ເກີດເຫດດິນເຈື່ອນຄັ້ງໃຫຍ່ໃນແຂວງກຸ້ຍໂຈວທາງຕະວັນຕົກສຽງໃຕ້ຂອງຈີນ ຫຼັງຝົນຕົກໜັກຕໍ່ເນື່ອງ ສົ່ງຜົນໃຫ້ມີຜູ້ເສຍຊີວິດແລ້ວຢ່າງໜ້ອຍ 2 ຄົນ ແລະ ຍັງສູນຫາຍອີກ 19 ຄົນ ຂະນະເຈົ້າໜ້າທີ່ເລັ່ງລະດົມກຳລັງຊ່ວຍເຫຼືອຢ່າງຕໍ່ເນື່ອງ

ສຳນັກຂ່າວ CCTV ຂອງຈີນລາຍງານວ່າ ຜູ້ເສຍຊີວິດ 2 ສົບຖືກພົບໃນເມືອງຈາງຈື້ ສ່ວນຜູ້ສູນຫາຍ 19 ຄົນມາຈາກ 8 ຄອບຄົວໃນໝູ່ບ້ານຊິງຢາງທີ່ຢູ່ເຂດໃກ້ຄຽງ ຊຶ່ງຖືກດິນເຈື່ອນທັບເຮືອນຊານຢ່າງຮຸນແຮງ

ທາງການຈີນໄດ້ປະກາດເຕືອນໄພດິນເຈື່ອນ ແລະ ໄພພິບັດທາງທະລະນີວິທະຍາໃນພື້ນທີ່ອ້ອມຮອບ ພ້ອມທັ້ງຍົກລະດັບການຕອບສະໜອງເຫດສຸກເສີນເປັນລະດັບ 3 ຈາກທັງໝົດ 4 ລະດັບ ໃນແຂວງກຸ້ຍໂຈວ ແລະ ແຂວງໃກ້ຄຽງ ໄດ້ແກ່ ຮູຫນານ ແລະ ຈຽງຊີ

ຂະນະນີ້ມີເຈົ້າໜ້າທີ່ກູ້ໄພກວ່າ 400 ຄົນ ລວມທັງທະຫານ ແລະ ນັກດັບເພີງ ຖືກສົ່ງເຂົ້າໄປໃນພື້ນທີ່ເພື່ອຄົ້ນຫາ ແລະ ຊ່ວຍເຫຼືອຜູ້ປະສົບໄພຢ່າງເລັ່ງດ່ວນ

ໃນຊ່ວງອາທິດທີ່ຜ່ານມາ ແຂວງກວາງຕຸ້ງ ແລະ ເຂດປົກຄອງຕົນເອງກວ່າງຊີ ທາງຕອນໃຕ້ຂອງຈີນກໍປະເຊີນກັບຝົນຕົກໜັກເຊັ່ນກັນ

ໂດຍມີລາຍງານຜູ້ເສຍຊີວິດ 7 ສົບ ແລະ ຜູ້ສູນຫາຍອີກຈຳນວນຫນຶ່ງ ທາງການໄດ້ອອກປະກາດເຕືອນຝົນຕົກໜັກ ນ້ຳປ່າໄຫຼຫຼາກ ແລະ ໄພພິບັດທົ່ວພື້ນທີ່ພາກໃຕ້

ຂໍ້ມູນຈາກກົມອຸຕຸນິຍົມວິທະຍາຈີນເຜີຍວ່າ ປີ 2024 ເປັນປີທີ່ອຸນຫະພູມເຄີ່ງຂອງປະເທດສູງທີ່ສຸດນັບຕັ້ງແຕ່ເລີ່ມບັນທຶກສະຖິຕິເມື່ອກວ່າ 60 ປີກ່ອນ ແລະ ນັບເປັນປີທີ່ 2 ຕິດຕໍ່ກັນທີ່ເກີດສະພາບອາກາດສຸດຂັ້ວຈົນທຳລາຍສະຖິຕິ

ໂດຍຈີນນັບເປັນຫນຶ່ງໃນປະເທດທີ່ປະເຊີນຄວາມສ່ຽງຈາກຜົນກະທົບຂອງການປ່ຽນແປງສະພາບພູມິອາກາດຢ່າງຮຸນແຮງ ເນື່ອງຈາກມີປະຊາກອນຈຳນວນຫຼາຍ ແລະ ມີພື້ນທີ່ພູເຂົາສ່ຽງຕໍ່ດິນເຈື່ອນຈຳນວນຫຼາຍ.

ສະແດງຄຳຄິດເຫັນ