ເມື່ອເວົ້າເຖິງເກົາຫຼີເໜືອ ແນ່ນອນວ່າ ພວກເຮົາຕ້ອງຄິດເຖິງ “ຂີປະນາວຸດ” ຊຶ່ງຕະຫຼອດໄລຍະເວລາທີ່ຜ່ານມາ ກໍຄົງເຄີຍເຫັນພາບການທົດສອບຂີປະນາວຸດຊະນິດຕ່າງໆ ຈາກປະເທດນີ້ ຈົນເອີ້ນໄດ້ວ່າ ເກືອບວ່າຈະເປັນເລື່ອງປົກກະຕິຂອງທີ່ນີ້

ເຖິງແມ່ນວ່າຈະຖືກນານາຊາດຄວ່ຳບາດ ແຕ່ “ຄິມ ຈອງອຶນ” ຜູ້ນຳສູງສຸດເກົາຫຼີເໜືອ ກໍປະກາດມຸ່ງໝັ້ນຈະພັດທະນາໂຄງການນິວເຄຼຍຍ່າງຕໍ່ເນື່ອງ ເພື່ອໃຫ້ປະເທດໄດ້ຂຶ້ນເປັນ “ມະຫາອຳນາດນິວເຄລຍ”

ເກົາຫຼີເໜືອທົດສອບຂີປະນາວຸດຄັ້ງທີ 4 ໃນປີ 2025

ຫຼ້າສຸດ ເມື່ອວັນທີ 8 ພຶດສະພາ ເກົາຫຼີເໜືອເພິ່ງໄດ້ທົດສອບຂີປະນາວຸດຍຸດທະວິທີພິໄສໃກ້ ຮວາຊອງ-11 ແລະ ປືນໃຫຍ່ພິໄສໄກ ເພື່ອກຽມຄວາມພ້ອມທາງທະຫານໃຫ້ເຂັ້ມງວດຍິ່ງຂຶ້ນ ແລະ ຢ້ຳເຖິງຄວາມຈຳເປັນໃນການຂະຫຍາຍບົດບາດຂອງກອງກຳລັງນິວເຄລຍທັງໃນສະຖານະການຍັບຍັ້ງ ແລະ ການຕໍ່ສູ້

ການທົດສອບຄັ້ງນີ້ ນັບໄດ້ວ່າ ເປັນການທົດສອບຄັ້ງທີ 4 ຂອງປີ 2025 ຫຼັງຈາກຍິງທົດສອບຄັ້ງທຳອິດ ເມື່ອຕົ້ນເດືອນມັງກອນທີ່ຜ່ານມາ ໂດຍຫຼາຍຝ່າຍມອງວ່າ ການຍິງທົດສອບຂີປະນາວຸດ ອາດເປັນການທົດສອບ ເພື່ອສົ່ງອາວຸດອອກໄປຍັງຣັດເຊຍ ເນື່ອງຈາກຕອນນີ້ ເກົາຫຼີເໜືອກໍໄດ້ເຂົ້າມາມີບົດບາດບົນຄວາມຂັດແຍ່ງລະຫວ່າງຣັດເຊຍ ແລະ ຢູເຄຣນແລ້ວ

ມຸ່ງພັດທະນາອາວຸດນິວເຄລຍ ດັນປະເທດກ້າວສູ່ມະຫາອຳນາດ

ສິ່ງທີ່ເກົາຫຼີເໜືອໃຫ້ຄວາມສຳຄັນ ແລະ ກຳລັງພັດທະນາຢ່າງໜັກ ນັ້ນຄື “ອາວຸດນິວເຄລຍ” ທີ່ຕົວ ຄິມ ຈອງອຶນ ເອງ ກໍປະກາດຈະເຮັດໃຫ້ປະເທດເດີນໜ້າໄປສູ່ການເປັນ “ມະຫາອຳນາດນິວເຄລຍ” ໃຫ້ໄດ້ ແລະ ກໍມີການຂູ່ວ່າ ຈະໃຊ້ອາວຸດນິວເຄລຍຢູ່ເລື້ອຍໆ

ການທົດສອບຂີປະນາວຸດນິວເຄລຍຂອງເກົາຫຼີເໜືອ ເກີດຂຶ້ນທັງໝົດ 6 ຄັ້ງ ໂດຍຄັ້ງທຳອິດເກີດຂຶ້ນໃນປີ 2006 ຫຼັງເກົາຫຼີເໜືອ ຖອນຕົວອອກຈາກສົນທິສັນຍາບໍ່ແຜ່ຂະຫຍາຍອາວຸດນິວເຄລຍ ຫຼື NPT ໄດ້ພຽງ 3 ປີ ໂດຍຄັ້ງຫຼ້າສຸດ ທີ່ມີການທົດສອບອາວຸດນິວເຄລຍຂອງເກົາຫຼີເໜືອເກີດຂຶ້ນໃນປີ 2017 ສ້າງຄວາມຫວັ່ນວິຕົກບົນຄາບສະໝຸດເກົາຫຼີຢ່າງຫຼວງຫຼາຍ

ດ້ານສະມາຄົມຄວບຄຸມອາວຸດ ປະມານການໄວ້ວ່າ ປີ 2024 ເກົາຫຼີເໜືອມີຫົວຮົບນິວເຄລຍປະມານ 50 ໜ່ວຍ

ຂະນະທີ່ ຜູ້ຊ່ຽວຊານຈາກໂຄງການນະໂຍບາຍນິວເຄລຍຂອງມູນນິທິຄາເນກີ ເປີດເຜີຍວ່າ ເກົາຫຼີເໜືອອາດມີອາວຸດນິວເຄລຍຄອບຄອງຫຼາຍເຖິງ 300 ໜ່ວຍພາຍໃນອີກ 10 ປີຂ້າງໜ້າ

ເປັນຫຍັງເກົາຫຼີເໜືອຕ້ອງພັດທະນາອາວຸດນິວເຄລຍ

ຄຳຖາມຕໍ່ມາຄື ເປັນຫຍັງເກົາຫຼີເໜືອຈຶ່ງຕ້ອງທຸ່ມເທໃຫ້ກັບການພັດທະນາໂຄງການອາວຸດນິວເຄລຍ

ສຳນັກຂ່າວ BBC ເປີດເຜີຍວ່າ ເກົາຫຼີເໜືອຂາດແຫຼ່ງເງິນທຶນ ແລະ ອາວຸດ ຫຼັງສະຫະພາບໂຊວຽດລົ້ມສະລາຍລົງໃນປີ 1991 ເມື່ອປະເທດຂາດເງິນທຶນ ແລະ ປະສົບກັບໄພພິບັດຫຼາຍຄັ້ງ ເຮັດໃຫ້ສະຖານະການເກົາຫຼີເໜືອຮ້າຍແຮງລົງ

ສົ່ງຜົນໃຫ້ເກີດບັນຫາຂາດແຄນອາຫານຮຸນແຮງຕໍ່ເນື່ອງຫຼາຍປີ ເຮັດໃຫ້ປະຊາຊົນເສຍຊີວິດ 3 ລ້ານຄົນ ເມື່ອຖືກນານາຊາດໂດດດ່ຽວ ເກົາຫຼີເໜືອຈຶ່ງຫັນໄປລົງທຶນດ້ານອາວຸດນິວເຄລຍເພື່ອຄວາມຢູ່ລອດ

ສ່ວນທາງດ້ານ Heritage Foundation ຊຶ່ງເປັນອົງການວິໄຈນະໂຍບາຍສາທາລະນະແນວອະນຸລັກນິຍົມຂອງອາເມຣິກາ ວິເຄາະເຖິງເລື່ອງນີ້ໄວ້ວ່າ

1. ຕ້ອງການປົກປ້ອງລະບອບການປົກຄອງ ເກົາຫຼີເໜືອເຊື່ອວ່າ ການມີອາວຸດນິວເຄລຍຈະຊ່ວຍປົກປ້ອງພວກເຂົາຈາກການໂຈມຕີໄດ້ ໂດຍສະເພາະສະຫະລັດຯ
2. ມີໄວ້ເພື່ອເປັນອຳນາດຕໍ່ລອງກັບນານາຊາດ ເຖິງແມ່ນວ່າຕົວຜູ້ນຳຄິມຈະບອກວ່າ ອາວຸດນິວເຄລຍບໍ່ໄດ້ມີໄວ້ເພື່ອການຕໍ່ລອງ ແຕ່ອອກແບບມາເພື່ອໃຊ້ໃນການຮົບ ແຕ່ການຂົ່ມຂູ່ວ່າ ຈະໃຊ້ອາວຸດນິວເຄລຍຫຼາຍຄັ້ງຂອງເກົາຫຼີເໜືອ ກໍເຮັດໃຫ້ຫຼາຍຊາດຕ່າງເຝົ້າລະວັງເລື່ອງນີ້ຢ່າງຫຼວງຫຼາຍ ແລະ ບາງຄັ້ງເກົາຫຼີເໜືອກໍໄດ້ຮັບໃນສິ່ງທີ່ຕົນເອງຕ້ອງການ
3. ເພື່ອສ້າງພາບລັກຂອງຜູ້ນຳ ການມີອາວຸດນິວເຄລຍ ຈະເຮັດໃຫ້ພາບລັກຂອງຜູ້ນຳເບິ່ງແຂງແກ່ງ ແລະ ສຳຄັນຕໍ່ປະເທດ
4. ເພື່ອເຮັດໃຫ້ພັນທະມິດສະຫະລັດຯ-ເກົາຫຼີໃຕ້ອ່ອນແອລົງ ຫາກສະຫະລັດຯ ຢ້ານທີ່ຈະຖືກໂຈມຕີດ້ວຍອາວຸດນິວເຄລຍ ເກົາຫຼີເໜືອຫວັງວ່າສະຫະລັດຯ ອາດລັງເລທີ່ຈະປົກປ້ອງເກົາຫຼີໃຕ້

ເກົາຫຼີເໜືອ-ຣັດເຊຍ ມິດຕະພາບໃໝ່ເທິງຄວາມຂັດແຍ່ງ

ທ່າມກາງຄວາມຂັດແຍ່ງໂລກທີ່ເພີ່ມຂຶ້ນ 2 ຊາດທີ່ມີອາວຸດນິວເຄລຍເຊັ່ນ: ຣັດເຊຍ ແລະ ເກົາຫຼີເໜືອ ກັບຜູກສຳພັນໜັກແໜ້ນຫຼາຍຂຶ້ນ

ຜົນຈາກມາດຕະການຄວ່ຳບາດ ຈຶ່ງເຮັດໃຫ້ພວກເຂົາໂດດດ່ຽວຫຼາຍຂຶ້ນ ນັ້ນຈຶ່ງເປັນໜຶ່ງໃນປັດໄຈສຳຄັນທີ່ເຮັດໃຫ້ຣັດເຊຍ ແລະ ເກົາຫຼີຫັນມາຈັບມືກັນ ເພື່ອແລກປ່ຽນຄວາມຕ້ອງການຮ່ວມກັນ ແລະ ບັນເທົາຜົນກະທົບທີ່ເກີດຂຶ້ນຈາກຊາດຕາເວັນ

ເກົາຫຼີເໜືອສົ່ງທະຫານໄປຮ່ວມຮົບໃນສົງຄາມຢູເຄຣນ ຂະນະທີ່ ຣັດເຊຍຈະສົ່ງອາຫານ, ຊ່ວຍເຫຼືອທັງທາງການເງິນ ແລະ ທາງທະຫານໃຫ້ກັບເກົາຫຼີເໜືອ ຊຶ່ງຄາດວ່າ ເກົາຫຼີເໜືອອາດຂໍໃຫ້ຣັດເຊຍຊ່ວຍພັດທະນາໂຄງການອາວຸດນິວເຄລຍ ເພື່ອບັນລຸເປົ້າໝາຍຂອງຕົນ

ໂດຍ ວລາດິເມຍ ປູຕິນ ປະທານາທິບໍດີຣັດເຊຍ ເດີນທາງຢ້ຽມຢາມເກົາຫຼີເໜືອດ້ວຍຕົນເອງເມື່ອປີ 2024 ພ້ອມລົງນາມບັງຄັບໃຊ້ກົດໝາຍທີ່ໃຫ້ສັດຕະຍາບັນຮັບຮອງສົນທິສັນຍາຄວາມເປັນຫຸ້ນສ່ວນທີ່ຄອບຄຸມກັບເກົາຫຼີເໜືອ ທີ່ລວມທັງຄຳໝັ້ນທີ່ຈະໃຫ້ການຊ່ວຍເຫຼືອທາງການທະຫານລະຫວ່າງກັນ ຖ້າຝ່າຍໃດຝ່າຍໜຶ່ງຖືກໂຈມຕີ

ຄວາມສຳພັນຂອງ 2 ປະເທດ ຍິ່ງເຮັດໃຫ້ທົ່ວໂລກມອງວ່າ ເປັນຄວາມສຳພັນທີ່ເປັນໄພຂົ່ມຂູ່ຕໍ່ຄວາມໝັ້ນຄົງໂລກ ເພາະອາດເຮັດໃຫ້ການສູ້ຮົບຂະຫຍາຍຕົວເພີ່ມຂຶ້ນໃນພາກພື້ນ, ທ້າທາຍກົດເກນແລະລະບົບທີ່ໂລກໃຊ້ເພື່ອຮັກສາສັນຕິພາບ ລວມເຖິງຍັງອາດເປັນການສົ່ງສັນຍານເຕືອນສະຫະລັດຯ ແລະ ພັນທະມິດໃຫ້ຖືເອົາຄວາມຮ່ວມມືລະຫວ່າງ “ຄິມ-ປູຕິນ” ຢ່າງຈິງຈັງ ແລະ ກຽມພ້ອມສຳລັບສິ່ງທີ່ອາດເກີດຂຶ້ນຕໍ່ໄປ

ສະແດງຄຳຄິດເຫັນ