ສຳນັກຂ່າວກາງ KCNA ຂອງລັດຖະບານເກົາຫຼີເໜືອລາຍງານໃນມື້ນີ້ວ່າ ຄິມຈົງອຶນ ຜູ້ນຳສູງສຸດຂອງເກົາຫຼີເໜືອ ເປັນປະທານການປະຊຸມພັກຄອມມິວນິດເກົາຫຼີເໜືອ ເພື່ອເພີ່ມຄວາມແຂງແກ່ງກອງທັບເກົາຫຼີເໜືອ.

ການປະຊຸມມີຂຶ້ນເມື່ອວັນພຸດທີ 28 ພຶດສະພາທີ່ຜ່ານມາ.

ນອກຈາກນີ້ ຜູ້ນຳຄິມຍັງຄວບຄຸມການຊ້ອມຍິງປືນໃຫຍ່ໃນວັນພະຫັດທີ 29 ພຶດສະພາດ້ວຍ ແຕ່ບໍ່ມີການເປີດເຜີຍສະຖານທີ່ທັງສະຖານທີ່ປະຊຸມ ແລະ ການຊ້ອມຍິງປືນໃຫຍ່.

ຜູ້ນຳຄິມກ່າວໃນການປະຊຸມດັ່ງກ່າວ ຊຶ່ງເປັນການປະຊຸມທີ່ຕໍ່ເນື່ອງມາຈາກການປະຊຸມຄະນະກຳມະການການທະຫານກາງຊຸດທີ 8 ຂອງພັກຄົນງານແຫ່ງເກົາຫຼີ ຫຼື ພັກຄອມມິວນິດເກົາຫຼີເໜືອວ່າ ເປັນເລື່ອງສຳຄັນຫຼາຍທີ່ຈະຕ້ອງເຮັດການແຂ່ງຂັນການຊ້ອມຍິງໃນສະພາບແວດລ້ອມທາງການຣົບທີ່ໃກ້ຄຽງຄວາມເປັນຈິງ ເພື່ອສ້າງເສີມໃຫ້ກອງທັບເກົາຫຼີເໜືອເປັນກອງທັບທີ່ທົງພະລັງ.

ຜູ້ນຳຄິມເນັ້ນຢ້ຳບົດບາດຂອງອົງການປົກຄອງຂອງພັກຄອມມິວນິດເກົາຫຼີເໜືອ ໃນການປະຕິບັດຕາມມາດຕະການຕ່າງໆທີ່ກຳໜົດໂດຍຜູ້ນຳຈາກສ່ວນກາງດ້ວຍຄວາມເຂັ້ມແຂງ ເພື່ອແກ້ໄຂບັນຫາທຸກຢ່າງທີ່ກ່ຽວຂ້ອງກັບການເສີມສ້າງກອງທັບແລະກິດຈະກຳຂອງກອງທັບເກົາຫຼີເໜືອ.

ທັງນີ້ ຄວາມເຄື່ອນໄຫວຜູ້ນຳຄິມຫຼ້າສຸດທີ່ລາຍງານໂດຍ KCNA ໃນຊ່ວງຫຼາຍອາທິດທີ່ຜ່ານມາ ເນັ້ນທີ່ການເພີ່ມຄວາມແຂງແກ່ງໃຫ້ແກ່ກອງທັບເກົາຫຼີເໜືອ.

ສະແດງຄຳຄິດເຫັນ