ລັດຖະບານຂອງປະທານາທິບໍດີ ໂດນັລດ໌ ທຣຳ ໄດ້ມີຄຳສັ່ງໃຫ້ສະຖານທູດສະຫະລັດທົ່ວໂລກຢຸດການນັດໝາຍຂໍວີຊ່ານັກຮຽນນັກສຶກສາຊົ່ວຄາວ

 

ພ້ອມທັງກະກຽມຂະຫຍາຍມາດຕະການກວດສອບໂຊຊຽວມີເດຍຂອງຜູ້ສະໝັກຂໍວີຊ່າດັ່ງກ່າວ

 

ໃນບັນທຶກພາຍໃນທີ່ສົ່ງໄປຍັງສະຖານທູດທົ່ວໂລກ ລັດຖະມົນຕີຕ່າງປະເທດ ມາກໂກ ຣູບິໂອ ລະບຸວ່າ ການລະງັບການນັດໝາຍນີ້ຈະດຳເນີນຕໍ່ໄປ ຈົນກວ່າຈະມີປະກາດເພີ່ມເຕີມ

 

ບັນທຶກດັ່ງກ່າວລະບຸວ່າການກວດສອບຂໍ້ມູນເທິງໂຊຊ້ຽວມີເດຍ ຈະເຂັ້ມງວດຂຶ້ນສຳລັບຜູ້ສະໝັກຂໍວີຊ່ານັກຮຽນນັກສຶກສາ ແລະ ວີຊ່າແລກປ່ຽນ ຊຶ່ງຈະມີ “ຜົນກະທົບຢ່າງຫຼວງຫຼາຍ” ຕໍ່ການດຳເນີນງານຂອງສະຖານທູດ ແລະ ກົງສຸນ

 

ມາດຕະການນີ້ເກີດຂຶ້ນທ່າມກາງຄວາມຕຶງເຄັ່ງລະຫວ່າງທຣຳກັບມະຫາວິທະຍາໄລຊັ້ນນຳຫຼາຍແຫ່ງໃນສະຫະລັດ ຊຶ່ງເຂົາກ່າວຫາວ່າມີແນວຄິດເອນອຽງໄປທາງຊ້າຍຫຼາຍເກີນໄປ ແລະ ເປີດທາງໃຫ້ເກີດພຶດຕິກຳຕໍ່ຕ້ານຊາວຢິວເທິງມະຫາວິທະຍາໄລ ລວມເຖິງການມີນະໂຍບາຍຮັບນັກສຶກສາທີ່ບໍ່ເປັນທຳ

 

ໃນບັນທຶກຈາກກະຊວງການຕ່າງປະເທດ ຊຶ່ງຖືກເປີດເຜີຍໂດຍສຳນັກຂ່າວ CBS News ລະບຸວ່າສະຖານທູດສະຫະລັດໄດ້ຮັບຄຳສັ່ງເມື່ອວັນອັງຄານ (27 ພຶດສະພາ) ໃຫ້ລົບລາຍການນັດໝາຍວີຊ່ານັກຮຽນທີ່ຍັງບໍ່ໄດ້ຮັບການຢືນຢັນທັງໝົດອອກຈາກລະບົບ ຍົກເວັ້ນການນັດໝາຍທີ່ໄດ້ຮັບການຢືນຢັນແລ້ວ ຊຶ່ງຍັງສາມາດດຳເນີນຕໍ່ໄປໄດ້

 

ເອກະສານຍັງເປີດເຜີຍອີກວ່າ ກະຊວງການຕ່າງປະເທດກຳລັງກະກຽມການ “ຂະຫຍາຍມາດຕະການກວດສອບໂຊຊ້ຽວມີເດຍຢ່າງເປັນທາງການ”

 

ສຳລັບຜູ້ສະໝັກຂໍວີຊ່ານັກຮຽນທັງໝົດ ແຕ່ຍັງບໍ່ໄດ້ລະບຸຊັດເຈນວ່າການກວດສອບຈະຄອບຄຸມເຖິງເນື້ອຫາ ຫຼື ກິດຈະກຳປະເພດໃດ

 

ໂດຍປົກກະຕິແລ້ວ ນັກຮຽນຕ່າງປະເທດທີ່ຕ້ອງການສຶກສາຕໍ່ໃນສະຫະລັດ ຈຳເປັນຕ້ອງນັດສຳພາດກັບເຈົ້າໜ້າທີ່ສະຖານທູດໃນປະເທດຂອງຕົນກ່ອນການອະນຸມັດວີຊ່າ

 

ມະຫາວິທະຍາໄລຈຳນວນຫຼາຍໃນສະຫະລັດພຶ່ງພາລາຍໄດ້ຈາກນັກຮຽນຕ່າງຊາດ ຊຶ່ງມັກຕ້ອງຈ່າຍຄ່າຮຽນໃນອັດຕາສູງກວ່ານັກຮຽນທ້ອງຖິ່ນ

 

ແທມມີ ບຣູສ ໂຄສົກກະຊວງການຕ່າງປະເທດ ກ່າວກັບນັກຂ່າວວ່າ “ພວກເຮົາຈິງຈັງຢ່າງຍິ່ງກັບກະບວນການກວດສອບຜູ້ທີ່ຈະເດີນທາງເຂົ້າສະຫະລັດ ແລະ ພວກເຮົາຈະເດີນໜ້າດຳເນີນການຕໍ່ໄປ”

 

ລັດຖະບານທຣຳເຄີຍສັ່ງລະງັບງົບປະມານຈຳນວນຫຼາຍຮ້ອຍລ້ານໂດລາທີ່ຈັດສັນໃຫ້ມະຫາວິທະຍາໄລ ແລະ ພະຍາຍາມຜັກດັນການເນລະເທດນັກຮຽນຕ່າງຊາດ ລວມເຖິງເພີກຖອນວີຊ່າຫຼາຍພັນໃບ ໂດຍບາງມາດຕະການຖືກສານສັ່ງລະງັບໄວ້

 

ທຳນຽບຂາວຍັງກ່າວຫາມະຫາວິທະຍາໄລບາງແຫ່ງວ່າ ປ່ອຍໃຫ້ກິດຈະກຳສະໜັບສະໜູນປາເລສໄຕນ໌ເທິງມະຫາວິທະຍາໄລຖືກຄອບງຳ ໂດຍແນວຄິດຕໍ່ຕ້ານຊາວຢິວ

 

ຂະນະທີ່ຫຼາຍມະຫາວິທະຍາໄລຕອບໂຕ້ວ່າ ລັດຖະບານກຳລັງພະຍາຍາມລະເມີດເສລີພາບໃນການສະແດງອອກ

 

ມະຫາວິທະຍາໄລຮາວາດ ຕົກເປັນເປົ້າໝາຍຫຼັກຂອງທຣຳ ໂດຍເມື່ອອາທິດທີ່ຜ່ານມາ ລັດຖະບານຂອງເຂົາໄດ້ເພີກຖອນສິດຂອງຮາວາດ ໃນການຮັບນັກຮຽນຕ່າງຊາດ ແລະ ນັກວິໄຈຈາກຕ່າງປະເທດ ແຕ່ສານລັດຖະບານກາງມີຄຳສັ່ງລະງັບມາດຕະການດັ່ງກ່າວ

 

ຫາກນະໂຍບາຍນີ້ມີຜົນບັງຄັບໃຊ້ ອາດສ້າງຜົນກະທົບຢ່າງໜັກຕໍ່ມະຫາວິທະຍາໄລຮາວາດ ຊຶ່ງມີນັກສຶກສາຕ່າງຊາດກວ່າ 25% ຂອງຈຳນວນນັກຮຽນທັງໝົດ

 

ສະແດງຄຳຄິດເຫັນ