, ອົງການອະນາໄມໂລກ ແລະ ລັດຖະບານແຫ່ງ ສປປ ລາວ (ໃນຮູບແບບການສົມທົບທີ່ບໍ່ແມ່ນເງິນ), ຊຶ່ງມີຈຸດປະສົງເພື່ອເສີມສ້າງຄວາມເຂັ້ມແຂງດ້ານການປັບຕົວຕໍ່ການປ່ຽນແປງດິນຟ້າອາກາດ ແລະ ມີຄວາມຍືນຍົງຂອງລະບົບສາທາລະນະສຸກ ໃນ 7 ແຂວງເປົ້າໝາຍຂອງໂຄງການ: ແຂວງຫຼວງພະບາງ, ຫຼວງນໍ້າທາ, ຜົ້ງສາລີ, ອຸດົມໄຊ, ສາລະວັນ, ຄໍາມ່ວນ ແລະ ເຊກອງ.

ໃນໄລຍະ 5 ປີຂ້າງໜ້າ, ໂຄງການ ຈະໃຫ້ການສະໜັບສະໜູນ ສະຖານທີ່ບໍລິການສາທາລະນະສຸກ ຈໍານວນ 100 ແຫ່ງ ແລະ ຊຸມຊົນ ຈໍານວນ 250 ແຫ່ງ ໃນ 25 ເມືອງ ຂອງ 7 ແຂວງ, ໂດຍຈະເສີມສ້າງຄວາມສາມາດຂອງພະນັກງານສາທາລະນະສຸກ ໃນການແກ້ໄຂຄວາມສ່ຽງດ້ານສຸຂະພາບທີ່ກ່ຽວຂ້ອງກັບການປ່ຽນແປງດິນຟ້າອາກາດ, ປັບປຸງພື້ນຖານໂຄງລ່າງດ້ານສາທາລະນະສຸກ ໃຫ້ມີຄວາມທົນທານຕໍ່ການປ່ຽນແປງດິນຟ້າອາກາດ ແລະ ປະຢັດພະລັງງານ ໃນສະຖານທີ່ບໍລິການສາທາລະນະສຸກ ຈໍານວນ 79 ແຫ່ງ, ພ້ອມນັ້ນ ໂຄງການ ຈະສ້າງຄວາມເຂັ້ມແຂງໃຫ້ແກ່ຊຸມຊົນໃນການກໍານົດບູລິມະສິດດ້ານສຸຂະພາບ ທີ່ກ່ຽວພັນກັບການປ່ຽນແປງດິນຟ້າອາກາດ, ຂະຫຍາຍລະບົບເຕືອນໄພລ່ວງໜ້າ ແລະ ປັບປຸງການເຂົ້າເຖິງການບໍລິການດ້ານສຸຂະພາບ ໃຫ້ແກ່ປະຊາຊົນຫຼາຍກວ່າ 2.3 ລ້ານຄົນ ໃນເຂດຊົນນະບົດທີ່ມີຄວາມສ່ຽງສູງຕໍ່ການປ່ຽນແປງດິນຟ້າອາກາດ.

ການປ່ຽນແປງສະພາບດິນຟ້າອາກາດໃນໄລຍະທີ່ຜ່ານມາຮອດປະຈຸບັນ ໃນ ສປປ ລາວ ເຫັນວ່າເກີດມີ ສະພາບອຸນຫະພູມທີ່ເພີ່ມສູງຂື້ນ, ເກີດມີໄພພີບັດທຳມະຊາດ ນໍ້າຖ້ວມ ສະພາບມົນລະພີດ PM 2,5 ແລະ ອື່ນໆ…

ສິ່ງດັ່ງກ່າວ ໄດ້ສົ່ງຜົນກະທົບຕໍ່ສຸຂະພາບຂອງປະຊາຊົນລາວໃນຂອບເຂດທົ່ວປະເທດ ແລະ ໃນຕໍ່ໜ້າ ຖ້າເຫດການຄວາມຮຸນແຮງ ຂອງສະພາບການປ່ຽນແປງດີນຟ້າອາກາດ ມີຄວາມຖີ່ ແລະ

ຄວາມຮຸນແຮງ ເພີ່ມຂຶ້ນເລື້ອຍໆ ກໍຈະສົ່ງຜົນກະທົບຕໍ່ກັບຂະແໜງສາທາລະນະສຸກໂດຍກົງ ຊຶ່ງຈະສ້າງຄວາມເສຍຫາຍໃຫ້ແກ່ພື້ນຖານໂຄງລ່າງຂອງຂະແໜງສາທາລະນະສຸກ ລວມເຖິງການບໍລິການນໍ້າສະອາດ, ສຸຂາພິບານ ແລະ ອະນາໄມ.

ສະແດງຄຳຄິດເຫັນ