ທຳນຽບຂາວຢືນຢັນ “ອີລອນ ມັສກ໌” ມະຫາເສດຖີ CEO ຂອງ Tesla ແລະ ທີ່ປຶກສາຄົນສະນິດຂອງປະທານາທິບໍດີໂດນາລ ທຣຳ ໄດ້ຢຸດເຊົາບົດບາດຂອງລາວໃນຝ່າຍບໍລິຫານຂອງລັດຖະບານທຣຳແລ້ວ

ໃນຖານະພະນັກງານລັດຖະບານພິເສດທີ່ເຂົ້າມາເບິ່ງແຍງກະຊວງເພີ່ມປະສິດທິພາບລັດຖະບານ ຫຼື ດອຈ (Department of Government Efficiency ຫຼື DOGE) ຕັ້ງແຕ່ຊ່ວງຕົ້ນປີທີ່ຜ່ານມາ

ມັສກ໌ໄດ້ກ່າວຂອບໃຈທຣຳໃນໂພສຂອງລາວເທິງ X ທີ່ໃຫ້ໂອກາດໄດ້ເຂົ້າມາມີບົດບາດໃນການລົດການໃຊ້ຈ່າຍທີ່ສິ້ນເປືອງ ແລະ ກ່າວວ່າລາວເຊື່ອວ່າຫົວໜ່ວຍງານທີ່ມີໜ້າທີ່ລົດຄ່າໃຊ້ຈ່າຍຂອງລັດຖະບານເຊັ່ນນີ້ຈະກາຍເປັນເລື່ອງປົກກະຕິທົ່ວໄປຂອງລັດຖະບານຕໍ່ຈາກນີ້ ແລະ ຈະແຂງແກ່ນຂຶ້ນເມື່ອເວລາຜ່ານໄປ ໜ້າທີ່ຂອງກະຊວງ DOGE ກໍຈະດຳເນີນຕໍ່ໄປເຖິງວ່າບໍ່ມີມັສກ໌ແລ້ວກໍຕາມ

ຕັ້ງແຕ່ຕົ້ນປີທີ່ຜ່ານມາ ມັສກ໌ມີບົດບາດສຳຄັນໃນການປັບໂຄງສ້າງ ແລະ ລົດຂະໜາດລັດຖະບານກາງສະຫະລັດຯ ພາຍໃຕ້ການບໍລິຫານງານຂອງປະທານາທິບໍດີທຣຳທີ່ກັບມາຮັບຕຳແໜ່ງອີກຄັ້ງ

ໂດຍມັສກ໌ ແລະ ກະຊວງ DOGE ໄດ້ລົດຈຳນວນພະນັກງານພົນລະເຮືອນຂອງລັດຖະບານກາງລົງປະມານ 12% ຫຼື ປະມານ 260,000 ຕຳແໜ່ງ ຜ່ານການເລີກຈ້າງ ການຈ່າຍເງິນໃຫ້ອອກ ແລະ ກຳນົດໃຫ້ບຳນານອາຍຸກ່ອນກຳນົດ

ເຖິງແມ່ນວ່າມັສກ໌ຈະຍົກຍ້ອງພາລະກິດຂອງກະຊວງ DOGE ແຕ່ເມື່ອວັນອັງຄານທີ່ຜ່ານມາ ລາວໄດ້ວິພາກວິຈານຮ່າງກົດໝາຍກ່ຽວກັບພາສີ ແລະ ງົບປະມານຂອງພັກຣີພັບລິກັນ ທີ່ກຳລັງພິຈາລະນາໃນສະພາຄອງເກຣັສ ໂດຍລະບຸວ່າຮ່າງກົດໝາຍດັ່ງກ່າວຈະເພີ່ມການຂາດດຸນງົບປະມານ ແລະ ບັ່ນທອນຄວາມພະຍາຍາມຂອງ DOGE ໃນການລົດຄ່າໃຊ້ຈ່າຍຂອງລັດຖະບານ

ຢ່າງໃດກໍຕາມ ໃນຊ່ວງບໍ່ເທົ່າໃດເດືອນນີ້ ບົດບາດທາງການເມືອງຂອງມັສກ໌ໃນລັດຖະບານທຣຳກັບໄດ້ຮັບສຽງວິພາກວິຈານຈາກສາທາລະນະຊົນ ແລະ ນັກລົງທຶນບາງສ່ວນທີ່ຮຽກຮ້ອງໃຫ້ລາວກັບໄປເນັ້ນທີ່ການບໍລິຫານ Tesla ຂອງລາວຫຼາຍຂຶ້ນ

ຫຼັງຈາກບໍລິສັດກຳລັງປະເຊີນກັບຫຼາກຫຼາຍປະເດັນທີ່ເກີດຂຶ້ນກ່ອນໜ້ານີ້

ສະແດງຄຳຄິດເຫັນ