ຜູ້ທີ່ມີອາການມຶນຕາມປາຍນິ້ວມື, ນິ້ວຕີນ, ຫຼື ແມ້ກະທັ້ງແຂນ, ຂາ, ມື, ແລະ ໃບໜ້າ, ແພດອາດສັນນິຖານວ່າເປັນໂລກອັນຕະລາຍທີ່ກ່ຽວຂ້ອງກັບປາຍປະສາດອັກເສບ. ອາການເຫຼົ່ານີ້ຈະເພີ່ມຄວາມສ່ຽງໃນການເປັນໂລກທີ່ໜັກຂຶ້ນຢ່າງ ໂລກອຳພຶກ, ອຳພາດ ຫຼື ບໍ່? ພວກເຮົາຈະມີວິທີປ້ອງກັນແນວໃດ? ມາເບິ່ງກັນເນາະ.

ປາຍປະສາດອັກເສບ ແມ່ນຫຍັງ?

ເມື່ອສະໝອງປຽບເໝືອນສູນຄວບຄຸມການສົ່ງກະແສໄຟຟ້າ, ສະໝອງຈະຄວບຄຸມການສົ່ງກະແສໄຟຟ້າໄປຍັງອະໄວຍະວະຕ່າງໆ ຜ່ານທາງສາຍໄຟ ຫຼື ໃນທີ່ນີ້ຄືເສັ້ນປະສາດ, ແລະ ມີສາຍໄຟແຮງສູງ ຫຼື ເສັ້ນປະສາດໃຫຍ່ຢູ່ທີ່ໄຂກະດູກສັນຫຼັງ, ທີ່ພ້ອມກະຈາຍໄຟຟ້າໄປຍັງເສັ້ນປະສາດອື່ນໆ ຕໍ່ອີກຕໍ່ໜຶ່ງ.

ແຕ່ເມື່ອເສັ້ນປະສາດເລີ່ມມີບັນຫາໃນຈຸດໃດຈຸດໜຶ່ງ, ເຮັດໃຫ້ອະໄວຍະວະສ່ວນນັ້ນເຮັດວຽກຜິດປົກກະຕິ, ຈຶ່ງອາດເປັນທີ່ມາຂອງປາຍປະສາດອັກເສບ, ທີ່ເຮັດໃຫ້ເກີດອາການມຶນຕາມປາຍມືປາຍຕີນ. ເສັ້ນປະສາດບໍ່ສາມາດຮັບຮູ້ໄດ້ເຖິງອາການເຈັບປວດ, ແສບຮ້ອນ, ສັ່ນສະເທືອນ, ຫຼື ບໍ່ສາມາດຄວບຄຸມກ້າມຊີ້ນສ່ວນນັ້ນໄດ້.

ເສັ້ນປະສາດ ມີຄວາມສຳຄັນແນວໃດ?

ຄືກັນກັບທີ່ກ່າວໄວ້ຂ້າງເທິງວ່າ, ເສັ້ນປະສາດປຽບເໝືອນສາຍໄຟຟ້າທີ່ລຳລຽງພະລັງງານໄປຕາມສ່ວນຕ່າງໆ ຂອງຮ່າງກາຍ. ດັ່ງນັ້ນຫາກເສັ້ນປະສາດເຮັດວຽກຜິດປົກກະຕິ, ກໍ່ຈະສົ່ງໃຫ້ອະໄວຍະວະນັ້ນໆ ເຮັດວຽກຜິດປົກກະຕິໄປດ້ວຍ.

ເສັ້ນປະສາດມີ 2 ປະເພດໃຫຍ່ໆ ທັງເສັ້ນປະສາດໃນສະໝອງ, ທີ່ຄວບຄຸມຈາກສະໝອງໂດຍກົງ, ບໍ່ຜ່ານໄຂກະດູກສັນຫຼັງ, ຄວບຄຸມການເຮັດວຽກຂອງປະສາດສຳຜັດຕ່າງໆ ເຊັ່ນ: ການເບິ່ງເຫັນ, ການໄດ້ກິ່ນ, ການລິ້ມລົດ, ການຊົງຕົວ, ການກືນອາຫານ, ການຂະຫຍັບກ້າມຊີ້ນເທິງໃບໜ້າ, ການອອກສຽງ, ແລະ ຄວບຄຸມກ້າມຊີ້ນບໍລິເວນຫົວໄຫຼ່, ຄໍ, ແລະ ລີ້ນ.

ເສັ້ນປະສາດອີກ 1 ຊະນິດ ຄື ເສັ້ນປະສາດທົ່ວໄປທີ່ກະຈາຍຢູ່ທົ່ວຮ່າງກາຍ, ເປັນເສັ້ນປະສາດທີ່ຕໍ່ມາອີກທີຈາກໄຂກະດູກສັນຫຼັງ. ໂດຍສາມາດແບ່ງຍ່ອຍເປັນສ່ວນໆ ທັງຮາກປະສາດທີ່ຕໍ່ມາຈາກເສັ້ນປະສາດທີ່ໄຂສັນຫຼັງໂດຍກົງ, ກຸ່ມຂອງຮາກປະສາດ, ແລະ ເສັ້ນປະສາດສ່ວນປາຍ, ທີ່ດູແລກ້າມຊີ້ນຂອງອະໄວຍະວະຕ່າງໆ.

ປາຍປະສາດອັກເສບ ມີສາເຫດມາຈາກຫຍັງ?

• ມີອາການໝອນຮອງກະດູກທັບເສັ້ນປະສາດ, ການນອນກົດທັບເສັ້ນປະສາດ, ຫຼື ການກົດທັບຈາກເສັ້ນປະສາດໂດຍເນື້ອງອກ
• ຜົນຂ້າງຄຽງຈາກອາການຕິດເຊື້ອຈາກໂລກຕ່າງໆ ເຊັ່ນ: ວັນນະໂລກ
• ເກີດພາວະຂາດເລືອດມາຫຼໍ່ລ້ຽງ
• ມີໂລກຊຳເຮື້ອຕ່າງໆ ເຊັ່ນ: ເບົາຫວານ, ໄຕວາຍ
• ມີຄວາມຜິດປົກກະຕິມາຕັ້ງແຕ່ກຳເນີດ

ປັດໄຈສ່ຽງໃນການເປັນໂລກປາຍປະສາດອັກເສບ

• ພັນທຸກຳຈາກຄອບຄົວ, ທີ່ອາດເຄີຍເປັນໂລກທີ່ກ່ຽວຂ້ອງກັບການເຮັດວຽກຜິດປົກກະຕິຂອງເສັ້ນປະສາດ
• ມີປະຫວັດການຕິດເຊື້ອຈາກໂລກໃດໂລກໜຶ່ງ
• ລະດັບນ້ຳຕານໃນເລືອດສູງ, ອາດສ່ຽງໂລກເສັ້ນປະສາດທີ່ເກີດຈາກໂລກເບົາຫວານ
• ເຮັດວຽກໂດຍໃຊ້ຂໍ້ມືຫຼາຍໆ ຈົນອາດສ່ຽງເປັນໂລກເສັ້ນປະສາດບໍລິເວນຂໍ້ມືຖືກກົດທັບ
• ເປັນຜູ້ປ່ວຍໂລກໄຕ, ທີ່ຕ້ອງໃຫ້ການປິ່ນປົວໂດຍການຟອກເລືອດ, ຟອກໄຕ

ມຶນປາຍມືປາຍຕີນ ອັນຕະລາຍ ສ່ຽງອຳພາດ?

ເພາະອາການມຶນຕາມປາຍນິ້ວມືນິ້ວຕີນ ກ່ຽວຂ້ອງກັບການເຮັດວຽກຂອງເສັ້ນປະສາດຜິດປົກກະຕິ, ດັ່ງນັ້ນຫາກມີຄວາມຜິດປົກກະຕິຈົນເຖິງຂັ້ນເປັນໂລກເສັ້ນປະສາດສະໝອງຄູ່ທີ 7 ອັກເສບ, ກໍ່ອາດເປັນໂລກອຳພາດຊະນິດໜຶ່ງທີ່ເອີ້ນວ່າ ໂລກອຳພາດເບວ, ເຊິ່ງເປັນໂລກເສັ້ນປະສາດສະໝອງທີ່ພົບເລື້ອຍທີ່ສຸດໄດ້ເຊັ່ນກັນ.

ມຶນປາຍມືປາຍຕີນຫຼາຍຄືຊິໃດ ຈຶ່ງຄວນໄປພົບໝໍ?

ຫາກມີອາການມຶນທີ່ບໍລິເວນປາຍມືປາຍຕີນເລັກນ້ອຍຫຼາຍກວ່າ 2-3 ວັນ, ແລະ ບໍ່ມີທີທ່າວ່າຈະດີຂຶ້ນ, ໃຫ້ລອງປັບປ່ຽນພຶດຕິກຳເບິ່ງກ່ອນ. ອາດຈະອອກກຳລັງກາຍ, ປ່ຽນອິລິຍາບົດເລື້ອຍໆ ລະຫວ່າງວັນ, ຫຼື ປ່ຽນບ່ອນນອນ, ປ່ຽນໝອນ. ຫາກຍັງບໍ່ດີຂຶ້ນພາຍໃນໄລຍະເວລາບໍ່ເກີນ 1 ອາທິດ, ຄວນຮີບພົບໝໍກ່ອນມີອາການຫຼາຍຂຶ້ນ.

ຈະເຫັນໄດ້ວ່າອາການມຶນຕາມປາຍນິ້ວມືນິ້ວຕີນ, ຈະເລີ່ມພົບຫຼາຍຂຶ້ນໃນກຸ່ມຂອງຄົນຮຸ່ນເຮັດວຽກ, ຫຼື ແມ້ກະທັ້ງຄົນທີ່ເຮັດວຽກໃຊ້ຂໍ້ມືໜັກໆ ຢ່າງແມ່ເຮືອນ, ແມ່ຄົວ, ເນື່ອງມາຈາກການໃຊ້ຊີວິດທີ່ເຮັດວຽກໜັກ, ບໍ່ມີເວລາອອກກຳລັງກາຍ, ບໍ່ມີເວລາປ່ຽນອິລິຍາບົດລະຫວ່າງວັນ, ແລະ ການພັກຜ່ອນທີ່ບໍ່ພຽງພໍ ຫຼື ບໍ່ຖືກຕ້ອງ. ດັ່ງນັ້ນຫາກຮູ້ສຶກມີອາການຜິດປົກກະຕິເກີດຂຶ້ນ, ຄວນຮີບພົບໝໍເພື່ອການວິນິດໄສຢ່າງທັນທ່ວງທີກ່ອນຊ້າເກີນແກ້ເນາະ.

ສະແດງຄຳຄິດເຫັນ