ວັນສຸກທີ່ 23 ພຶດສະພາທີ່ຜ່ານມາ ໂດນັລ ທຣຳ ອະດີດປະທານາທິບໍດີສະຫະລັດ ອອກມາຂູ່ຈະເອີ້ນເກັບພາສີນຳເຂົ້າ 25% ສຳລັບສະມາດໂຟນ iPhone ແລະ Samsung ທີ່ບໍ່ໄດ້ຜະລິດໃນສະຫະລັດ ເພື່ອສ້າງແຮງກົດດັນໃຫ້ບໍລິສັດເທັກໂນໂລຊີລາຍໃຫຍ່ຕ້ອງຍ້າຍຖານການຜະລິດກັບມາຍັງປະເທດ

ຄຳປະກາດຂອງທຣຳທີ່ໂພສຜ່ານແພລດຟອມ Truth Social ສົ່ງຜົນໃຫ້ມູນຄ່າຫຸ້ນຂອງ Apple ຫຼຸດລົງທັນທີ 2.6% ຄິດເປັນມູນຄ່າກວ່າ 7 ໝື່ນລ້ານໂດລາສະຫະລັດ ແລະ ເຮັດໃຫ້ມູນຄ່າລວມຂອງບໍລິສັດຕ່ຳກວ່າ 3 ລ້ານລ້ານໂດລາສະຫະລັດ

ທຣຳລະບຸວ່າ ເຂົາໄດ້ແຈ້ງກັບທິມ ຄຸກ ຊີອີໂອຂອງ Apple ໄວ້ດົນແລ້ວວ່າ iPhone ທີ່ຂາຍໃນສະຫະລັດຄວນຜະລິດພາຍໃນປະເທດ ບໍ່ແມ່ນໃນອິນເດຍ ຫຼື ບ່ອນອື່ນ ຫາກບໍ່ເຮັດຕາມ Apple ຈະຕ້ອງເສຍພາສີນຳເຂົ້າຢ່າງໜ້ອຍ 25%

ນອກຈາກ Apple ແລ້ວ ທຣຳຍັງກ່າວວ່າຈະໃຊ້ມາດຕະການດຽວກັນກັບ Samsung ແລະ ຜູ້ຜະລິດສະມາດໂຟນລາຍອື່ນທີ່ບໍ່ໄດ້ຕັ້ງໂຮງງານໃນສະຫະລັດ ໂດຍໃຫ້ເຫດຜົນວ່າ “ຖ້າສ້າງໃນອາເມຣິກາ ກໍບໍ່ຕ້ອງເສຍພາສີ”

ຄວາມເຄື່ອນໄຫວນີ້ເກີດຂຶ້ນຫລັງຈາກເມື່ອເດືອນກ່ອນ ທຣຳໄດ້ປະກາດຂຶ້ນພາສີສິນຄ້ານຳເຂົ້າຈາກຈີນສູງເຖິງ 145% ຊຶ່ງສ້າງຄວາມກັງວົນໃນໝູ່ນັກລົງທຶນຂອງ Apple ເນື່ອງຈາກຈີນເປັນຖານການຜະລິດຫຼັກຂອງບໍລິສັດ

ແຕ່ໃນເວລາຕໍ່ມາ ລັດຖະບານສະຫະລັດໄດ້ປະກາດຍົກເວັ້ນສະມາດໂຟນ ແລະ ຄອມພິວເຕີຈາກພາສີນຳເຂົ້າດັ່ງກ່າວ

ທ່າມກາງແຮງກົດດັນມີລາຍງານວ່າບໍລິສັດ Apple ກຳລັງພິຈາລະນາຍ້າຍສາຍການຜະລິດ iPhone ສຳລັບຕະຫຼາດສະຫະລັດໄປທີ່ອິນເດຍ

ໂດຍທີມ ຄຸກເປີດເຜີຍວ່າ iPhone ສ່ວນໃຫຍ່ທີ່ຂາຍໃນອາເມຣິກາໃນໄຕມາດສຸດທ້າຍມີແຫຼ່ງຜະລິດມາຈາກອິນເດຍແລ້ວ ເຖິງແມ່ນບໍລິສັດຈະຍັງບໍ່ເປີດເຜີຍລາຍລະອຽດຊັດເຈນ ແຕ່ນັກວິເຄາະປະເມີນວ່າ 90% ຂອງ iPhone ຍັງຄົງຜະລິດໃນຈີນ

ທຣຳວິຈານການຍ້າຍຖານການຜະລິດຂອງ Apple ໂດຍກ່າວວ່າ “ພວກເຮົາຊ່ວຍເຈົ້າມາດົນແລ້ວກັບໂຮງງານໃນຈີນ ຕອນນີ້ເຈົ້າຕ້ອງຊ່ວຍພວກເຮົາແດ່ ພວກເຮົາບໍ່ສົນໃຈວ່າເຈົ້າຈະຜະລິດໃນອິນເດຍ ຫຼື ຢູ່ໃສ ອິນເດຍເບິ່ງແຍງຕົວເອງໄດ້ ແຕ່ພວກເຮົາຕ້ອງການໃຫ້ເຈົ້າຜະລິດໃນສະຫະລັດອາເມຣິກາ”

ແນວໃດກໍຕາມ ນັກວິເຄາະເຕືອນວ່າການຍ້າຍການຜະລິດ iPhone ກັບສະຫະລັດຈະມີຕົ້ນທຶນສູງຫຼາຍ ເນື່ອງຈາກຂາດໂຄງສ້າງພື້ນຖານ ແລະ ແຮງງານທີ່ຊ່ຽວຊານ ຈາກເວດບຸຊ ຊີເຄຍວລິຕີ້ສ໌ (Wedbush Securities) ປະເມີນວ່າ iPhone ທີ່ຜະລິດໃນສະຫະລັດອາດມີລາຄາສູງເຖິງ 3,500 ໂດລາສະຫະລັດ ຫຼື ຄິດເປັນ 3 ເທົ່າຂອງລາຄາປັດຈຸບັນ

ທັງນີ້ ສະຫະລັດອາເມຣິກາເປັນຕະຫຼາດໃຫຍ່ທີ່ສຸດຂອງ Apple ໂດຍມີຍອດຂາຍ iPhone ຫຼາຍກວ່າ 60 ໜ່ວຍເຄື່ອງຕໍ່ປີ

ສະແດງຄຳຄິດເຫັນ