ປະຊາຊົນຂຸດພົບເຫັນລະເບີດຂະໜາດ 500 ປອນ ເຂດບ້ານສົບເລົ່າ ເມືອງຫົວເມືອງ ແຂວງຫົວພັນ

ອີງຕາມໂຄງການເກັບກູ້ລະເບີດຂອງອົງການ ເພື່ອມະນຸດສະທໍາ ແລະ ການມີສ່ວນຮ່ວມ ໄດ້ລາຍງານໃນວັນທີ 1 ພຶດສະພາ 2025 ຜ່ານມາ, ໄດ້ຮັບແຈ້ງວ່າປະຊາຊົນບ້ານ ສົບເລົ່າ ເມືອງຫົວເມືອງ ແຂວງຫົວພັນ ໄດ້ພົບເຫັນລະເບີດຂະໜາດໃຫຍ່ໃນຂະນະການບຸກເບີກດິນສໍາລັບປຸກເຮືອນ.

ຕາມການລາຍງານລະເບີດດັ່ງກ່າວ ແມ່ນ ໂບມໃຫຍ່ຖິ້ມຈາກຍົນ ລຸ້ນ MK82 ຂະໜາດ 500 ປອນ.

ຕໍ່ມາໃນວັນທີ 2 ພຶດສະພາ ທາງທີມເກັບກູ້ລະເບີດ ກໍໄດ້ເຄື່ອນຍ້າຍລະເບີດດັ່ງກ່າວ ໄປທີ່ສະໜາມທໍາລາຍລະເບີດທີ່ ບ້ານ ນາສາມ ເພາະບໍ່ສາມາດທໍາລາຍກັບທີ່ໄດ້ ເນື່ອງຈາກວ່າຈຸດທີ່ພົບລະເບີດແມ່ນຢູ່ໃນເຂດຊຸມຊົນ.

ພາຍຫຼັງ ການເຄື່ອນຍ້າຍສໍາເລັດ ທາງທີມງານກໍໄດ້ວາງແຜນການທໍາລາຍໂບມໃຫຍ່ດັ່ງກ່າວໃນວັນທີ 3 ພຶດສະພາ ເຊິ່ງການທໍາລາຍ ແມ່ນສໍາເລັດ ແລະ ປອດໄພຕາມການວາງແຜນຂອງທີມງານ.

ສະແດງຄຳຄິດເຫັນ