ກະຊວງປ້ອງກັນປະເທດສະຫະລັດ ສັ່ງການ ໃຫ້ຜູ້ບັງຄັບບັນຊາກວດສອບທະຫານໃນກອງທັບສະຫະລັດ ວ່າມີທະຫານທີ່ເປັນຄົນຂ້າມເພດ ຫຼື ມີ “ພາວະບໍ່ມັກເພດ” ຫຼືບໍ່

ເມື່ອວັນທີ 15 ພຶດສະພາ ທີ່ຜ່ານມາ ກະຊວງປ້ອງກັນປະເທດສະຫະລັດຯ ມີຄຳສັ່ງໃຫ້ເຈົ້າໜ້າທີ່ກອງທັບດຳເນີນການກວດເຊັກທະຫານໃນໜ່ວຍຂອງຕົນເອງວ່າ ມີໃຜເປັນຄົນຂ້າມເພດຫຼືມີ “ພາວະບໍ່ມັກເພດ” (Gender Dysphoria) ຫຼືບໍ່ ຫາກມີ ຕ້ອງສົ່ງພວກເຂົາໄປກວດສຸຂະພາບເພື່ອໃຫ້ພວກເຂົາອອກຈາກລາຊະການທະຫານ

ເຈົ້າໜ້າທີ່ລະດັບສູງດ້ານປ້ອງກັນປະເທດໄດ້ກຳນົດຂັ້ນຕອນໃໝ່ນີ້ ເພື່ອປະຕິບັດຕາມຄຳສັ່ງຂອງປະທານາທິບໍດີສະຫະລັດຯ ໂດນັລດ໌ ທຣຳ ທີ່ຕ້ອງການຂັບໄລ່ທະຫານຂ້າມເພດອອກຈາກກອງທັບສະຫະລັດຯ

ພີຕ ເຮັກເຊທ ລັດຖະມົນຕີປ້ອງກັນປະເທດສະຫະລັດຯ

ຄຳສັ່ງໃໝ່ນີ້ລະບຸວ່າ ຜູ້ບັງຄັບບັນຊາຈະຕ້ອງໃຊ້ການກວດສຸຂະພາບປະຈຳປີຕາມປົກກະຕິທີ່ທະຫານຕ້ອງເຂົ້າຮັບໃນການກວດສອບວ່າ ມີທະຫານນາຍໃດແດ່ທີ່ເປັນຄົນຂ້າມເພດຫຼືມີພາວະບໍ່ມັກເພດ

ໃນທາງກັບກັນ ທະຫານຂ້າມເພດທີ່ບໍ່ສະໝັກໃຈເປີດເຜີຍຕົວຕົນອາດຖືກຜູ້ບັງຄັບບັນຊາຫຼືບຸກຄົນອື່ນທີ່ຮັບຮູ້ສະຖານະທາງການແພດຂອງພວກເຂົາເປີດເຜີຍໄດ້

ທັງນີ້ ພາວະບໍ່ມັກເພດນັ້ນມີຄວາມແຕກຕ່າງຈາກການເປັນຄົນຂ້າມເພດ ຖືເປັນພະຍາດທາງຈິດເວດ ເກີດຈາກບຸກຄົນນັ້ນໆ ມີຄວາມທຸກທໍລະມານຄັບຂ້ອງໃຈຢ່າງຍິ່ງຈາກເຫດທີ່ມີເພດສະພາບບໍ່ສອດຄ່ອງກັບເພດກຳເນີດ

ມີລາຍງານວ່າ ທະຫານປະຈຳການໃນກອງທັບສະຫະລັດຯ ຈະມີເວລາຈົນເຖິງວັນທີ 6 ມິຖຸນາ ໃນການສະແດງຕົວຕໍ່ກະຊວງປ້ອງກັນປະເທດໂດຍສະໝັກໃຈ ສ່ວນທະຫານໃນກອງກຳລັງພິທັກມາຕຸພູມແລະກອງໜຸນຈະມີເວລາຈົນເຖິງວັນທີ 7 ກໍລະກົດ

ກະຊວງປ້ອງກັນປະເທດສະເໜີເງິນຊົດເຊີຍໃຫ້ກັບຜູ້ທີ່ສະໝັກໃຈລາອອກ ພວກເຂົາຈະໄດ້ຮັບເງິນຊົດເຊີຍການລາອອກປະມານ 2 ເທົ່າຂອງຜູ້ທີ່ບໍ່ຍອມເປີດເຜີຍຕົວ

ພາຍໃຕ້ນະໂຍບາຍໃໝ່ນີ້ “ຜູ້ບັນຊາການທີ່ຊາບວ່າ ທະຫານໃນໜ່ວຍຂອງຕົນມີພາວະບໍ່ມັກເພດ ມີປະຫວັດຂອງພາວະບໍ່ມັກເພດ ຫຼື ມີອາການທີ່ສອດຄ່ອງກັບພາວະບໍ່ມັກເພດ ຈະຕ້ອງກວດສອບປະຫວັດການປິ່ນປົວຂອງທະຫານແຕ່ລະນາຍເພື່ອຢືນຢັນວ່າປະຕິບັດຕາມມາດຕະຖານທາງການແພດ”

ເຈົ້າໜ້າທີ່ຝ່າຍປ້ອງກັນປະເທດກ່າວວ່າ ເປັນໜ້າທີ່ຂອງທະຫານ ແລະ ຜູ້ບັງຄັບບັນຊາທີ່ຈະປະຕິບັດຕາມຂະບວນການໃໝ່ ໂດຍກະຊວງມີຄວາມໝັ້ນໃຈ ແລະ ສະບາຍໃຈທີ່ຜູ້ບັງຄັບບັນຊາຈະນຳນະໂຍບາຍໄປປະຕິບັດ

ຄວາມເຄື່ອນໄຫວນີ້ເກີດຂຶ້ນຫຼັງຈາກທີ່ສານຕັດສິນເມື່ອບໍ່ດົນມານີ້ວ່າ ລັດຖະບານທຣຳສາມາດບັງຄັບໃຊ້ລະບຽບການຫ້າມບຸກຄົນຂ້າມເພດໃນກອງທັບໄດ້

ເຈົ້າໜ້າທີ່ກະຊວງປ້ອງກັນປະເທດລະບຸວ່າ ກອງທັບສະຫະລັດຯ ມີທະຫານປະຈຳການທັງໝົດປະມານ 2.1 ລ້ານນາຍ ໂດຍ  ວັນທີ 9 ທັນວາ 2024 ມີທະຫານ 4,240 ນາຍທີ່ໄດ້ຮັບການວິເຄາະວ່າມີພາວະບໍ່ມັກເພດ ແລະ ຕົວເລກອາດສູງກວ່ານີ້

ສະແດງຄຳຄິດເຫັນ