“ເວສຕິ້ງເຮົາສ໌” (Westinghouse) ບໍລິສັດສ້າງໂຮງໄຟຟ້ານິວເຄລຍໃນສະຫະລັດ ໄດ້ລົງນາມໃນບັນທຶກຄວາມເຂົ້າໃຈຮ່ວມກັບ “ເປໂຕຣຫວຽດນາມ” (PetroVietnam) ບໍລິສັດພະລັງງານລາຍໃຫຍ່ທີ່ສຸດຂອງຫວຽດນາມ

ເພື່ອພັດທະນາ “ໂຮງໄຟຟ້ານິວເຄລຍ” ຕາມລາຍງານຂອງທາງການຮ່າໂນ້ຍເມື່ອວັນອັງຄານ (20 ພຶດສະພາ) ຂະນະທີ່ຫວຽດນາມພະຍາຍາມຫຼີກລ່ຽງການຖືກເກັບພາສີໃນອັດຕາສູງຈາກລັດຖະບານທຣັມປ໌

ຂໍ້ຕົກລົງດັ່ງກ່າວມຸ່ງເນັ້ນທີ່ຮູບແບບການລົງທຶນໃນໂຄງສ້າງພື້ນຖານດ້ານພະລັງງານ, ການຖ່າຍທອດເຕັກໂນໂລຢີ ແລະ ການຝຶກອົບຮົມຊັບພະຍາກອນມະນຸດ ຕາມທີ່ລະບຸໄວ້ໃນຂໍ້ຕົກລົງ

ທັງນີ້, ຮ່າໂນ້ຍ ແລະ ວໍຊິງຕັນກຳລັງຢູ່ໃນ “ຊ່ວງເຈລະຈາການຄ້າຮອບທີສອງ” ຫຼັງຈາກປະທານາທິບໍດີໂດນັລ ທຣັມປ໌ ຂອງສະຫະລັດຂູ່ຈະຮຽກເກັບພາສີສິນຄ້ານຳເຂົ້າຈາກຫວຽດນາມໃນອັດຕາ 46%

ຫວຽດນາມມີດຸນການຄ້າເກີນດຸນກັບສະຫະລັດ ຫຼາຍເປັນ “ອັນດັບສາມ” ຂອງໂລກ ຮອງຈາກຈີນ ແລະ ເມັກຊິໂກ ແລະ ກຳລັງເລັ່ງຫາທາງແກ້ໄຂຄວາມບໍ່ສົມດຸນທາງການຄ້າ ເພື່ອຫຼີກລ່ຽງການຖືກເກັບພາສີຕາມທີ່ຖືກຂູ່

ເໜືອງ ຮ່ອງ ດຽນ ລັດຖະມົນຕີກະຊວງອຸດສາຫະກຳ ແລະ ການຄ້າຂອງຫວຽດນາມກ່າວລະຫວ່າງການປະຊຸມກັບຜູ້ບໍລິຫານຂອງເວສຕິ້ງເຮົາສ໌ວ່າ ຄວາມຮ່ວມມືດ້ານການພັດທະນາພະລັງງານຈະເປັນພະລັງຂັບເຄື່ອນທີ່ສຳຄັນ ຊຶ່ງມີສ່ວນຊ່ວຍ ‘ປັບສົມດຸນການຄ້າ’ ລະຫວ່າງຫວຽດນາມ ແລະ ສະຫະລັດ”

ກະຊວງອ້າງຄຳກ່າວຂອງມາກາເຣັດ ໂຄເຊັນຕິໂນ ຮອງປະທານບໍລິຫານຝ່າຍກິດຈະການອົງກອນຂອງບໍລິສັດເວສຕິ້ງເຮົາສ໌ວ່າ ບໍລິສັດໃຫ້ການສະໜັບສະໜູນຢ່າງແຂງຂັນຕໍ່ແຜນຂອງຫວຽດນາມ ພ້ອມທັງເນັ້ນຍ້ຳເຖິງຄວາມສຳຄັນຂອງຄວາມຮ່ວມມືດ້ານພະລັງງານໃນໄລຍະຍາວ

ຄະນະຜູ້ແທນຂອງຫວຽດນາມຍັງໄດ້ເຂົ້າສູ່ການເຈລະຈາການຄ້າຮອບທີສອງເມື່ອວັນອັງຄານດ້ວຍ ຕາມລາຍງານຂອງກະຊວງ ໂດຍທັງສອງຝ່າຍໃຊ້ເວລາໃນການຫາລືເຖິງແນວທາງໂດຍລວມ ໃນການແກ້ໄຂປະເດັນພື້ນຖານທີ່ທັງສອງຝ່າຍໃຫ້ຄວາມສົນໃຈຮ່ວມກັນ

ທັງນີ້ ຫວຽດນາມຕ້ອງການຟື້ນຟູແຜນພັດທະນາໂຮງໄຟຟ້ານິວເຄລຍຂຶ້ນໃໝ່ ເພື່ອຮອງຮັບຄວາມຕ້ອງການພະລັງງານທີ່ເຕີບໂຕຢ່າງວ່ອງໄວ ແລະ ໄດ້ລົງນາມໃນຂໍ້ຕົກລົງກັບລັດເຊຍເມື່ອເດືອນມັງກອນ ຊຶ່ງກ່ຽວຂ້ອງກັບໂຄງການໂຮງໄຟຟ້ານິວເຄລຍ Ninh Thuan

ໂຄງການດັ່ງກ່າວຊຶ່ງປະກອບດ້ວຍໂຮງໄຟຟ້າ 2 ແຫ່ງໃນແຂວງ Ninh Thuan ຕອນກາງ ມີກຳລັງການຜະລິດລວມ 4,000 ເມກະວັດ ເດີມທີມີແຜນຈະພັດທະນາດ້ວຍຄວາມຮ່ວມມືຈາກບໍລິສັດ Rosatom ຂອງລັດເຊຍ ແລະ ກຸ່ມບໍລິສັດຍີ່ປຸ່ນ JINED ແຕ່ແຜນການຖືກຍົກເລີກໄປເມື່ອປີ 2016

ສະແດງຄຳຄິດເຫັນ