ຫຼ້າສຸດ ໃນລາຍການ “ສຸຂະພາບ ແລະ ຊີວິດ” ຂອງໄຕ້ຫວັນ ແພດຫລິວ ປໍ້ເຫລິນ ຜູ້ຊ່ຽວຊານດ້ານແພດສາດຊະລໍໄວ ແລະ ໂພຊະນາການຊາວໄຕ້ຫວັນ

ເປີດເຜີຍວ່າ ສະຖາບັນວິໄຈປ້ອງກັນໂລກມະເຮັງແຫ່ງຊາດຂອງຍີ່ປຸ່ນເຄີຍຈັດອັນດັບປະສິດທິພາບໃນການຕ້ານມະເຮັງຂອງຜັກ ແລະ ທັນຍະພືດທົ່ວໄປ 18 ຊະນິດ

ໂດຍ 10 ອັນດັບທຳອິດ ທີ່ຕ້ານມະເຮັງໄດ້ດີ ໄດ້ແກ່: ມັນເທດຕົ້ມ, ມັນເທດສົດ, ຫນໍ່ໄມ້ຝຣັ່ງ, ບຣັອກໂຄລີ, ກະຫລຳປີ, ກະຫລຳດອກ, ຜັກເຊີນາລີ້, ເປືອກຫມາກເຂືອຈີນ, ພິກຫວານ ແລະ ແຄລອດ

ແພດຫລິວຍັງເປີດເຜີຍວ່າ ມັນເທດມີວິຕາມິນເອ ເບຕາແຄໂຣທີນ ແລະ ສານພິເສດທີ່ຊື່ວ່າ DHEA (dehydroepiandrosterone)

ຊຶ່ງໃນຜູ້ຊາຍຈະປ່ຽນເປັນຮໍໂມນເພດຊາຍ ສ່ວນໃນຜູ້ຍິງຈະປ່ຽນເປັນເອສໂຕເຈນ ໂດຍໃນປະລິມານນ້ອຍ DHEA ເຄີຍຖືກທົດລອງວ່າອາດຊ່ວຍຍັບຍັ້ງເຊລມະເຮັງເຕົ້ານົມ ແລະ ມະເຮັງລຳໄສ້ໃຫຍ່ໄດ້

ລາວຍັງກ່າວອີກວ່າ ໃນມັນເທດມີສານ ແກງກິໂລໄຊດ (ganglioside) ຊຶ່ງຊ່ວຍກະຕຸ້ນໃຫ້ເຊລມະເຮັງຕາຍຕາມວົງຈອນ

ອີງຕາມນັ້ນ ລາວເນັ້ນຢ້ຳວ່າຄວນກິນມັນເທດໃນປະລິມານພໍເໝາະ ໂດຍເລົ່າວ່າມີຜູ້ປ່ວຍມະເຮັງໂພງຈະມູກຄົນໜຶ່ງທີ່ເຂົ້າໃຈວ່າມັນເທດຊ່ວຍລ້າງພິດ ຈຶ່ງກິນເຖິງວັນລະ 3 ຫົວຄວບຄູ່ກັບເຂົ້າຂາວຕາມປົກກະຕິ ຫຼັງຜ່ານໄປຄື່ງປີ ຄ່າທຣິກລີເຊີໄຣດພຸ່ງສູງ ແລະ ພົບໄຂມັນພອກຕັບ

ແພດຫລິວແນະນຳວ່າ ມັນເທດເປັນອາຫານທີ່ມີແປ້ງສູງ ຫາກກິນຫຼາຍເກີນໄປຈະເຮັດໃຫ້ພະລັງງານສະສົມເກີນ ຄວນຫຼຸດປະລິມານແປ້ງຈາກອາຫານອື່ນຫາກຕ້ອງການບໍລິໂພກມັນເທດ

ດ້ານນັກໂພຊະນາການຊາວໄຕ້ຫວັນ ຈາງອຸ້ຍຊີ ແນະນຳເພີ່ມເຕີມໃນໂພສ ສ່ວນຕົວວ່າ ຄວນກິນມັນເທດແບບເຢັນ ເພາະເມື່ອເຢັນລົງຈະເກີດແປ້ງທົນການຍ່ອຍ (Resistant Starch)

ຊຶ່ງຊ່ວຍຫຼຸດປະລິມານແຄລໍລີລົງຄື່ງໜຶ່ງ ເຮັດໃຫ້ອິ່ມນານ ແລະ ຍັງຊ່ວຍຫຼຸດນ້ຳໜັກ

ປະໂsຍດອື່ນໆ ຂອງມັນເທດຕໍ່ສຸຂະພາບ

ຕາມເວັບໄຊ Healthline ມັນເທດຖືເປັນອາຫານທີ່ມີຄຸນຄ່າທາງໂພຊະນາການສູງ ອຸດົມດ້ວຍວິຕາມິນເອ, ວິຕາມິນຊີ ແລະ ແມງການີສ ຊຶ່ງນອກຈາກຊ່ວຍຕ້ານມະເຮັງແລ້ວ ຍັງດີຕໍ່ລະບົບພູມິຄຸ້ມກັນ ແລະ ສຸຂະພາບໂດຍລວມ

• ສົ່ງເສີມສຸຂະພາບລຳໄສ້

ມັນເທດມີໃຍອາຫານທັງແບບລະລາຍນ້ຳ ແລ ະບໍ່ລະລາຍນ້ຳ ຊຶ່ງຮ່າງກາຍບໍ່ສາມາດຍ່ອຍໄດ້ ຈຶ່ງຢູ່ໃນທາງເດີນອາຫານ ແລະ ສົ່ງຜົນດີຕໍ່ສຸຂະພາບລຳໄສ້ ຊ່ວຍເພີ່ມກາກໃຍໃນລະບົບຍ່ອຍອາຫານ ບາງຊະນິດສາມາດຫມັກໂດຍແບັກທີເຣຍໃນລຳໄສ້ໃຫຍ່ໃຫ້ກາຍເປັນກຣົດໄຂມັນສາຍສັ້ນ ຊຶ່ງບຳລຸງເຊລໃນລຳໄສ້

• ບຳລຸງສາຍຕາ

ມັນເທດອຸດົມດ້ວຍເບຕາແຄໂຣທີນ ສານຕ້ານອະນຸມູນອິສຣະທີ່ຮ່າງກາຍແປງເປັນວິຕາມິນເອ ຊຶ່ງຈຳເປັນຕໍ່ການສ້າງເຊລຮັບແສງໃນດວງຕາ

• ເສີມການເຮັດວຽກຂອງສະໝອງ

ງານວິໄຈໃນສັດທົດລອງພົບວ່າ ແອນໂທໄຊຢານິນໃນມັນມ່ວງອາດຊ່ວຍຫຼຸດການອັກເສບໃນສະໝອງ ແລະ ຫຼຸດຄວາມເສຍຫາຍຈາກອະນຸມູນອິສຣະ ອີກທັງອາດຊ່ວຍພັດທະນາຄວາມຈຳ

ນອກຈາກນີ້ ມັນເທດຍັງຊ່ວຍເສີມລະບົບພູມິຄຸ້ມກັນອີກດ້ວຍ

ອີງຕາມນັ້ນ ຫາກຮັບປະທານບໍ່ຖືກວິທີ ອາດເຮັດໃຫ້ເກີດຜົນຂ້າງຄຽງທີ່ບໍ່ພຶງປະສົງ ແລະ ສົ່ງຜົນຕໍ່ສຸຂະພາບໄດ້ ນີ້ແມ່ນຂໍ້ຫ້າມໃນການຮັບປະທານມັນເທດທີ່ຫຼາຍຄົນອາດບໍ່ຮູ້

5 ຂໍ້ຄວນລະວັງເມື່ອກິນມັນເທດ

• ຫ້າມກິນມັນເທດຕອນທ້ອງວ່າງ

ການກິນມັນເທດຕອນທ້ອງວ່າງອາດເຮັດໃຫ້ລະບົບຍ່ອຍອາຫານມີບັນຫາ ເພາະມັນເທດຈະກະຕຸ້ນການຜະລິດກຣົດໃນກະເພາະເກີນໄປ ເຮັດໃຫ້ເກີດອາການແສບຮ້ອນກາງເອິກ ແລະ ອາດເຮັດໃຫ້ເກີດບາດແຜໃນກະເພາະອາຫານ ເພື່ອປົກປ້ອງສຸຂະພາບ ຄວນກິນມັນເທດຫຼັງມື້ອາຫານຫຼັກ ຫຼື ທານຮ່ວມກັບອາຫານທີ່ມີເສັ້ນໃຍສູງ

• ຫ້າມກິນມັນເທດດິບ

ການບໍລິໂພກມັນເທດດິບອາດເຮັດໃຫ້ເກີດບັນຫາການຍ່ອຍອາຫານໄດ້ ເນື່ອງຈາກມີແປ້ງທີ່ຍ່ອຍຍາກ ຊຶ່ງອາດເຮັດໃຫ້ເກີດອາການທ້ອງອືດ ແລະ ບັນຫາໃນລຳໄສ້

ນອກຈາກນີ້ ມັນເທດດິບຍັງມີສານຍັບຍັ້ງເອນໄຊທຣິບຊິນ ຊຶ່ງຫຼຸດການດູດຊຶມໂປຣຕີນຂອງຮ່າງກາຍ ແລະ ສົ່ງຜົນຕໍ່ການສ້ອມແຊມເຊລ ຈຶ່ງບໍ່ແນະນຳໃຫ້ຮັບປະທານມັນເທດດິບເປັນປະຈຳ ແລະ ໃນປະລິມານຫຼາຍ

• ຫ້າມກິນມັນເທດຫຼາຍເກີນໄປ

ເຖິງແມ່ນມັນເທດຈະເປັນອາຫານທີ່ມີຄຸນຄ່າທາງໂພຊະນາການ ແຕ່ການກິນຫຼາຍເກີນໄປອາດເຮັດໃຫ້ເກີດບັນຫາການຍ່ອຍອາຫານໄດ້ ເພາະຮ່າງກາຍຈະຕ້ອງຜະລິດເອນໄຊຈຳນວນຫຼາຍເພື່ອຍ່ອຍແປ້ງ

ຂະບວນການນີ້ຈະໃຊ້ພະລັງງານຫຼາຍ ແລະ ສ້າງແກັສຄາບອນໄດອອກໄຊ ເຮັດໃຫ້ເກີດອາການທ້ອງອືດ  ແລະ ທ້ອງເຟີ້

ນອກຈາກນີ້ ມັນເທດຍັງມີໃຍອາຫານທີ່ບໍ່ລະລາຍໃນນ້ຳ ຊຶ່ງຫາກກິນຫຼາຍເກີນໄປອາດລະຄາຍເຄືອງລຳໄສ້ ແລະ ເຮັດໃຫ້ເກີດອາການທ້ອງຜູກ

• ຫຼີກລ່ຽງການທອດຫຼືເຕີມນ້ຳຕານ

ເຖິງແມ່ນມັນເທດຈະມີປະໂຫຍດ ແຕ່ຄວນປຸງຢ່າງເໝາະສົມເພື່ອຄົງຄຸນຄ່າທາງໂພຊະນາການ ການຕົ້ມ ແລະ ນຶ່ງເປັນວິທີທີ່ດີທີ່ສຸດໃນການຮັກສາວິຕາມິນ ແຮ່ທາດ ແລະ ເສັ້ນໃຍອາຫານ ຄວນຫຼີກລ່ຽງການປຸງແບບທອດ ຫຼື ເຕີມນ້ຳຕານຫຼາຍເກີນໄປ ເພາະນອກຈາກຈະຫຼຸດຄຸນຄ່າທາງໂພຊະນາການແລ້ວ ຍັງເຮັດໃຫ້ໄດ້ຮັບແຄລໍລີເກີນ ສົ່ງຜົນເສຍຕໍ່ສຸຂະພາບ

• ຫ້າມກິນມັນເທດທີ່ມີຈຸດສີດຳ

ຈຸດສີດຳເທິງມັນເທດເປັນສັນຍານເຕືອນເຖິງແບັກທີເຣຍທີ່ເປັນອັນຕະລາຍ ຊຶ່ງແບັກທີເຣຍເຫຼົ່ານີ້ຈະສ້າງສານພິດທີ່ອາດທຳລາຍຕັບ ແລະ ອະໄວຍະວະພາຍໃນອື່ນໆ

ສານພິດເຫຼົ່ານີ້ຄ່ອນຂ້າງສະຖຽນ ແລະ ບໍ່ຖືກທຳລາຍງ່າຍໆ ດ້ວຍຄວາມຮ້ອນ ດັ່ງນັ້ນ, ການຮັບປະທານມັນເທດທີ່ປົນເປື້ອນອາດກໍ່ໃຫ້ເກີດບັນຫາສຸຂະພາບຮຸນແຮງ ເພື່ອຄວາມປອດໄພ ຄວນຫຼີກລ່ຽງມັນເທດທີ່ມີຈຸດ ຫຼື ຮອຍຊ້ຳ ແລະ ເລືອກມັນທີ່ສົດ ແລະ ບໍ່ເນົ່າ

ສະແດງຄຳຄິດເຫັນ