ທາງການຈີນອອກຖະແຫຼງການຕອບໂຕ້ສະຫະລັດໃນວັນນີ້ (2 ມິຖຸນາ)

 

ທາງການຈີນອອກຖະແຫຼງການຕອບໂຕ້ສະຫະລັດໃນວັນນີ້ (2 ມິຖຸນາ) ວ່າຝ່າຍສະຫະລັດເອງທີ່ເປັນຜູ້ລະເມີດຂໍ້ຕົກລົງທາງການຄ້າທີ່ທັງສອງປະເທດບັນລຸຮ່ວມກັນທີ່ນະຄອນເຈນີວາຂອງສະວິດເຊີແລນ ເມື່ອເດືອນພຶດສະພາ

 

ຫຼັງຈາກເມື່ອວັນສຸກທີ່ຜ່ານມາປະທານາທິບໍດີໂດນາລ ທຣຳ ກ່າວຫາຈີນວ່າລະເມີດຂໍ້ຕົກລົງກັບສະຫະລັດ “ໂດຍສິ້ນເຊີງ” ໂດຍບໍ່ໄດ້ໃຫ້ລາຍລະອຽດເພີ່ມເຕີມ ພ້ອມທັງປະກາດຂຶ້ນພາສີເຫຼັກ ແລະ ອາລູມິນຽມຈາກ 25% ເປັນ 50% ທີ່ຈະມີຜົນໃນວັນພຸດນີ້ ດ້ວຍເຫດຜົນວ່າຈະຊ່ວຍກະຕຸ້ນອຸດສາຫະກຳເຫຼັກໃນປະເທດ ແລະ ຫຼຸດການເພິ່ງພາຈີນ

 

ໃນຂະນະທີ່ຜູ້ແທນການຄ້າສະຫະລັດ ເຈມີສັນ ເກຣຍ ລະບຸວ່າຈີນບໍ່ຍອມຍົກເລີກອຸປະສັກທາງການຄ້າຕາມທີ່ຕົກລົງກັນໄວ້ ຊຶ່ງຈີນປະກາດວ່າຈະດຳເນີນມາດຕະການຕອບໂຕ້ເພື່ອປົກປ້ອງຜົນປະໂຫຍດສູງສຸດຂອງປະເທດ

 

ດ້ານກະຊວງການຄ້າຂອງຈີນລະບຸວ່າສະຫະລັດໄດ້ທຳລາຍຂໍ້ຕົກລົງການຄ້າທີ່ທັງສອງປະເທດບັນລຸຮ່ວມກັນຢ່າງຮ້າຍແຮງ ຊຶ່ງໃນຂໍ້ຕົກລົງດັ່ງກ່າວທີ່ລວມເຖິງການຫຼຸດພາສີນຳເຂົ້າສິນຄ້າລະຫວ່າງກັນ ໂດຍສະຫະລັດຫຼຸດພາສີສິນຄ້າຈາກຈີນຈາກ 145% ເຫຼືອ 30% ຂະນະທີ່ຈີນຫຼຸດພາສີສິນຄ້າຈາກສະຫະລັດຈາກ 125% ເຫຼືອ 10%

 

ນີ້ເປັນການເພີ່ມຄວາມຕຶງເຄັ່ງໃນສົງຄາມການຄ້າລະຫວ່າງເສດຖະກິດໃຫຍ່ທີ່ສຸດສອງແຫ່ງຂອງໂລກ ແລະ ສ້າງຄວາມບໍ່ແນ່ນອນຕໍ່ຄວາມສຳພັນທາງເສດຖະກິດໃນອະນາຄົດ

 

ນອກຈາກນີ້ ທາງການຈີນຍັງກ່າວວ່າຝັ່ງສະຫະລັດໄດ້ລະເມີດຂໍ້ຕົກລົງທີ່ປະທານາທິບໍດີສີ ຈິ້ນຜິງ ແລະ ປະທານາທິບໍດີໂດນາລ ທຣຳ ຕົກລົງກັນຮ່ວມຜ່ານທາງໂທລະສັບເມື່ອເດືອນມັງກອນ ຊຶ່ງການລະເມີດຂອງສະຫະລັດ ຈີນກ່າວວ່າຍັງລວມໄປເຖິງການລະງັບຂາຍຊອບແວຣອອກແບບຊິບໃຫ້ກັບບໍລິສັດຈີນ ຮວມໄປເຖິງການຖອນວີຊ່ານັກຮຽນຊາວຈີນໃນສະຫະລັດດ້ວຍ

 

ຂະນະດຽວກັນ BBC ລາຍງານວ່າເຈົ້າໜ້າທີ່ລະດັບສູງຂອງທຳນຽບຂາວ 2 ຄົນເປີດເຜີຍເມື່ອວານນີ້ (31 ພຶດສະພາ) ວ່າທຣຳ ແລະ ສີ ຈິ້ນຜິງ ອາດມີການເຈລະຈາກັນອີກຄັ້ງໃນໄວໆ ນີ້

 

ເຊັ່ນດຽວກັນກັບທາງຝັ່ງ ສກ໊ອດ ເບສເຊັນ ລັດຖະມົນຕີວ່າການກະຊວງການຄັງສະຫະລັດ ທີ່ໄດ້ກ່າວກັບສຳນັກຂ່າວ CBS News ວ່າລາຍລະອຽດຂອງຂໍ້ຕົກລົງຕ່າງໆ ຈະໄດ້ຮັບການ “ຕົກລົງກັນ” ເມື່ອທັງສອງຜູ້ນຳໄດ້ໂອລົມກັນ ແຕ່ຍັງບໍ່ມີການລະບຸວັນແລະເວລາທີ່ຊັດເຈນ

 

ທັງນີ້ ສະຖານການດັ່ງກ່າວສະທ້ອນເຖິງຄວາມຕຶງເຄັ່ງທີ່ເພີ່ມຂຶ້ນລະຫວ່າງສອງມະຫາອຳນາດທາງເສດຖະກິດຂອງໂລກ ຊຶ່ງອາດສົ່ງຜົນກະທົບຕໍ່ເສດຖະກິດໂລກໃນວົງກວ້າງຫຼັງຈາກນີ້ຕໍ່ໄປ

ສະແດງຄຳຄິດເຫັນ