ກະຊວງກະສິກຳ ແລະ ປ່າໄມ້ ອອກແຈ້ງການ ເລື່ອງ ເພີ່ມທະວີການເຝົ້າລະວັງ ແລະ ຈັດຕັ້ງປະຕິບັດມາດຕະການປ້ອງກັນ ແລະ ສະກັດກັ້ນ ການແຜ່ລະບາດຂອງພະຍາດໄຂ້ເລືອດດຳ ບໍ່ໃຫ້ແຜ່ລາມເຂົ້າມາ ສປປ ລາວ.

 

ເນື່ອງຈາກພົບການລະບາດຂອງພະຍາດໄຂ້ເລືອດດຳໃນສັດລ້ຽງຢູ່ແຂວງມຸກດາຫານ ປະເທດໄທ ເຊິ່ງເປັນພະຍາດຕິດຕໍ່ຮ້າຍແຮງທີ່ເກີດກັບສັດລ້ຽງລູກດ້ວຍນ້ຳນົມ ແລະ ສາມາດຕິດຕໍ່ສູ່ຄົນໄດ້.

 

ກະຊວງກະສິກຳ ແລະ ປ່າໄມ້ ຈຶ່ງໄດ້ອອກແຈ້ງການດັ່ງນີ້:

 

• ໃຫ້ໂຈະການນຳເຂົ້າ ແລະ ສົ່ງຜ່ານສັດ ແລະ ຜະລິດຕະພັນສັດປະເພດ ງົວ, ຄວາຍ, ມ້າ, ໝູ, ແກະ ແລະ ແບ້ ຈາກປະເທດໄທຢ່າງເດັດຂາດ ຈົນກວ່າສະພາບການລະບາດຈະກັບຄືນສູ່ສະພາບປົກກະຕິ.

 

• ໃຫ້ພະແນກກະສິກຳ ແລະ ປ່າໄມ້ແຂວງ ແລະ ນະຄອນຫຼວງວຽງຈັນ ສົມທົບກັບພາກສ່ວນກ່ຽວຂ້ອງ ເອົາໃຈໃສ່ປະຕິບັດມາດຕະການປ້ອງກັນພະຍາດຢ່າງເຂັ້ມງວດຢູ່ດ່ານຕ່າງໆ ແລະ ດຳເນີນການສີດພົ່ນຢາຂ້າເຊື້ອພາຫະນະທີ່ເຂົ້າມາຈາກປະເທດໄທ.

 

• ໃຫ້ພະແນກກະສິກຳ ແລະ ປ່າໄມ້ແຂວງ ແລະ ນະຄອນຫຼວງວຽງຈັນ ສົມທົບກັບພາກສ່ວນກ່ຽວຂ້ອງ ແຈ້ງການໃຫ້ອຳນາດການປົກຄອງບ້ານ, ໜ່ວຍງານສັດຕະວະແພດບ້ານ, ຜູ້ປະກອບການ ແລະ ຊາວກະສິກອນ ເພີ່ມທະວີການເຝົ້າລະວັງ ແລະ ຕິດຕາມສັດລ້ຽງຢ່າງໃກ້ຊິດ ແລະ ແຈ້ງເຈົ້າໜ້າທີ່ເມື່ອພົບເຫັນສັດທີ່ສົງໃສວ່າຕິດພະຍາດ. ຫ້າມຜ່າຊາກສັດຕາຍ ແລະ ນຳຊີ້ນສັດຕາຍໄປບໍລິໂພກ ແລະ ຂາຍ.

 

• ໃຫ້ພະແນກກະສິກຳ ແລະ ປ່າໄມ້ແຂວງ ແລະ ນະຄອນຫຼວງວຽງຈັນ ສົມທົບກັບພາກສ່ວນກ່ຽວຂ້ອງ ຈັດຕັ້ງໂຄສະນາເຜີຍແຜ່ຄວາມຮູ້ກ່ຽວກັບພະຍາດໄຂ້ເລືອດດຳ ແລະ ແນະນຳການດູແລຮັກສາສຸຂະພາບສັດ, ການປ້ອງກັນພະຍາດ ແລະ ການອະນາໄມບ່ອນຢູ່ອາໄສຂອງສັດລ້ຽງ.

 

• ໃຫ້ພະແນກກະສິກຳ ແລະ ປ່າໄມ້ແຂວງ ແລະ ນະຄອນຫຼວງວຽງຈັນ ຊີ້ນຳຂະແໜງການທີ່ກ່ຽວຂ້ອງ ລົງເຄື່ອນໄຫວສັກຢາວັກຊິນປ້ອງກັນພະຍາດໃຫ້ສັດລ້ຽງຢ່າງເປັນປົກກະຕິ ແລະ ຕໍ່ເນື່ອງ, ໂດຍສະເພາະໃນເຂດທີ່ມີຄວາມສ່ຽງສູງ ໃຫ້ສັກຢາປ້ອງກັນພະຍາດໄຂ້ເລືອດດຳຢ່າງຮີບດ່ວນ ແລະ ທົ່ວເຖິງ.

 

ຖ້າພົບຄວາມຫຍຸ້ງຍາກໃນການຈັດຕັ້ງປະຕິບັດ ໃຫ້ລາຍງານຕໍ່ຂັ້ນເທິງເພື່ອພິຈາລະນາ.

 

 

ສະແດງຄຳຄິດເຫັນ