ເຄື່ອງບິນລຳນ້ອຍຕົກໃນເມືອງຊານດິເອໂກ ເຮັດໃຫ້ເກີດໄຟໄໝ້ບ້ານເຮືອນ ແລະ ລົດຍົນຈຳນວນຫຼາຍ ເບື້ອງຕົ້ນມີຜູ້ເສຍຊີວິດແລ້ວ 2 ສົບ ປະຊາຊົນນັບຮ້ອຍຕ້ອງອົບພະຍົບ

ສຳນັກຂ່າວຕ່າງປະເທດລາຍງານວ່າ ເກີດເຫດເຄື່ອງບິນນ້ອຍຮຸ່ນ ເຊສນາ 550 ຊຶ່ງບັນທຸກຜູ້ໂດຍສານໄດ້ 6-8 ຄົນ ຕົກໃນຍ່ານເມີຟີ ແຄນຢອນ ຕອນກາງຂອງເມືອງຊານດິເອໂກ ລັດແຄລິຟໍເນຍ ເມື່ອເວລາປະມານ 3.45 ນ. ວັນພະຫັດທີ່ 22 ພຶດສະພາ 2025 ຕາມເວລາທ້ອງຖິ່ນ

ຂ່າວລະບຸວ່າ ເຫດການນີ້ເກີດຂຶ້ນທ່າມກາງສະພາວະໝອກລົງຈັດ ແຕ່ຍັງບໍ່ຊັດເຈນວ່ານີ້ເປັນສາເຫດທີ່ເຮັດໃຫ້ເຄື່ອງບິນຕົກ ຫຼື ບໍ່

ແດນ ເອັດດີ ຜູ້ຊ່ວຍຫົວໜ້າສຳນັກງານດັບເພີງລະບຸໃນງານຖແຫຼງຂ່າວຫຼັງເກີດເຫດວ່າ ເຊື້ອເພີງເຄື່ອງບິນກະຈາຍໄປທົ່ວບໍລິເວນ ມີບ້ານເຮືອນຖືກໄຟໄໝ້ຢ່າງໜ້ອຍ 15 ຫຼັງ ໂດຍຫຼາຍຫຼັງຖືກເຄື່ອງບິນຕົກໃສ່ໂດຍກົງ ແລະ ເປົ້າໝາຍຫຼັກຂອງເຈົ້າໜ້າທີ່ຄືການຄົ້ນຫາໃນບ້ານທຸກຫຼັງເພື່ອພາປະຊາຊົນໄປຍັງທີ່ປອດໄພ

ພາບຈາກທີ່ເກີດເຫດສະແດງໃຫ້ເຫັນວ່າ ມີລົດຍົນຫຼາຍຄັນໄດ້ຮັບຄວາມເສຍຫາຍຈາກໄຟໄໝ້ ຂະນະທີ່ເສດຊາກປັກຫັກພັງກະຈັດກະຈາຍໄປທົ່ວ

ປະມານ 1 ຊົ່ວໂມງຕໍ່ມາ ເຈົ້າໜ້າທີ່ເມືອງຊານດິເອໂກຈັດງານຖະແຫຼງຂ່າວອີກຄັ້ງ ເລີ່ມຈາກ ທ່ານ ໂຣເບີດ ໂລແກນ ຫົວໜ້າສຳນັກງານດັບເພີງຊານດິເອໂກ ຢືນຢັນວ່າເຫດການນີ້ຂຶ້ນໃນເວລາ 3.45 ນ.ຕາມເວລາທ້ອງຖິ່ນ ແລະ ວ່າເຈົ້າໜ້າທີ່ພົບລົດຍົນ ແລະ ບ້ານຫຼາຍຫຼັງຖືກໄຟໄໝ້ ໃນຕອນທີ່ພວກເຂົາໄປເຖິງທີ່ເກີດເຫດ

ຕໍ່ມາທ່ານໂລແກນໃຫ້ທ່ານ ແດນ ເອັດດີ ຖະແຫຼງຂ່າວຕໍ່ ໂດຍເຂົາລະບຸວ່າມີລົດຍົນຄັນຫນຶ່ງທີ່ໄຟຍັງບໍ່ຍອມດັບ ແຕ່ເພີງໄໝ້ຈຸດອື່ນໆ ຖືກເຈົ້າໜ້າທີ່ດັບໄດ້ໝົດແລ້ວ

ທ່ານເອັດດີບອກອີກວ່າ ຕອນນີ້ເຈົ້າໜ້າທີ່ຫຼາຍຄົນຍັງຄົງຢູ່ໃນທີ່ເກີດເຫດ ເພື່ອດຳເນີນການສືບສວນຮ່ວມກັບສຳນັກງານການບິນກາງ (FAA) ກ່ອນທີ່ ທ່ານ ສກອດຕ໌ ວາຫ໌ລ ຜູ້ກຳກັບການຕຳຫຼວດເມືອງຊານດິເອໂກ ຈະເປີດເຜີຍວ່າມີປະຊາຊົນຖືກອົບພະຍົບອອກຈາກບ້ານເກືອບ 100 ຄົນ

ເມື່ອນັກຂ່າວຖາມວ່າມີຜູ້ບາດເຈັບ ຫຼື ເສຍຊີວິດໃນເຫດການນີ້ຫຼືບໍ່ ທ່ານເອັດດີກ່າວວ່າ ເຈົ້າໜ້າທີ່ກຳລັງຢູ່ລະຫວ່າງການຄົ້ນຫາ ແຕ່ເຊື່ອວ່າມີຜູ້ເສຍຊີວິດຫຼາຍກວ່າ 1 ສົບ ແລະ ທັງໝົດເປັນຜູ້ໂດຍສານເທິງເຄື່ອງບິນທີ່ປະສົບເຫດ ແລະ ບໍ່ມີໃຜໃນບ້ານທີ່ຖືກເຄື່ອງບິນຕຳ ຫຼື ຖືກໄຟໄໝ້ໄດ້ຮັບບາດເຈັບສາຫັດ

ເອັດດີເສີມວ່າ ເຄື່ອງບິນທີ່ປະສົບເຫດຊຶ່ງຄາດວ່າກຳລັງເດີນທາງໄປຍັງສະໜາມບິນມອນໂກເມຣີ ຟີລ ຊຶ່ງຢູ່ໃກ້ຄຽງ ເປັນເຄື່ອງບິນເອກຊົນທີ່ລົງທະບຽນໃນເຂດມິດເວສ ແລະ ພວກເຂົາບໍ່ມີຂໍ້ມູນວ່າມີການຕິດຕໍ່ສື່ສານໃດໆ ຈາກນັກບິນໃນຕອນເກີດເຫດ

“ເປັນເລື່ອງສຳຄັນສຳລັບເຮົາໃນການຊອກວ່າມີຄົນຢູ່ເທິງເຄື່ອງບິນລຳນີ້ເທົ່າໃດ” ທ່ານເອັດດີກ່າວ ແລະ ຢືນຢັນວ່າ ບໍ່ມີເຫດໄຟດັບເກີດຂຶ້ນໃນເຂດທີ່ເກີດເຫດ

ສະແດງຄຳຄິດເຫັນ