ຫຼັງຈາກປະທານາທິບໍດີທຣຳ ແຫ່ງສະຫະລັດຂູ່ຂຶ້ນພາສີສະຫະພາບຢູໂຣບ ຫຼື ອີຢູ (EU) ເຖິງ 50% ໃນວັນທີ່ 1 ມິຖຸນາ 2025 ກ່ອນຈະເລື່ອນເວລາອອກໄປເປັນ 9 ກໍລະກົດ 2025 ນີ້ ຈັບຕາໄປທີ່ການເຄື່ອນໄຫວລະຫວ່າງ “ອີຢູ ແລະ ຈີນ” ວ່າຈະຈັບມື ຫຼື ຕອບໂຕ້ກັບໃນທິດທາງໃດ

 

ສຳນັກຂ່າວບລູມເບີກ ລາຍງານວ່າ ເຈົ້າໜ້າທີ່ລະດັບສູງດ້ານການຄ້າຈາກສະຫະພາບຢູໂຣບ ຫຼື ອີຢູ (EU) ແລະ ຈີນວາງແຜນທີ່ຈະພົບກັນອີກຄັ້ງໃນຊ່ວງຕົ້ນເດືອນໜ້າເປັນຄັ້ງທີ່ 3 ຂອງປີນີ້

 

ເປັນສັນຍານທີ່ສະແດງໃຫ້ເຫັນວ່າທັງສອງຝ່າຍກຳລັງເພີ່ມຄວາມຮ່ວມມືກັນຫຼາຍຂຶ້ນ ເພື່ອພະຍາຍາມຕ້ານທານແຮງກົດດັນດ້ານພາສີສຸນອາກອນຈາກ”ປະທານາທິບໍດີໂດໂນລ ທຣຳ” ແຫ່ງສະຫະລັດຯ

 

ໂກລບອນ ໄທມສ໌ ຊຶ່ງເປັນສື່ຂອງລັດຖະບານຈີນລາຍງານວ່າ ໂຄສົກຂອງສະຫະພາບຢູໂຣບ ຫຼື ອີຢູ ເປີດເຜີຍວ່ານາຍ “ຫວັງ ເຫວິນເທົາ” ລັດຖະມົນຕີກະຊວງການຄ້າຈີນ ແລະ “ມາໂຣສ ເຊຟໂຄວິດ” ກຳມາທິການຢູໂຣບດ້ານການຄ້າ ແລະ ຄວາມໝັ້ນຄົງທາງເສດຖະກິດ ກຽມພົບກັນລະຫວ່າງການປະຊຸມລະດັບລັດຖະມົນຕີຂອງອົງການການຄ້າໂລກ (WTO) ທີ່ກຸງປາຣີໃນຊ່ວງຕົ້ນເດືອນມິຖຸນາ

 

ໂຄສົກຂອງສະຫະພາບຢູໂຣບບໍ່ໄດ້ຢືນຢັນເວລາທີ່ແນ່ນອນຂອງການເຈລະຈາກັບສຳນັກຂ່າວບລູມເບີກ ແລະ ກະຊວງການຄ້າຂອງຈີນບໍ່ໄດ້ຕອບກັບຄຳຂໍໃຫ້ສະແດງ ຄວາມຄິດເຫັນໃນທັນທີໃນຊ່ວງບ່າຍຂອງວັນຈັນ

 

ຂ່າວການຫາລືດັ່ງກ່າວເກີດຂຶ້ນໃນຂະນະທີ່ປະທານາທິບໍດີໂດໂນລ ທຣຳ ຕົກລົງທີ່ຈະຂະຫຍາຍເສັ້ນຕາຍທີ່ສະຫະພາບຢູໂຣບຕ້ອງປະເຊີນພາສີອາກອນ 50% ອອກໄປຈົນເຖິງວັນທີ່ 9 ກໍລະກົດ 2025

 

ຫຼັງຈາກໄດ້ໂທລະສັບສົນທະນາກັບ “ອາວສູລາ ຟອນ ແດຣ ໄລເອິນ” ປະທານຄະນະກຳມາທິການສະຫະພາບຢູໂຣບ ຊຶ່ງການເລື່ອນການເກັບພາສີ ອີຢູ ອອກໄປເຖິງເດືອນກໍລະກົດ ນັບເປັນເດືອນດຽວກັນກັບທີ່ຜູ້ນຳຢູໂຣບຈະເດີນທາງໄປຍັງກຸງປັກກິ່ງເພື່ອຮ່ວມປະຊຸມສຸດຍອດກັບຜູ້ນຳຈີນ

 

ທັງນີ້ລັດຖະບານຈີນພະຍາຍາມເສີມສ້າງຄວາມສຳພັນກັບທົ່ວໂລກເພື່ອຕ້ານທານລະບົບ”ພາສີອາກອນຂອງທຣຳ”

 

ລວມທັງການເປີດໂອກາດໃຫ້ກຸ່ມຢູໂຣບເຂົ້າເຖິງຜູ້ກຳນົດນະໂຍບາຍລະດັບສູງໃນວົງຈຳກັດ ແລະ ໃຫ້ຄຳໝັ້ນວ່າຈະປັບປຸງສະພາບແວດລ້ອມທາງທຸລະກິດຂອງຈີນສຳລັບບໍລິສັດຕ່າງປະເທດ

 

ອີງຕາມນັ້ນ ໃນມຸມຂອງເຈົ້າໜ້າທີ່ດ້ານການຄ້າຂອງຢູໂຣບຍັງຄົງມີຂໍ້ສົງໄສໃນຄວາມຈິງຈັງຂອງຈີນ ໂດຍອ້າງເຖິງ “ຄວາມອ່ອນເພຍຈາກຄຳສັນຍາ” ແລະ ຂໍ້ພິພາດທີ່ຍັງຄົງດຳເນີນຢູ່ກ່ຽວກັບບັນຫາຕ່າງໆ ເຊັ່ນ: ການສະໜັບສະໜູນຂອງລັດຕໍ່ບໍລິສັດຈີນ ແລະ ອຸປະສັກການຄ້າ

ສະແດງຄຳຄິດເຫັນ