ມະຫາວິທະຍາໄລເທລອາວີຟ ລະບຸໃນຄຳຖະແຫຼງການວ່າ ຄະນະນັກວິໄຈຂອງອິສຣາເອນ ໄດ້ຄົ້ນພົບແບັກທີເຣຍວີບຣິໂອ (Vibrio)

 

ທີ່ເປັນອັນຕະລາຍ ແລະ ດື້ຢາປົຕິຊີວະນະ ໃນທະເລເມດິເຕີເຣນຽນ ແລະ ທະເລແດງ ສົ່ງຜົນໃຫ້ເກີດຄວາມກັງວົນດ້ານສາທາລະນະສຸກ ເນື່ອງຈາກແບັກທີເຣຍເຫຼົ່ານີ້ສາມາດກໍ່ໃຫ້ເກີດໂລກຮ້າຍແຮງໃນມະນຸດ ຊຶ່ງລວມເຖິງບັນຫາໃນຊ່ອງທ້ອງ ການຕິດເຊື້ອທີ່ບາດແຜ ແລະ ການຕິດເຊື້ອທາງຫູ ອີກທັງເປັນອັນຕະລາຍຕໍ່ສັດທະເລຢ່າງປະກາລັງ ແລະ ຫອຍ

 

ແບັກທີເຣຍວີບຣິໂອ ສາມາດແບ່ງປັນຍີນໃຫ້ກັນໄດ້ ຊຶ່ງຫມາຍຄວາມວ່າເມື່ອມີແບັກທີເຣຍຕົວໜຶ່ງກາຍເປັນອັນຕະລາຍ ຈະສາມາດຖ່າຍທອດຄຸນສົມບັດດັ່ງກ່າວໄປຍັງແບັກທີເຣຍຕົວອື່ນໃຫ້ກາຍເປັນໄພຂົ່ມຂູ່ໄດ້ເຊັ່ນກັນ ແລະ ອຸນຫະພູມມະຫາສະຫມຸດທີ່ສູງຂຶ້ນ ຈາກການປ່ຽນແປງສະພາບອາກາດຍັງຊ່ວຍໃຫ້ແບັກທີເຣຍເຫຼົ່ານີ້ແຜ່ກະຈາຍໄປຍັງພື້ນທີ່ໃໝ່ ແລະ ຕິດເຊື້ອໃນຄົນໄດ້ຫຼາຍຂຶ້ນອີກດ້ວຍ

 

ການສຶກສາດັ່ງກ່າວ ຊຶ່ງເຜີຍແຜ່ໃນວາລະສານເອັມສະເຟຍ (mSphere) ລະບຸວ່າຄະນະນັກວິທະຍາສາດຈາກມະຫາວິທະຍາໄລເທລອາວີຟ ໄດ້ວິເຄາະຈີໂນມຂອງຕົວຢ່າງແບັກທີເຣຍວີບຣິໂອຈຳນວນ 23 ຕົວຢ່າງ ຊຶ່ງເກັບຈາກນ່ານນ້ຳຊາຍຝັ່ງຂອງເມືອງເທລອາວີຟ ແລະ ເອລັດ

 

ຜົນການວິໄຈຂອງພວກເຂົາເຜີຍໃຫ້ເຫັນສານພິດ ລະບົບການຫຼັ່ງ ແລະ ອົງປະກອບທາງພັນທຸກຳເຄື່ອນທີ່ໄດ້ຫຼາກຫຼາຍຊະນິດ

 

ຊຶ່ງຊ່ວຍໃຫ້ແບັກທີເຣຍແຜ່ກະຈາຍຄຸນສົມບັດຕ່າງໆ ທີ່ສົ່ງເສີມການຢູ່ລອດ ແລະ ຄວາມສາມາດໃນການກໍ່ໂລກ

 

ນອກຈາກນີ້ ຍັງພົບແບັກທີເຣຍຢ່າງໜ້ອຍ 10 ສາຍພັນທຸ່ທີ່ສາມາດເຮັດໃຫ້ເຊລພູມຄຸ້ມກັນຕາຍ ແລະ ພົບອີກຢ່າງໜ້ອຍ 12 ສາຍພັນທຸ່ທີ່ສາມາດປ່ອຍສານພິດໃສ່ແບັກທີເຣຍວີບຣິໂອສາຍພັນອື່ນທີ່ເປັນຄູ່ແຂ່ງໄດ້

 

ເມື່ອນຳມາທົດສອບກັບຢາປະຕິຊີວະນະ ທີ່ນິຍົມໃຊ້ຮັກສາການຕິດເຊື້ອຈາກແບັກທີເຣຍວີບຣິໂອ ພົບວ່າຕົວຢ່າງແບັກທີເຣຍຈຳນວນຫຼາຍສະແດງໃຫ້ເຫັນເຖິງການດື້ຢາຢ່າງຮຸນແຮງ

 

ໂດຍສະເພາະອາຊິໂທລໍມາຍຊິນ (Azithromycin) ທັງຍັງມີໜຶ່ງໃນສາຍພັນ ຂອງແບັກທີເຣຍດັ່ງກ່າວທີ່ກວດພົບໃນທະເລແດງທີ່ສາມາດຜະລິດສານພິດທີ່ສາມາດຄາຊີວິດກຸ້ງໄດ້ ແລະ ເຄີຍສ້າງຄວາມເສຍຫາຍມູນຄ່າຫຼາຍພັນລ້ານດອນລາສະຫະລັດໃຫ້ກັບຟາມລ້ຽງກຸ້ງທົ່ວໂລກ

 

ທີມວິໄຈລະບຸວ່າຜົນການສຶກສາຊີ້ໃຫ້ເຫັນຢ່າງຊັດເຈນວ່າແບັກທີເຣຍວີບຣິໂອ ມີສັກຍະພາບໃນການກໍ່ໂລກໃນນ່ານນ້ຳຊາຍຝັ່ງຂອງອິສຣາເອນ ແລະ ຢ້ຳເຖິງຄວາມຈຳເປັນເລັ່ງດ່ວນໃນການຕິດຕາມ ແລະ ເຝົ້າລະວັງສະພາບແວດລ້ອມຢ່າງຕໍ່ເນື່ອງ ເພື່ອເຝົ້າຕິດຕາມ ແລະ ຈັດການກັບໄພຂົ່ມຂູ່ທີ່ອາດເກີດຂຶ້ນ

 

ສະແດງຄຳຄິດເຫັນ