ນັກວິທະຍາສາດຄາດການແລ້ວວ່າເມື່ອໃດຄຳທຳນາຍວັນສິ້ນໂລກທີ່ມືດມົນຂອງ “ອີລອນ ມັສກ໌” ກ່ຽວກັບການສິ້ນສຸດຂອງມະນຸດຊາດອາດກາຍເປັນຄວາມຈິງ

ດ້ວຍເຫດຜົນບາງປະການ, ພວກເຮົາມັກຫຼົງໄຫຼໃນການທຳນາຍວ່າເມື່ອໃດໂລກຈະບໍ່ສາມາດຢູ່ອາໄສໄດ້ອີກຕໍ່ໄປສຳລັບມະນຸດ ບໍ່ວ່າຈະເປັນຈາກສົງຄາມນິວເຄລຍ, ອຸກກາບາດທີ່ບໍ່ສາມາດຄວບຄຸມໄດ້, ຫຼືຈາກຄວາມໂງ່ຂອງພວກເຮົາເອງທ່າມກາງວິກິດການດ້ານສະພາບອາກາດທີ່ຍັງຄົງດຳເນີນຢູ່.

• ມີພຽງແຕ່ 2 ປະເທດທີ່ຢູ່ລອດ! ຜູ້ຊ່ຽວຊານເປີດເຜີຍ “ພື້ນທີ່ປອດໄພ” ຫາກເກີດສົງຄາມນິວເຄລຍ

ຫາກທ່ານຢູ່ໃນໄວໜຶ່ງ, ທ່ານອາດຈະຈື່ໄດ້ວ່າໃນປີ 2012 ຫຼາຍຄົນຄິດວ່າໂລກຈະສິ້ນສຸດລົງ. ແຕ່ຄວາມຈິງແລ້ວການເຕືອນວັນສິ້ນໂລກນັ້ນເກີດຂຶ້ນສະເໝີ, ເຊັ່ນດຽວກັບຄຳທຳນາຍອາຍຸ 1,000 ປີ ທີ່ຖືກເປີດເຜີຍໃນນະຄອນວາຕິກັນຫຼັງຈາກການປະກາດແຕ່ງຕັ້ງສົມເດັດພະສັນຕະປາປາຄົນໃໝ່ໃນອາທິດນີ້.

ມັສກ໌ພຽງແຕ່ແນະນຳວ່າ, ເພິ່ນຄາດວ່າໂລກຈະຖືກ “ເຜົາທຳລາຍ” ແລະນັ້ນຄືເຫດຜົນທີ່ເພິ່ນຕ້ອງການໃຫ້ມະນຸດຊອກຫາວິທີທີ່ຈະຢູ່ອາໄສໃນອາວະກາດ, ເຊິ່ງກໍ່ບໍ່ໜ້າແປກໃຈ, ເມື່ອພິຈາລະນາຈາກການທີ່ເພິ່ນມີສ່ວນຮ່ວມໃນໂຄງການອາວະກາດຫຼາຍໂຄງການ, ລວມເຖິງການສົ່ງເທສລາໄປໃນອາວະກາດ.

ໃນການສຳພາດກັບເຈສຊີ່ ວໍເຕີສ ຈາກຊ່ອງຟັອກຊ໌, ເມື່ອວັນຈັນທີ 5 ພຶດສະພາ ທີ່ຜ່ານມາ, ມັສກ໌ ກ່າວວ່າ “ມັນບໍ່ແມ່ນພຽງການໄປຢ້ຽມຢາມດາວອັງຄານຄັ້ງດຽວ ແຕ່ຄືການເຮັດໃຫ້ຊີວິດເປັນແບບຫຼາຍດາວເຄາະ, ເພື່ອຂະຫຍາຍຂອບເຂດແລະຂະໜາດຂອງຈິດສຳນຶກ, ເພື່ອໃຫ້ພວກເຮົາເຂົ້າໃຈທຳມະຊາດຂອງຈັກກະວານໄດ້ດີຂຶ້ນ, ແລະເພື່ອຮັບປະກັນການຢູ່ລອດໄລຍະຍາວຂອງອາລະຍະທຳ.

ໃນກໍລະນີທີ່ເກີດເຫດການຮ້າຍແຮງກັບໂລກ, ພວກເຮົາຈະຍັງຄົງມີຈິດສຳນຶກທີ່ດາວອັງຄານ.”

ຊີອີໂອຂອງ SpaceX ກ່າວເສີມວ່າ “ນີ້ຄືໜຶ່ງໃນຜົນປະໂຫຍດຂອງດາວອັງຄານ, ມັນຄືກັບປະກັນຊີວິດຮ່ວມກັນ.

ໃນທີ່ສຸດຊີວິດທັງໝົດໃນໂລກຈະຖືກທຳລາຍໂດຍດວງອາທິດ. ດວງອາທິດກຳລັງຂະຫຍາຍຕົວຢ່າງຊ້າໆ ແລະພວກເຮົາຈຳເປັນຕ້ອງເປັນອາລະຍະທຳທີ່ມີຫຼາຍດາວເຄາະ, ເພາະໂລກຈະຖືກເຜົາທຳລາຍ”

ນັກວິໄຈຈາກມະຫາວິທະຍາໄລໂທໂຮໃນຍີ່ປຸ່ນ ໄດ້ຄຳນວນວັນທີ່ປະມານການວ່າເມື່ອໃດເຫດການນີ້ອາດເກີດຂຶ້ນ, ໂດຍໃຊ້ຊຸບເປີຄອມພິວເຕີຂັ້ນສູງແລະແບບຈຳລອງທາງຄະນິດສາດເພື່ອທຳນາຍການພັດທະນາໄລຍະຍາວຂອງດວງອາທິດ.

ໃນການສຶກສາທີ່ເຜີຍແຜ່ໃນວາລະສານ Nature Geoscience ພວກເຂົາປະມານວ່າ, ຫາກມະນຸດບໍ່ສາມາດປັບຕົວໃຫ້ເຂົ້າກັບສະພາບແວດລ້ອມໃໝ່ໄດ້, ໂລກຈະກາຍເປັນທີ່ຢູ່ອາໄສບໍ່ໄດ້ສຳລັບພວກເຮົາໃນປີ 1,000,002,021.

ໂດຍນັກວິໄຈເຊື່ອວ່າດວງອາທິດຈະຮ້ອນແລະສະຫວ່າງຂຶ້ນ, ເຊິ່ງຈະເຮັດໃຫ້ອຸນຫະພູມທົ່ວໂລກສູງຂຶ້ນແລະລະດັບອົກຊີເຈນຄ່ອຍໆ ຫຼຸດລົງ.

ຍັງພົບວ່າໃນອີກປະມານ 5,000 ລ້ານປີຂ້າງໜ້າ, ດວງອາທິດຈະເຂົ້າສູ່ຊ່ວງດາວຍັກແດງ, ແລະອາດເຮັດໃຫ້ມັນກືນກິນດາວເຄາະທີ່ຢູ່ໃກ້ຄຽງ, ລວມເຖິງດາວພຸດ, ດາວສຸກ, ແລະອາດລວມເຖິງໂລກດ້ວຍ.

ດັ່ງນັ້ນຫາກທ່ານກຳລັງອ່ານບົດຄວາມນີ້ໃນປີທີ່ 5,000 ລ້ານ, ຂໍໃຫ້ໂຊກດີ.

ເຖິງຢ່າງໃດກໍຕາມ, ພວກເຮົາໄດ້ເຫັນຜົນກະທົບຈາກການທີ່ອຸນຫະພູມຂອງໂລກເພີ່ມສູງຂຶ້ນແລ້ວ, ເຊິ່ງຈະມີຜົນຮ້າຍແຮງຫາກທານ້ຳແຂງຂະໜາດໃຫຍ່ບາງແຫ່ງລະລາຍໃນອີກບໍ່ເທົ່າໃດປີຂ້າງໜ້າ. ແຕ່ເບິ່ງຄືວ່າພວກເຮົາຈະຕ້ອງລໍຖ້າກັນອີກ, ກ່ອນທີ່ພວກເຮົາຈະບໍ່ສາມາດອາໄສຢູ່ໃນໂລກນີ້ໄດ້ອີກຕໍ່ໄປ.

ສະແດງຄຳຄິດເຫັນ