ລັດຖະບານສະຫະລັດ ພາຍໃຕ້ປະທານາທິບໍດີໂດນາເດີ ທຣຳ ຖອນສິດຂອງມະຫາວິທະຍາໄລຮາວາດໃນການຮັບນັກສຶກສາຕ່າງປະເທດຢ່າງເປັນທາງການ

 

ໂດຍກະຊວງຄວາມໝັ້ນຄົງແຫ່ງມາຕຸພູມິ (DHS) ລະບຸວ່າ “ຮາວາດຈະບໍ່ສາມາດຮັບນັກສຶກສາຕ່າງປະເທດລາຍໃໝ່ໄດ້ອີກ ແລະ ນັກສຶກສາຕ່າງປະເທດທີ່ມີຢູ່ຕ້ອງຫາທາງໂອນຍ້າຍອອກ ຫຼື ບໍ່ກໍສູນເສຍສະຖານະທາງກົດໝາຍໃນສະຫະລັດ”

 

ນະໂຍບາຍນີ້ມາຈາກຄຳສັ່ງຂອງ ຄິຣດຕີ ໂນເອັມ ລັດຖະມົນຕີວ່າການກະຊວງຄວາມໝັ້ນຄົງແຫ່ງມາຕຸພູມິ ຊຶ່ງກ່າວຫາຮາວາດວ່າບໍ່ຍອມສົ່ງມອບບັນທຶກພຶດຕິກຳຂອງນັກສຶກສາຕ່າງປະເທດທີ່ລັດຖະບານຮ້ອງຂໍເມື່ອເດືອນທີ່ແລ້ວ

 

ໂດຍໃຫ້ເຫດຜົນວ່າ ຮາວາດ “ມີບັນຍາກາດທີ່ບໍ່ປອດໄພສຳລັບນັກຮຽນຊາວຢິວ ສະໜັບສະໜູນແນວຄິດນິຍົມຮາມາດ ແລະ ຍັງຄົງໃຊ້ນະໂຍບາຍຄວາມຫຼາກຫຼາຍທີ່ຫຍຽດເຊື້ອຊາດ”

 

ການຖອນສິດນີ້ໝາຍເຖິງການຢຸດຕິການຮັບນັກຮຽນຕ່າງປະເທດ ລວມທັງການຄຸ້ມຄອງທາງກົດໝາຍຜ່ານໂຄງການ SEVP ຫຼື ໂຄງການນັກສຶກສາຜູ້ຍ້ຽມຊົມ ແລະ ໂຄງການແລກປ່ຽນ (Student and Exchange Visitor Program)

 

ຊຶ່ງອາດກະທົບເຖິງນັກສຶກສາຕ່າງຊາດປະມານ 27.2% ຂອງນັກສຶກສາຮາວາດທັງໝົດໃນປີການສຶກສາ 2024–2025 ຫຼື ກວ່າ 6,700 ຄົນ

 

ກ່ອນໜ້ານີ້ ຮາວາດ ແລະ ລັດຖະບານທຣຳມີຂໍ້ພິພາດເຮື້ອຣັງເລື່ອງນະໂຍບາຍຄວາມຫຼາກຫຼາຍ ການຄັດເລືອກບຸກຄະລາກອນ ການສະແດງອອກທາງການເມືອງຂອງນັກຮຽນກ່ຽວກັບສົງຄາມອິສຣາເອນ–ຮາມາດ

 

ໂດຍລັດຖະບານໄດ້ຮຽກຮ້ອງໃຫ້ມະຫາວິທະຍາໄລປັບປ່ຽນນະໂຍບາຍດ້ານ DEI ຫຼື ນະໂຍບາຍຄວາມແຕກຕ່າງ ຄວາມເທົ່າທຽມ ແລະ ຄວາມມີສ່ວນຮ່ວມ (Diversity, Equity, Inclusion)

 

 

ດ້ານເຈສັນ ນິວຕັນ ໂຄສົກມະຫາວິທະຍາໄລອອກຖະແຫຼງການຕອບໂຕ້ວ່າ ນີ້ເປັນການກະທຳເຊີງຕອບໂຕ້ທີ່ຜິດກົດໝາຍ ແລະ ຈະກໍ່ໃຫ້ເກີດຄວາມເສຍຫາຍຢ່າງຮຸນແຮງຕໍ່ຊຸມຊົນຮາວາດ ແລະ ປະເທດຊາດ

 

ເຂົາຢ້ຳວ່າ ຮາວາດຈະເຮັດທຸກວິຖີທາງເພື່ອປົກປ້ອງສະຖານະຂອງນັກສຶກສາຕ່າງຊາດ ແລະກຳລັງເລັ່ງໃຫ້ຄຳແນະນຳແລະຄວາມຊ່ວຍເຫຼືອແກ່ຜູ້ທີ່ໄດ້ຮັບຜົນກະທົບ

 

ມະຫາວິທະຍາໄລຍັງກຽມດຳເນີນການທາງກົດໝາຍເພື່ອຍັບຍັ້ງການຕັດເງິນທຶນສະໜັບສະໜູນກວ່າ 2,200 ລ້ານໂດລາ  ແລະ ຍັງຕ້ອງເຈີກັບຄວາມເປັນໄປໄດ້ທີ່ກົມພາສີອາກອນສະຫະລັດອາດ ຖອນສະຖານະການບໍ່ເສຍອາກອນຂອງມະຫາວິທະຍາໄລ

 

ຂ່າວນີ້ແຜ່ກະຈາຍໄປໃນກຸ່ມນັກສຶກສານານາຊາດຢ່າງໄວ ກໍ່ໃຫ້ເກີດຄວາມຢ້ານກົວ ແລະ ຄວາມຫງຸດຫງິດໃນໝູ່ນັກສຶກສາຫຼາຍພັນຄົນທີ່ອະນາຄົດຂອງພວກເຂົາຕົກຢູ່ໃນຄວາມບໍ່ແນ່ນອນຢ່າງກະທັນຫັນ

 

 

ເຈົ້າໜ້າທີ່ຂອງມະຫາວິທະຍາໄລຮາວາດ ແລະ ທຣຳມີເລື່ອງຂັດແຍ້ງກັນມານານຫຼາຍເດືອນ ໂດຍຝ່າຍບໍລິຫານຮຽກຮ້ອງໃຫ້ມະຫາວິທະຍາໄລເຮັດການປ່ຽນແປງໂປຣແກຣມນະໂຍບາຍ ການຈ້າງງານ ແລະ ການຮັບເຂົ້າຮຽນໃນມະຫາວິທະຍາໄລ

 

ເພື່ອຂົບລ້າງລັດທິຕໍ່ຕ້ານຊາວຢິວໃນມະຫາວິທະຍາໄລ ແລະ ລົບລ້າງສິ່ງທີ່ເອີ້ນວ່າ “ແນວທາງ ‘ຄວາມຫຼາກຫຼາຍ ຄວາມເທົ່າທຽມ ແລະ ການມີສ່ວນຮ່ວມ’ ທີ່ຫຍຽດຊື້ອຊາດ” ຝ່າຍບໍລິຫານໄດ້ເນັ້ນໄປທີ່ນັກສຶກສາ ແລະ ເຈົ້າໜ້າທີ່ຕ່າງຊາດທີ່ເຊື່ອວ່າເຂົ້າຮ່ວມການປະທ້ວງໃນມະຫາວິທະຍາໄລກ່ຽວກັບສົງຄາມອິສຣາເອນ-ຮາມາດ

 

ແຕ່ຜູ້ນຳຂອງມະຫາວິທະຍາໄລໂຕ້ແຍ້ງວ່າຄຳຮ້ອງຂໍຫຼາຍປະການ ລວມທັງການກວດມຸມມອງຂອງນັກສຶກສາ ແລະ ເຈົ້າໜ້າທີ່ນັ້ນ ເກີນເລີຍບົດບາດຂອງລັດຖະບານກາງໄປໄກ ແລະ ອາດລະເມີດສິດມະນຸດຕາມລັດຖະທຳມະນູນຂອງມະຫາວິທະຍາໄລຮາວາດ

 

ໃນເດືອນເມສາທີ່ຜ່ານມາ ກະຊວງຄວາມໝັ້ນຄົງແຫ່ງມາຕຸພູມິຊີ້ວ່າ ຈະຖອນການເຂົ້າເຖິງໂປຣແກຣມວີຊ່ານັກສຶກສາຂອງມະຫາວິທະຍາໄລ ຫາກບໍ່ປະຕິບັດຕາມຄຳຂໍໃຫ້ເປີດເຜີຍຂໍ້ມູນຢ່າງລະອຽດຈາກຝ່າຍບໍລິຫານທີ່ກ່ຽວຂ້ອງກັບນັກສຶກສາຕ່າງຊາດ

 

ສະແດງຄຳຄິດເຫັນ