ໂດນັລ ທຣັມປ໌ ປະທານາທິບໍດີສະຫະລັດ ເປີດຕົວແຜນຕິດຕັ້ງ “ໂດມຄຳ” ລະບົບປ້ອງກັນຂີປະນາວຸດແບບໃໝ່ ມູນຄ່າປະມານ 1750 ລ້ານໂດລາ ຄ້າຍຄືກັບໄອຣອນ ໂດມຂອງອິສຣາເອນ ເພື່ອປົກປ້ອງດິນແດນສະຫະລັດ ຈາກການໂຈມຕີດ້ວຍຂີປະນາວຸດ ທັງທາງບົກ, ທະເລ ແລະ ອາວະກາດ

 

ວັນທີ 20 ພຶດສະພາ 2025 ທ່ານໂດນັລ ທຣັມປ໌ ປະທານາທິບໍດີສະຫະລັດ ປະກາດເປີດຕົວໂຄງການ “ໂກລເດນ ໂດມ” (Golden Dome) ລະບົບປ້ອງກັນຂີປະນາວຸດແຫ່ງອະນາຄົດ ໂດຍລະບຸວ່າ ໂຄງການນີ້ໄດ້ຮັບແຮງບັນດານໃຈຈາກລະບົບ “ໂດມເຫຼັກ” (Iron Dome) ຂອງອິສຣາເອນ

 

ແຕ່ຈະມີຂະໜາດໃຫຍ່ກວ່າ ແລະ ສາມາດປ້ອງກັນໄພຂົ່ມຂູ່ທາງອາກາດໄດ້ຮອບດ້ານ ທັງຂີປະນາວຸດແບບຄວາມໄວເໜືອສຽງ, ຂີປະນາວຸດພິໄສໄກ ຕະຫຼອດຈົນລະບົບໂຈມຕີຈາກວົງໂຄຈອນອາວະກາດ (Fractional Orbital Bombardment Systems)

 

ຜູ້ນຳສະຫະລັດລະບຸວ່າໄດ້ມອບໝາຍໃຫ້ ພົນເອກໄມເຄິລ ເກັດໄລນ໌ ຮອງຜູ້ບັນຊາການກອງທັບອາວະກາດເປັນຜູ້ດູແລໂຄງການ ຫຼັງຈາກກອງທັບເຫັນດີກັບໂຄງການນີ້

 

ຊຶ່ງນອກຈາກຈະເປັນລະບົບປ້ອງກັນພາຍໃນປະເທດແລ້ວ, ປະເທດການາດາກໍ່ໄດ້ສະແດງຄວາມສົນໃຈເຂົ້າຮ່ວມໂຄງການ ໂດຍທ່ານບິລ ແບລ ອະດີດລັດຖະມົນຕີກະຊວງປ້ອງກັນປະເທດຂອງການາດາ ລະບຸວ່າ

 

ຖືເປັນຜົນປະໂຫຍດລະດັບຊາດຂອງການາດາທີ່ຈະມີສ່ວນຮ່ວມໃນໂຄງການໂດມຄຳຂອງສະຫະລັດ ໂດຍສະເພາະໃນພື້ນທີ່ອາກຕິກ ຊຶ່ງຖືເປັນຈຸດຍຸດທະສາດສຳຄັນໃນການເຝົ້າລະວັງໄພຂົ່ມຂູ່ຈາກພາກພື້ນອື່ນ

 

ທຣັມປ໌ລະບຸວ່າ ເບື້ອງຕົ້ນໂຄງການນີ້ຈະໃຊ້ເງິນປະມານ 25,000 ລ້ານໂດລາສະຫະລັດ  ຊຶ່ງຖືກບັນຈຸຢູ່ໃນຮ່າງງົບປະມານຊຸດໃໝ່ ເຖິງຢ່າງໃດກໍ່ຕາມ, ສຳນັກງານງົບປະມານລັດຖະສະພາສະຫະລັດ ປະເມີນວ່າ ເມື່ອລວມຄ່າໃຊ້ຈ່າຍດ້ານເຕັກໂນໂລຢີອາວະກາດ ແລະ ການດຳເນີນການໄລຍະຍາວ ອາດຕ້ອງໃຊ້ງົບສູງເຖິງ 542,000 ລ້ານໂດລາ ພາຍໃນໄລຍະເວລາ 20 ປີ

 

ກ່ອນໜ້ານີ້, ໜ່ວຍຂ່າວກອງດ້ານປ້ອງກັນປະເທດຂອງສະຫະລັດເປີດເຜີຍເອກະສານເຕືອນວ່າ ລັດເຊຍ ແລະ ຈີນ ກຳລັງພັດທະນາອາວຸດພິໄສໄກແບບໃໝ່ເພື່ອເຈາະຈຸດອ່ອນຂອງລະບົບປ້ອງກັນສະຫະລັດ

 

ເຮັດໃຫ້ຕ້ອງເລັ່ງສ້າງລະບົບທີ່ຕອບສະໜອງໄພຂົ່ມຂູ່ທີ່ຊັບຊ້ອນ ແລະ ວ່ອງໄວຂຶ້ນ ເຮັດໃຫ້ໂຄງການໂດມຄຳ ຖືກວາງໃຫ້ເປັນໜຶ່ງໃນໂຄງການຍຸດທະສາດສຳຄັນທີ່ສຸດຂອງລັດຖະບານທຣັມປ໌ໃນວາລະທີ 2

 

ໂດຍຕັ້ງເປົ້າໃຫ້ລະບົບນີ້ພ້ອມປະຕິບັດການພາຍໃນໄລຍະເວລາ 4 ປີທີ່ທຣັມປ໌ຍັງດຳລົງຕຳແໜ່ງປະທານາທິບໍດີ.

ສະແດງຄຳຄິດເຫັນ