ການາດາປະກາດສະຖານະການສຸກເສີນ ໄຟປ່າແຜ່ລາມກວ່າ 160 ຈຸດ ຍົກຍ້າຍປະຊາຊົນ 17,000 ຄົນເພື່ອຄວາມປອດໄພ ໄຟປ່າຍັງສົ່ງຜົນກະທົບຕໍ່ການຜະລິດນ້ຳມັນ ແລະ ແກັສບາງສ່ວນຕ້ອງຢຸດພັກຊົ່ວຄາວ

ມື້ນີ້ (30 ພຶດສະພາ 2025) ການາດາປະເຊີນກັບໄຟປ່າຄັ້ງໃຫຍ່ ກຳລັງແຜ່ລາມຢູ່ໃນພື້ນທີ່ທາງກາງ ແລະ ຕາເວັນອອກຂອງປະເທດ ຫຼາຍກວ່າ 160 ຈຸດທົ່ວປະເທດ.

ຫຼາຍພື້ນທີ່ຕ້ອງສັ່ງຍົກຍ້າຍປະຊາຊົນເພື່ອຄວາມປອດໄພ. ບາງລັດຕ້ອງປະກາດສະຖານະການສຸກເສີນ ແລະ ຍົກຍ້າຍປະຊາຊົນກວ່າ 10,000 ຄົນຫນີໄຟປ່າ.

ລັດ Manitoba ໄດ້ປະກາດສະຖານະການສຸກເສີນ ແລະ ໃຫ້ປະຊາຊົນກວ່າ 17,000 ຄົນ ໃນພື້ນທີ່ຕອນເໜືອ ແລະ ຕາເວັນອອກຂອງລັດຍົກຍ້າຍເພື່ອຄວາມປອດໄພ.

ໂດຍໃຫ້ປະຊາຊົນໄປພັກຢູ່ຕາມສະໜາມບານເຕະ ຫຼື ພື້ນທີ່ສ່ວນກາງຕາມເມືອງຕ່າງໆ. ຂະນະທີ່ເຈົ້າໜ້າທີ່ຂອງລັດຖະບານກາງ ເລັ່ງເຂົ້າພື້ນທີ່ປະສົບໄພເພື່ອຊ່ວຍຍົກຍ້າຍປະຊາຊົນ.

ໂດຍລະບຸວ່າ ນີ້ຖືເປັນການຍົກຍ້າຍຄັ້ງໃຫຍ່ທີ່ສຸດໃນປະຫວັດສາດຂອງຊາວລັດແມນິໂທບາ ຊຶ່ງຕ້ອງອາໄສທຸນມະຊົນ ແລະ ຄວາມຮ່ວມມືຈາກທຸກລະດັບ.

ຮູບຖ່າຍທາງອາກາດເມື່ອວັນທີ 27 ພຶດສະພາ 2025 ສະແດງໃຫ້ເຫັນໄຟປ່າທີ່ກຳລັງລຸກໄໝ້ຢູ່ໃນເມືອງເຊີຣິດອນ ລັດແມນິໂທບາ ປະເທດການາດາ

ສ່ວນທີ່ລັດ Alberta ໄຟປ່າທີ່ແຜ່ລາມໃນພື້ນທີ່ສົ່ງຜົນໃຫ້ການຜະລິດນ້ຳມັນ ແລະ ແກັສບາງສ່ວນຕ້ອງຢຸດພັກເປັນການຊົ່ວຄາວ ແລະ ເຮັດໃຫ້ປະຊາຊົນໃນເມືອງນ້ອຍຢ່າງໜ້ອຍໜຶ່ງເມືອງຕ້ອງຍົກຍ້າຍອອກຈາກພື້ນທີ່ປະສົບໄພ.

ຂະນະນີ້ມີໄຟປ່າທັງໝົດ 163 ຈຸດທົ່ວການາດາ ສາມາດຄວບຄຸມໄດ້ເຄິ່ງໜຶ່ງ.

ທັງນີ້ ໃນປີ 2023 ການາດາຕ້ອງປະເຊີນກັບລະດູໄຟປ່າທີ່ຮຸນແຮງທີ່ສຸດ ໂດຍມີໄຟປ່າຫຼາຍກວ່າ 6,000 ຄັ້ງ ເຜົາພື້ນທີ່ໄປບໍ່ໜ້ອຍກວ່າ 93 ລ້ານໄຣ່ ຫຼື ຫຼາຍກວ່າພື້ນທີ່ຂອງທັງອັງກິດ ແລະ ຍັງຫຼາຍກວ່າສະຖິຕິໃນປີ 1989 ເຖິງສອງເທົ່າ.

ຂະນະທີ່ຕາມປົກກະຕິແລ້ວການາດາຈະຖືກໄຟປ່າເຜົາພື້ນທີ່າຍກວ່າ 15 ລ້ານໄຣ່ໃນທຸກໆປີ.

ແຄລິຟໍເນຍພັດທະນາຊຸມຊົນຕົ້ນແບບຕ້ານໄຟປ່າ

ໃນຂະນະດຽວກັນ ຢູ່ສະຫະລັດອາເມລິກາ ໂດຍສະເພາະລັດແຄລິຟໍເນຍທີ່ມັກປະເຊີນໄຟປ່າຖີ່ຂຶ້ນ ແລະ ຮຸນແຮງຫຼາຍຍິ່ງຂຶ້ນ ຈົນເຮັດໃຫ້ເກີດການພັດທະນາຊຸມຊົນທີ່ສາມາດຕ້ານທານຕໍ່ໄຟໄດ້ຂຶ້ນມາ ຢູ່ໃນເມືອງ Escondido ລັດແຄລິຟໍເນຍ.

ບ້ານຈໍານວນ 64 ຫຼັງຢູ່ໃນຊຸມຊົນ ຖືກສ້າງຂຶ້ນໂດຍໃຊ້ວັດສະດຸທີ່ທົນທານຕໍ່ຄວາມຮ້ອນ ທັງຫຼັງຄາທີ່ທົນໄຟ, ປູນທາພາຍນອກ, ໜ້າຕ່າງນິລະໄພ, ຊ່ອງລະບາຍອາກາດ, ລວມເຖິງຜະໜັງທີ່ບໍ່ຕິດໄຟງ່າຍ.

ນອກຈາກນີ້ບ້ານແຕ່ລະຫຼັງຍັງມີພື້ນທີ່ຮອບບ້ານຢ່າງໜ້ອຍ 5 ຟຸດ ຊຶ່ງອອກແບບມາເພື່ອຫຼຸດຜ່ອນຄວາມສ່ຽງຈາກໄຟປ່າໃນກໍລະນີເກີດລົມແຮງ ຊຶ່ງອາດເຮັດໃຫ້ໄຟແຜ່ລາມໄດ້ຢ່າງວ່ອງໄວຖ້າບ້ານແຕ່ລະຫຼັງປູກໃກ້ກັນ.

ຖ້າໄດ້ຜົນດີອາດຈະຕໍ່ຍອດກາຍເປັນຊຸມຊົນຕົ້ນແບບໃນອະນາຄົດໄດ້.

ຕາມຂໍ້ມູນຢູ່ໃນເວັບໄຊຂອງຜູ້ຮັບເໝົາ ລະບຸວ່າ ບ້ານແຕ່ລະຫຼັງມີຄ່າໃຊ້ຈ່າຍຢູ່ທີ່ຫຼັງລະຫຼາຍກວ່າ 1 ລ້ານໂດລາສະຫະລັດ ເຖິງແມ່ນວ່າຍັງດຳເນີນການກໍ່ສ້າງຢູ່ ແຕ່ບາງຫຼັງກໍ່ມີຜູ້ຈັບຈອງ ແລ ະປິດການຂາຍແລ້ວ ຊຶ່ງຜູ້ຢູ່ອາໄສບາງສ່ວນກໍ່ເຂົ້າໄປອາໄສຢູ່ໃນຊຸມຊົນແລ້ວ.

ສ່ວນເມື່ອເດືອນເມສາທີ່ຜ່ານມາ ລາຄາຂາຍສະເລ່ຍຂອງບ້ານໃນແຄລິຟໍເນຍຢູ່ທີ່ 855,300 ໂດລາ ເພີ່ມຂຶ້ນຮ້ອຍລະ 0.3 ເມື່ອທຽບກັບປີກ່ອນ.

ຂະນະທີ່ຂໍ້ມູນປະມານການ ຊີ້ວ່າ ມູນຄ່າບ້ານສະເລ່ຍໃນແຄລິຟໍເນຍຢູ່ທີ່ 796,255 ໂດລາ  ເພີ່ມຂຶ້ນ 1.3% ເມື່ອທຽບກັບປີທີ່ແລ້ວ.

ສະແດງຄຳຄິດເຫັນ