ພິທີເປີດນຳໃຊ້ສະໜາມກິລາດັ່ງກ່າວໄດ້ຈັດຂຶ້ນໃນວັນທີ 26 ພຶດສະພາ ນີ້ ທີ່ໂຮງຮຽນມັດທະຍົມບ້ານນາຄວາຍໃຕ້ ເມືອງໄຊເຊດຖາ ນະຄອນຫຼວງວຽງຈັນ ໃຫ້ກຽດເຂົ້າຮ່ວມໂດຍ ທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ, ທັງເປັນປະທານສະມາຄົມກິລາ-ກາຍະກຳ ນະຄອນຫຼວງວຽງຈັນ, ທ່ານ ນາງ ວິໄລວອນ ຈັນທະລາຕີ ເຈົ້າເມືອງໄຊເຊດຖາ, ທ່ານ ວີເພັດ ສີຫາຈັກ ປະທານສະຫະພັນບານເຕະແຫ່ງຊາດລາວ ແລະ ທ່ານ ຊານ ຈີວານ ບາລາຊິນແກມ ຜູ້ອຳນວຍການຝ່າຍປະສານງານສະຫະພັນບານເຕະ ສະມາຊິກຂົງເຂດ ອາຊີ-ໂອເຊນີ ພ້ອມດ້ວຍ ພາກສ່ວນກ່ຽວຂ້ອງເຂົ້າຮ່ວມ.
ກ່ອນໜ້ານີ້ ໂຄງການ “FIFA Arena Project” ໄດ້ສ້າງສະໜາມເຕະບານຂະໜາດນ້ອຍມາແລ້ວຢູ່ທີ່ ສະຫະພັນບານເຕະແຫ່ງຊາດລາວ ບ້ານຫ້ວຍຫົງ 1 ສະໜາມ ແລະ ທີ່ສູນຝຶກຈໍາປີ-ຈໍາປາ (ເຂດຫຼັກ 16) ຫຼ້າສຸດເລີ່ມສ້າງທີ່ໂຮງຮຽນເປັນແຫ່ງທໍາອິດ ຢູ່ໂຮງຮຽນ ມັດທະຍົມສົມບູນນາຄວາຍ ແລະ ຍັງຈະສືບຕໍ່ກໍ່ສ້າງຂຶ້ນອີກທີ່ໂຮງຮຽນ ມັດທະຍົມສົມບູນ ເວີນແກ່ນ ເມືອງມູນລະປະໂມກ ແຂວງຈໍາປາສັກ.
ພາຍໃນພິທີດັ່ງກ່າວ ກໍຍັງໄດ້ມີກິດຈະກຳສະແດງໂຊເດາະບານ ຈາກທ້າວ ອ໋ອບອາເກົ້າ ນັກກິລາເຍົາວະຊົນລາວ ຈາກສະໂມສອນ ເອສຣາ ເອັບຊີ ທີມແຊັມລາວລີກ 2024-2025 ແລະ ຍັງເປີດຄລີນິກສອນເຕະບານແບບພື້ນຖານໃຫ້ແກ່ເຍົາວະຊົນຍິງ ຂອງໂຮງຮຽນດັ່ງກ່າວອີກດ້ວຍ.
(ພາບ-ຂ່າວ: ສົງການ)
