ດາວໂຈນຟິວເຈີພຸ່ງທະຍານກວ່າ 300 ຈຸດ ຮັບຂ່າວໂດນັລ ທຣຳ ເລື່ອນແຜນຈັດເກັບພາສີອາກອນ 50% ກັບສະຫະພາບຢູໂຣບຈາກ 1 ມິຖຸນາ ເປັນ 9 ກໍລະກົດ ຫລັງຫາລືກັບຜູ້ນຳ EC

 

ດາວໂຈນສ໌ຟິວເຈີພຸ່ງ ຮັບຂ່າວດີພາສີສະຫະລັດ-ອີຢູເລື່ອນບັງຄັບໃຊ້

 

ດັດຊະນີດາວໂຈນສ໌ຟິວເຈີພຸ່ງຂຶ້ນກວ່າ 300 ຈຸດໃນຊ່ວງເຊົ້າວັນຈັນທີ 26 ພຶດສະພາ 2025 ຫລັງຈາກປະທານາທິບໍດີໂດນັລ ທຣຳ ແຫ່ງສະຫະລັດ ປະກາດເລື່ອນແຜນການເກັບພາສີອາກອນໃນອັດຕາ 50% ຕໍ່ສິນຄ້າຈາກສະຫະພາບຢູໂຣບ (EU) ອອກໄປເປັນວັນທີ 9 ກໍລະກົດ ແທນກຳນົດເດີມຄື 1 ມິຖຸນາ

 

ຂໍ້ມູນຈາກຕະຫຼາດ ເວລາ 06.52 ນ. ຕາມເວລາລາວ ລະບຸວ່າດັດຊະນີດາວໂຈນຟິວເຈີປັບເພີ່ມຂຶ້ນ 327 ຈຸດ ຫຼື ຄິດເປັນ +0.78% ມາຢູ່ທີ່ລະດັບ 42,001 ຈຸດ ສະທ້ອນຄວາມເຊື່ອໝັ້ນຂອງນັກລົງທຶນໃນທ່າທີຜ່ອນຄາຍຂອງສະຫະລັດຕໍ່ຂໍ້ພິພາດທາງການຄ້າ

 

ໂທລະສັບການທູດຈາກຢູໂຣບປ່ຽນທ່າທີສະຫະລັດ

 

ຜູ້ນຳສະຫະລັດເປີດເຜີຍຜ່ານແພລດຟອມທຣູທ ໂຊເຊຍລ (Truth Social) ວ່າໄດ້ຮັບການຕິດຕໍ່ຈາກນາງເອີຊູລາ ຟອນ ເດີ ເລເຢນ ປະທານຄະນະກຳມະການຢູໂຣບ ຊຶ່ງຮ້ອງຂໍໃຫ້ເລື່ອນເສັ້ນຕາຍການເກັບພາສີດັ່ງກ່າວ ແລະ ທ່ານໄດ້ຕອບຮັບຄຳຂໍດັ່ງກ່າວ

 

“ຂ້ອຍໄດ້ຮັບໂທລະສັບຈາກເອີຊູລາ ຟອນ ເດີ ເລເຢນ ຊຶ່ງຂໍໃຫ້ຂະຫຍາຍເສັ້ນຕາຍພາສີ 50% ທີ່ຈະມີຜົນວັນທີ 1 ມິຖຸນາ ຂ້ອຍຈຶ່ງຕົກລົງເລື່ອນເປັນວັນທີ 9 ກໍລະກົດ ແລະ ຮູ້ສຶກເປັນກຽດທີ່ໄດ້ເຮັດເຊັ່ນນັ້ນ” ທຣຳລະບຸ

 

ດ້ານຟອນ ເດີ ເລເຢນ ໂພສຕ໌ເທິງແພລດຟອມເອັກສ໌ (X) ວ່າການຫາລືກັບທຣຳເປັນໄປດ້ວຍດີ ແລະ ສະຫະພາບຢູໂຣບຕ້ອງການເວລາຈົນເຖິງວັນທີ 9 ກໍລະກົດ ເພື່ອບັນລຸຂໍ້ຕົກລົງທີ່ເໝາະສົມ ພ້ອມຢ້ຳຄວາມສຳຄັນຂອງຄວາມສຳພັນທາງການຄ້າລະຫວ່າງຢູໂຣບກັບສະຫະລັດ

 

ຈາກ 20% ສູ່ 50% ຈຸດປ່ຽນຈາກການເຈລະຈາບໍ່ມີຄວາມຄືບໜ້າ

 

ມາດຕະການພາສີອາກອນດັ່ງກ່າວຖືເປັນສ່ວນໜຶ່ງຂອງນະໂຍບາຍຕອບໂຕ້ທາງການຄ້າຂອງປະທານາທິບໍດີທຣຳ ຫຼື “Reciprocal Tariffs” ທີ່ໃຊ້ກັບຫຼາຍປະເທດ ກ່ອນໜ້ານີ້ສະຫະລັດເຄີຍປະກາດຈັດເກັບພາສີກັບ EU ໃນອັດຕາ 20% ກ່ອນຈະຜ່ອນຜັນເຫຼືອ 10% ຊົ່ວຄາວເປັນເວລາ 90 ວັນ

 

ແນວໃດກໍຕາມ ເມື່ອວັນທີ 23 ພຶດສະພາ ທີ່ຜ່ານມາ ທຣຳປະກາດວ່າຈະເອີ້ນເກັບພາສີໃນອັດຕາ 50% ຕັ້ງແຕ່ວັນທີ 1 ມິຖຸນາ ເນື່ອງຈາກການເຈລະຈາການຄ້າຍັງບໍ່ບັນລຸຜົນ ທ່າທີແຂງກ້າວດັ່ງກ່າວສ້າງຄວາມກັງວົນໃນຕະຫຼາດການເງິນກ່ອນທີ່ຂ່າວການເລື່ອນບັງຄັບໃຊ້ຈະຊ່ວຍຄາຍຄວາມຕຶງຄຽດໃນລະດັບໜຶ່ງ

ສະແດງຄຳຄິດເຫັນ