ບອສຕັນໄດນາມິກສ໌ (Boston Dynamics) ບໍລິສັດຜູ້ນຳດ້ານເຕັກໂນໂລຢີຫຸ່ນຍົນຮິວແມນນອຍດ໌ ຫຼື ຫຸ່ນຍົນຄ້າຍຄືມະນຸດ ປະກາດກຽມສົ່ງຫຸ່ນຍົນມະນຸດລຸ້ນຫຼ້າສຸດຢ່າງ ແອັດລາສ (Atlas) ເຂົ້າທົດລອງເຮັດວຽກໃນໂຮງງານຜະລິດຂອງຮຸນໄດ ມໍເຕີ ກຣຸບ (Hyundai Motor Group) ໃນສະຫະລັດອາເມລິກາພາຍໃນປີນີ້ ເພື່ອເປັນການບູລະນາການເຕັກໂນໂລຢີຫຸ່ນຍົນລ້ຳສະໄໝເຂົ້າສູ່ຂະບວນການຜະລິດຍານຍົນ

 

 

ສຳລັບຫຸ່ນຍົນ ແອັດລາສ (Atlas) ເປັນຫຸ່ນຍົນທີ່ມີຈຸດເດັ່ນຄືການໃຊ້ລະບົບມໍເຕີໄຟຟ້າທີ່ມີນ້ຳໜັກເບົາແຕ່ແຂງແຮງ ຊ່ວຍໃຫ້ຫຸ່ນຍົນເຄື່ອນໄຫວຂໍ້ຕໍ່ໄດ້ດີ ສາມາດສະແດງທ່າທາງ ທຳລາຍຂີດຈຳກັດການເຄື່ອນໄຫວຕາມທຳມະຊາດຂອງມະນຸດ ເຊັ່ນ: ການໝຸນກັບດ້ານຂອງແຂນ ຂາ ແລະລຳຕົວໃນລັກສະນະ 180 ອົງສາ ເຮັດໃຫ້ມັນສາມາດຮອງຮັບການເຄື່ອນໄຫວ ແລະການໃຊ້ງານໄດ້ຫຼາກຫຼາຍ

 

ການນຳໄປໃຊ້ໃນໂຮງງານຜະລິດຍານຍົນຂອງຮຸນໄດ ຈະເປັນສ່ວນງານຜະລິດທີ່ເນັ້ນການປະຕິບັດງານທີ່ຊັບຊ້ອນ ເຊັ່ນ: ການຄັດແຍກຊິ້ນສ່ວນລົດຍົນ ແລະ ການເຄື່ອນຍ້າຍຂອງໜັກແທນມະນຸດ ເພື່ອຫຼຸດຄວາມສ່ຽງຕໍ່ຜົນກະທົບດ້ານສຸຂະພາບຂອງແຮງງານ ແລະ ຍັງເປັນການຊ່ວຍຫຼຸດຄວາມສ່ຽງຕ່າງໆ ທີ່ຈະເກີດຂຶ້ນກັບແຮງງານມະນຸດອີກດ້ວຍ

 

ທາງດ້ານຂອງບໍລິສັດຜູ້ຜະລິດຫຸ່ນຍົນເປີດເຜີຍວ່າ ເປົ້າໝາຍຫຼັກຂອງໂຄງການນີ້ ຄືເພື່ອທົດສອບການໃຊ້ງານຫຸ່ນຍົນໃນພາກການຜະລິດ ແລະ ເພື່ອທົດສອບວ່າຫຸ່ນຍົນແອັດລາສ ສາມາດເຮັດວຽກທີ່ຕ້ອງໃຊ້ແຮງ ແລະ ເຮັດໜ້າທີ່ແທນມະນຸດໄດ້ແບບໃດແດ່ ເພື່ອພັດທະນາໃຫ້ມັນສາມາດຕອບໂຈດການໃຊ້ໃນໂຮງງານຫຼາຍຍິ່ງຂຶ້ນ

 

ທັງນີ້ທາງບໍລິສັດມອງວ່າໃນອະນາຄົດ ຫຸ່ນຍົນຄ້າຍມະນຸດຢ່າງແອັດລາສ ອາດຈະຂະຫຍາຍຄວາມສາມາດເພື່ອເປັນ “ຫຸ່ນຍົນຮັບໃຊ້” ທີ່ຊ່ວຍວຽກພາຍໃນເຮືອນໄດ້ດ້ວຍ ແຕ່ບໍລິສັດຍັງຕ້ອງພິຈາລະນາເລື່ອງຂອງຄວາມປອດໄພ ແລະ ພັດທະນາເລື່ອງຂອງຄວາມລະອຽດອ່ອນໃນງານໃຊ້ງານ ທີ່ຕ່າງກັນກັບການເຮັດວຽກໃນອຸດສາຫະກຳການຜະລິດ

 

ເປັນທີ່ໜ້າຈັບຕາວ່າຕອນນີ້ ບໍ່ໄດ້ມີພຽງແຕ່ຫຸ່ນຍົນແອັດລາສ ຈາກບໍລິສັດບອສຕັນໄດນາມິກສ໌ເທົ່ານັ້ນ ທີ່ກຳລັງຈະເຂົ້າໄປເຮັດວຽກໃນໂຮງງານ ເພາະຍັງມີຫຸ່ນຍົນມະນຸດຈາກບໍລິສັດຄູ່ແຂ່ງອື່ນໆ ເຊັ່ນ: ອອບຕິມັສ (Optimus) ຂອງບໍລິສັດເທັສລາ (Tesla) ແລະ ຟິກເກີ ສູນສອງ (Figure 02) ຈາກບໍລິສັດຟິກເກີ (Figure) ທີ່ກຳລັງຢູ່ລະຫວ່າງຊ່ວງທົດລອງງານໃນພາກອຸດສາຫະກຳເຊັ່ນກັນ

 

 

ສະແດງຄຳຄິດເຫັນ