ສຳນັກບໍລິຫານຜະລິດຕະພັນທາງການແພດແຫ่ງຊາດຈີນ ເຜີຍວ່າຈີນໄດ້ອະນຸມັດວັກຊີນປ້ອງກັນເຊື້ອໄວຣັສເອຊພີວີ (HPV) ຊະນິດຄອບຄຸມ 9 ສາຍພັນ ທີ່ພັດທະນາຂື້ນເອງພາຍໃນປະເທດເປັນຄັ້ງທຳອິດເມື່ອວັນພະຫັດ (29 ພຶດສະພາ 2025) ທີ່ຜ່ານມາ

ການອະນຸມັດວັກຊີນ “ເຊໂຄລິນ 9” ທີ່ຮ່ວມພັດທະນາໂດຍຫ້ອງປະຕິບັດການຊີວະການແພດສຽງອັນ ມະຫາວິທະຍາໄລຊ່ຽຍເຫມິນ ແລະ ວ່ານໄທ່ ໄບໂອຟາມ (Wantai BioPharm) ເຮັດໃຫ້ຈີນກາຍເປັນປະເທດທີ່ສອງຂອງໂລກ ຮອງຈາກສະຫະລັດ ທີ່ສາມາດຈັດຫາວັກຊີນປ້ອງກັນເຊື້ອເອຊພີວີທີ່ມີຄວາມຄອບຄຸມສູງ (high-valency) ໄດ້ຢ່າງອິດສະຫຼະ

ລາຍງານລະບຸວ່ານັບຕັ້ງແຕ່ປີ 2019 ວັກຊີນເຊໂຄລິນ 9 ຜ່ານການທົດລອງທາງຄລີນິກທີ່ດຳເນີນການທົ່ວປະເທດ 5 ຄັ້ງ ໂດຍມີອາສາສະໝັກສຸຂະພາບດີອາຍຸລະຫວ່າງ 9-45 ປີ ເຂົ້າຮ່ວມກວ່າ 11,000 ຄົນ

ຜົນການທົດລອງເຜີຍວ່າວັກຊີນເຊໂຄລິນ 9 ສາມາດປ້ອງກັນເຊື້ອໄວຣັສເອຊພີວີ ສາຍພັນທຸ໌ 16 ແລະ 18 ໄດ້ຢ່າງແຂງແກ່ງ

ຊຶ່ງທັງສອງສາຍພັນທຸ໌ນີ້ເປັນສາຍພັນທຸ໌ດຽວກັນກັບທີ່ອອກລິດຄອບຄຸມໃນວັກຊີນປ້ອງກັນແບບ 2 ສາຍພັນທຸ໌ ຮວມທັງຍັງປ້ອງກັນເຊື້ອໄວຣັສເອຊພີວີຊະນິດອື່ນອີກ 5 ສາຍພັນທຸ໌ ໄດ້ແກ່ 31, 33, 45, 52 ແລະ 58 ໂດຍມີອັດຕາປ້ອງກັນການຕິດເຊື້ອກວ່າຮ້ອຍລະ 98 ຕໍ່ເນື່ອງນານກວ່າ 12 ເດືອນ ແລະ ອັດຕາການປ້ອງກັນການຕິດເຊື້ອທີ່ປາກມົດລູກຮ້ອຍລະ 100

ສຳລັບເດັກຍິງອາຍຸ 9-17 ປີ ສັກວັກຊີນພຽງ 2 ໂດສພຽງພໍຈະໃຫ້ການຕອບສະໜອງທາງພູມຄຸ້ມກັນທຽບເທົ່າກັບໃນກຸ່ມຜູ້ຍິງອາຍຸ 18-26 ປີ ທີ່ໄດ້ຮັບວັກຊີນ 3 ໂດສ ແລະ ສຳລັບເດັກຍິງອາຍຸ 15-17 ປີ ປັດຈຸບັນວັກຊີນນີ້ເປັນວັກຊີນປ້ອງກັນເຊື້ອໄວຣັສເອຊພີວີແບບສັກ 2 ໂດສພຽງຊະນິດດຽວທີ່ມີພ້ອມໃຫ້ບໍລິການໃນຈີນ

ການສຶກສາເຜີຍວ່າວັກຊີນຊະນິດໃໝ່ໃຫ້ການຕອບສະໜອງທາງພູມຄຸ້ມກັນເທຽບທຽມໄດ້ກັບຜະລິດຕະພັນທີ່ຄ້າຍຄືກັນໃນຕ່າງປະເທດເປັນເວລາຢ່າງໜ້ອຍ 30 ເດືອນ ຫຼັງຈາກໄດ້ຮັບວັກຊີນຄົບຖ້ວນ ໂດຍຜົນການວິໄຈດັ່ງກ່າວໄດ້ຮັບການເຜີຍແຜ່ໃນວາລະສານໂລກຕິດເຊື້ອແລນເຊັດ (The Lancet Infectious Diseases)

ວັກຊີນຕົວໃໝ່ນີ້ເປັນຄວາມສຳເລັດລ່າສຸດຈາກທີມວິໄຈທີ່ພັດທະນາວັກຊີນເຊື້ອໄວຣັສເອຊພີວີແບບຄອບຄຸມ 2 ສາຍພັນທີ່ຜະລິດໃນຈີນເປັນຄັ້ງທຳອິດໃນປີ 2019 ຕໍ່ມາໃນປີ 2021 ວັກຊີນຕົວດັ່ງກ່າວໄດ້ຮັບການຮັບຮອງຄຸນສົມບັດລ່ວງໜ້າຈາກອົງການອະນາໄມໂລກ (WHO) ແລະ ໄດ້ເຂົ້າສູ່ຕະຫຼາດໃນ 21 ປະເທດແລ້ວ

ອົງການດັ່ງກ່າວເຜີຍວ່າມະເຮັງປາກມົດລູກເປັນມະເຮັງທີ່ພົບຫຼາຍເປັນອັນດັບສີ່ໃນຜູ້ຍິງທົ່ວໂລກໃນປີ 2022 ດ້ານຄະນະກຳມະການສຸຂະພາບແຫ່ງຊາດຈີນເຜີຍວ່າຈີນດຳເນີນໂຄງການສັກວັກຊີນເອຊພີວີໂດຍບໍ່ເສຍຄ່າໃຊ້ຈ່າຍໃຫ້ກັບເດັກຜູ້ຍິງອາຍຸ 13-14 ປີ ປະມານຮ້ອຍລະ 40 ໃນປີ 2024 ຊຶ່ງເປັນສ່ວນໜຶ່ງຂອງຄວາມພະຍາຍາມຮັບມືກັບມະເຮັງປາກມົດລູກ

ສະແດງຄຳຄິດເຫັນ