ຄະນະກຳມະການກຳກັບຫຼັກຊັບ ແລະ ຕະຫຼາດຫຼັກຊັບສະຫະລັດ (SEC) ໄດ້ຖອນຟ້ອງຄະດີແພ່ງຕໍ່ Binance ບໍລິສັດຊື້ຂາຍ cryptocurrency ທີ່ໃຫຍ່ທີ່ສຸດໃນໂລກ

ໂດຍຄຳຮ້ອງຖອນຟ້ອງນີ້ຍື່ນເມື່ອວັນພະຫັດ (29 ພຶດສະພາ) ແລະ ເປັນການຖອນຟ້ອງໂດຍຕັດສິດບໍ່ໃຫ້ຟ້ອງໃໝ່ ຊຶ່ງສະທ້ອນແນວທາງກຳກັບດູແລໃໝ່ຕໍ່ຕະຫຼາດ cryptocurrency ນັບຕັ້ງແຕ່ປະທານາທິບໍດີໂດນານ ທຣຳ ກັບເຂົ້າທຳນຽບຂາວ.

SEC ລະບຸວ່າ ການຕັດສິນໃຈນີ້ “ເປັນໄປຕາມດຸນຍະພິນິດ ແລະ ເປັນເລື່ອງນະໂຍບາຍ” ຂະນະທີ່ Binance ຍົກຍ້ອງຄວາມເຄື່ອນໄຫວນີ້ວ່າເປັນ “ຊ່ວງເວລາສຳຄັນທາງປະຫວັດສາດ” ພ້ອມໃຫ້ເຄຣດິດ ທ່ານ ພອນ ແອດຄິນສ໌ ປະທານ SEC ແລະລັດຖະບານທຣຳ ທີ່ຕະຫນັກວ່າ “ນະວັດກຳຈະເຕີບໂຕບໍ່ໄດ້ ຖ້າຖືກກຳກັບດູແລດ້ວຍການບັງຄັບໃຊ້ກົດໝາຍເປັນຫຼັກ”

ສຳລັບຄຳຟ້ອງເກົ່າເມື່ອເດືອນມິຖຸນາ 2023 ນັ້ນ ກ່າວຫາ Binance ແລະ ຈາງເຜິງ ຈາວ ຜູ້ກໍ່ຕັ້ງ ວ່າປັ່ນຍອດປະລິມານການຊື້ຂາຍ ຈັດການເງິນທຶນລູກຄ້າຢ່າງບໍ່ເໝາະສົມ ແລະ ໃຫ້ຂໍ້ມູນເທັດແກ່ນັກລົງທຶນ

ໂດຍຄະດີແພ່ງນີ້ແຍກຕ່າງຫາກຈາກກໍລະນີທີ່ Binance ຮັບສາລະພາບຜິດເມື່ອເດືອນພະຈິກ 2023 ແລະ ຖືກປັບ 4.32 ພັນລ້ານໂດລາ ໃນຂໍ້ຫາລະເມີດກົດໝາຍຕ້ານການຟອກເງິນ ອັນເປັນເຫດໃຫ້ຈາງເຜິງ ຈາວໄດ້ຮັບໂທດຈຳຄຸກ 4 ເດືອນ.

ທັງນີ້ ລັດຖະບານທຣຳໄດ້ສົ່ງສັນຍານເຖິງທ່າທີທີ່ຜ່ອນຜັນຫຼາຍຂຶ້ນຕໍ່ຕະຫຼາດ cryptocurrency ໂດຍ SEC ໄດ້ຖອນຫຼືລະງັບການດຳເນີນການບັງຄັບໃຊ້ກົດໝາຍຫຼາຍກໍລະນີທີ່ລິເລີ່ມໃນສະໄໝລັດຖະບານຊຸດກ່ອນ.

ສະແດງຄຳຄິດເຫັນ