ການສຶກສາໃໝ່ທີ່ເຜີຍແຜ່ໃນວາລະສານວິຊາການພີເອັນເອເອສ (PNAS) ເມື່ອວັນອັງຄານ (13ພຶດສະພາ) ເປີດເຜີຍວ່ານັກວິໄຈໃນສະຫະລັດຯ ພັດທະນາແອັບພລິເຄຊັນເທິງສະມາດໂຟນທີ່ເສີມດ້ວຍປັນຍາປະດິດ (AI) ຊຶ່ງສາມາດປະເມີນລະດັບຮີໂມໂກລບິນໃນເລືອດຫຼືໂປຣຕີນທີ່ຢູ່ໃນເຊວເມັດເລືອດແດງ ແລະ ຄັດກອງພາວະໂລຫິດຈາງຈາກຮູບຖ່າຍເລັບຂອງຜູ້ໃຊ້ງານ ໂດຍບໍ່ຕ້ອງເຈາະເລືອດ

ການສຶກສາພົບວ່າແອັບພລິເຄຊັນນີ້ມີຄວາມແມ່ນຢຳສູງເມື່ອທຽບກັບຜົນການກວດຄວາມສົມບູນຂອງເມັດເລືອດ (complete blood count) ທີ່ມີລາຍງານຈາກຜູ້ໃຊ້ງານ 9,061 ຄົນ

ໂດຍການໃຊ້ງານແອັບພລິເຄຊັນກວ່າ 1.4 ລ້ານຄັ້ງຍັງຊ່ວຍໃຫ້ສາມາດສ້າງແຜນທີ່ຄວາມຊຸກໂຣກໂລຫິດຈາງແບບເຣຍໄທມ໌ທົ່ວສະຫະລັດຯ ໄດ້ອີກດ້ວຍ

ທີມນັກວິໄຈລະບຸວ່າຄວາມສາມາດໃນການກວດຄັດກອງແບບທີ່ບໍ່ຕ້ອງເຈາະເລືອດແລະເຂົ້າເຖິງໄດ້ງ່າຍ ສົ່ງຜົນໃຫ້ແອັບພລິເຄຊັນນີ້ເປັນທາງເລືອກທີ່ມີສັກກະຍະພາບໃນການກວດຄັດກອງແລະຕິດຕາມພາວະໂລຫິດຈາງໃນວົງກວ້າງ ໂດຍສະເພາະໃນພື້ນທີ່ທີ່ມີຊັບພະຍາກອນຈຳກັດ

ທັງນີ້, ທີມນັກວິໄຈຍັງເນັ້ນເຖິງສັກກະຍະພາບຂອງແອັບພລິເຄຊັນໃນການຕິດຕາມສຸຂະພາບສະເພາະບຸກຄົນ ຊຶ່ງຈະຊ່ວຍໃຫ້ຜູ້ປ່ວຍທີ່ມີພາວະໂລຫິດຈາງສາມາດກວດສອບລະດັບຮີໂມໂກລບິນຂອງຕົນເອງໄດ້

ສະແດງຄຳຄິດເຫັນ