ພົບແບັກທີເຣັຍພັນໃໝ່ເທິງສະຖານີອະວະກາດ “ທຽນກົງ” ຂອງຈີນ

ຈີນພົບແບັກທີເຣຍສາຍພັນທຸ໌ໃໝ່ທີ່ບໍ່ເຄີຍພົບເທິງໂລກມາກ່ອນ ຢູ່ໃນສະຖານີອະວະກາດທຽນກົງ ແລະເບິ່ງຄືວ່າມັນຈະສາມາດປັບຕົວກັບສະຖານະການຢູ່ນັ້ນໄດ້ດີ

 

 

ສໍານັກຂ່າວ ຊີຊີທີວີ ສື່ໂທລະພາບແຫ່ງຊາດຂອງຈີນລາຍງານໃນວັນທີ່ 21ພຶດສະພາ 2025 ວ່າ ນັກບີນອະວະກາດຈີນພົບແບັກທີເຣຍທີ່ມີລັກສະນະເປັນທ່ອນຂະໜາດນ້ອຍ ຊຶ່ງບໍ່ເຄີຍເຈີທີ່ໃດເທິງໂລກມາກ່ອນ ຢູ່ພາຍໃນຫ້ອງຄວບຄຸມຂອງສະຖານີອະວະກາດທຽນກົງ ແລະ ມັນອາໄສຢູ່ໃນສະພາວະໄຮ້ນ້ຳໜັກ ໂດຍເຈົ້າໜ້າທີ່ຕັ້ງຊື່ໃຫ້ມັນວ່າ “ນີອັລລີຍາ ທຽນກົງເຈນຊິສ” (Niallia tiangongensis)

 

ນັກບີນອະວະກາດເກັບຕົວຢ່າງແບັກທີເຣຍດັ່ງກ່າວຈາກສະຖານີອະວະກາດທຽນກົງເມື່ອເດືອນພຶດສະພາ 2023 ແລ້ວສົ່ງມັນກັບໂລກໃນສະພາບຖືກແຊ່ແຂງເພື່ອສຶກສາ ໂດຍມີເປົ້າໝາຍເພື່ອສຶກສາພຶດຕິກໍາຂອງສິ່ງມີຊີວິດຂະໜາດນ້ອຍຊະນິດນີ້ ຊຶ່ງຖືກພົບໃນສະພາບແວດລ້ອມແບບປິດຢ່າງສິ້ນເຊີງ

 

ຜົນການສຶກສາຊຶ່ງເຜີຍແຜ່ໃນວາລະສານ Systematic and Evolutionary Microbiology ບັນຍາຍວ່າ ການວິເຄາະຕົວຢ່າງດັ່ງກ່າວສະແດງໃຫ້ເຫັນວ່າ ແບັກທີເຣຍຕົວນີ້ເປັນສາຍພັນທຸ໌ໃໝ່ຂອງແບັກທີເຣຍໃນຕະກູນ (genus) “ນີອັລລີຍາ” ແລະ ຜົນການກວດສອບລໍາດັບຍີນພົບວ່າຍາດທີ່ໃກ້ຊິດທີ່ສຸດຂອງມັນແມ່ນແບັກທີເຣຍ “ນີອັລລີຍາ ເຊີຄູລັນສ໌” ຊຶ່ງມີຢູ່ເທິງໂລກ ຢ່າງໃດກໍ່ຕາມ ສາຍພັນທຸ໌ທຽນກົງມີຍີນຕ່າງກັນຫຼາຍ

 

ນີອັລລີຍາທຽນກົງເຈນຊິສ ມີຄວາມແຕກຕ່າງທາງໂຄງສ້າງ ແລະ ການເຮັດວຽກ ໝາຍຄວາມວ່າມັນປັບຕົວຢ່າງດີເພື່ອອາໄສຢູ່ໃນສະຖານີອະວະກາດ ມັນມີຄວາມສາມາດໃນການຍ່ອຍສະລາຍເຈລາຕິນໃນຮູບແບບທີ່ບໍ່ເໝືອນໃຜ ເຮັດໃຫ້ມັນສາມາດກິນໂປຣທີນຊະນິດນີ້ເພື່ອເອົາຊີວິດລອດໃນສະພາບແວດລ້ອມທີ່ຂາດສານອາຫານຢ່າງເທິງສະຖານີອະວະກາດໄດ້

 

ນອກຈາກນັ້ນ ທຽນກົງເຈນຊິສຍັງສາມາດສ້າງໄບໂອຟິລມ໌ປ້ອງກັນ ມີປະຕິກິລິຍາຕອບສະໜອງຕໍ່ຄວາມເຄັ່ງຄັດອອກຊິເດຊັນ (Oxidative Stress) ຊ່ອມແຊມຄວາມເສຍຫາຍຈາກລັງສີ ແລະ ສ້າງເອນໂດສປໍ ຊຶ່ງຊ່ວຍໃຫ້ມັນມີຊີວິດລອດໃນອະວະກາດ

 

ຕອນນີ້ຍັງບໍ່ແນ່ຊັດວ່າ ແບັກທີເຣຍສາຍພັນທຸ໌ໃໝ່ນີ້ວິວັດທະນາການໃນອະວະກາດ ຫຼື ມີຢູ່ໃນໂລກຢູ່ແລ້ວແຕ່ບໍ່ເຄີຍຖືກຄົ້ນພົບມາກ່ອນ ໂດຍຈົນເຖິງຕອນນີ້ມະນຸດຄົ້ນພົບແບັກທີເຣຍແລ້ວຫຼາຍໝື່ນຊະນິດ ແຕ່ເຊື່ອກັນວ່າ ຍັງມີແບັກທີເຣຍເທິງໂລກທີ່ຍັງບໍ່ຖືກຄົ້ນພົບອີກນັບພັນລ້ານຊະນິດ

 

ນັກວິທະຍາສາດເຊື່ອວ່າ ການຄົ້ນພົບແບັກທີເຣຍ ນີອັລລີຍາ ທຽນກົງເຈນຊິສ ຈະເຮັດໃຫ້ພວກເຂົາເຂົ້າໃຈຄວາມບໍ່ແນ່ນອນຂອງສິ່ງມີຊີວິດຂະໜາດນ້ອຍທີ່ນັກບິນອະວະກາດໃນອະນາຄົດຈະຕ້ອງພົບເຈີຫຼາຍຂຶ້ນ ແລະ ຊ່ວຍອອກແບບມາດຕະການດ້ານສຸຂອະນາໄມສຳລັບກິດລະຍະຍາວ

 

ແຕ່ຕອນນີ້ຍັງໄວເກີນໄປທີ່ຈະບອກວ່າ ແບັກທີເຣຍສາຍພັນໃໝ່ຕົວນີ້ມີອັນຕະລາຍຕໍ່ນັກບິນອະວະກາດເທິງສະຖານີທຽນກົງ ຫຼື ບໍ່ ແຕ່ພີ່ນ້ອງຂອງມັນເຊັ່ນ: ນີອັລລີຍາ ເຊີຄູລັນສ໌ ສາມາດເຮັດໃຫ້ເກີດການຕິດເຊື້ອໃນກະແສໂລຫິດໄດ້ ໂດຍສະເພາະໃນຄົນທີ່ພູມຄຸ້ມກັນບົກພ່ອງ

ສະແດງຄຳຄິດເຫັນ