ເນື້ອແດງ vs ເນື້ອຂາວ ແຍກປະເພດແນວໃດ ທຽບຂໍ້ດີ-ຂໍ້ເສຍ ເລືອກກິນເນື້ອສັດແບບໃດໃຫ້ດີຕໍ່ສຸຂະພາບ?

 

ເນື້ອສັດເພື່ອບໍລິໂພກໃນປັດຈຸບັນ ບໍ່ວ່າຈະເປັນເນື້ອໝູ ເນື້ອໄກ່ ເນື້ອງົວ ເນື້ອປາ ແລະ ອື່ນໆ ຕ່າງກໍເປັນແຫຼ່ງໂປຣຕີນຈາກສັດທີ່ມີລົດຊາດແລະຄຸນຄ່າທາງໂພຊະນາການສະເພາະຕົວ

 

ການຈຳແນກເນື້ອສັດເປັນ ເນື້ອຂາວ ຫຼື ເນື້ອແດງ ຂຶ້ນຢູ່ກັບຊະນິດຂອງສັດ ແລະ ປະລິມານໄມໂອໂກລບິນໃນກ້າມເນື້ອເປັນຫຼັກ ໄມໂອໂກລບິນເປັນໂປຣຕີນທີ່ພົບໃນເຊລກ້າມເນື້ອທີ່ຈັບກັບອົກຊີເຈນແລະທາດເຫຼັກ ເຮັດໃຫ້ກ້າມເນື້ອມີສີ

 

 

ເນື້ອແດງແມ່ນຫຍັງ?

 

ກະຊວງກະສິກຳຂອງສະຫະລັດ (USDA) ກຳນົດວ່າ ເນື້ອແດງ ຄືໂປຣຕີນທີ່ໄດ້ຈາກສັດລ້ຽງລູກດ້ວຍນົມ ເຊັ່ນ: ເນື້ອງົວ ເນື້ອໝູ ເນື້ອແກະ ແລະ ເນື້ອກວາງ ໂດຍທົ່ວໄປແລ້ວຈະມີສີແດງເມື່ອຍັງດິບ ເນື່ອງຈາກມີໂປຣຕີນໄມໂອໂກລບິນສູງ ແລະ ປ່ຽນເປັນສີແດງເຂັ້ມຫຼືສີນ້ຳຕານເມື່ອປຸງສຸກ

 

ເຖິງແມ່ນວ່າເນື້ອແດງຈະມີໄຂມັນອີ່ມຕົວສູງ ແຕ່ຫາກບໍລິໂພກໃນປະລິມານທີ່ເໝາະສົມ ເນື້ອແດງທີ່ບໍ່ຜ່ານການແປຮູບຍັງເປັນແຫຼ່ງຂອງໂປຣຕີນ ກົດໄຂມັນ ວິຕາມິນ ແລະ ແຮ່ທາດທີ່ສຳຄັນ ເຊັ່ນ ວິຕາມິນ D, B12, B6 ແລະ ສັງກະສີ

 

ຢ່າງໃດກໍຕາມ ການບໍລິໂພກເນື້ອແດງໃນປະລິມານຫຼາຍ ໂດຍສະເພາະເນື້ອແປຮູບ ເຊັ່ນ: ໄສ້ກອງ ເບຄອນ ແຮມ ຫຼື ຊາລາມິ ອາດເພີ່ມຄວາມສ່ຽງຕໍ່ໂລກຕ່າງໆ ເຊັ່ນ: ຄວາມດັນໂລຫິດສູງ ໂລກຫົວໃຈ ເບົາຫວານຊະນິດທີ 2 ແລະ ມະເຮັງບາງຊະນິດ ເນື່ອງຈາກການແປຮູບມັກໃຊ້ສານເຕີມແຕ່ງ ເຊັ່ນ: ເກືອ ຫຼື ໄນເຕຣດ ຊຶ່ງອາດກາຍເປັນສານກໍ່ມະເຮັງເມື່ອທຳປະຕິກິລິຍາກັບສານອື່ນໃນຮ່າງກາຍ

 

ເນື້ອແດງມີຫຍັງແດ່?

 

ເນື້ອງົວ: ເນື້ອທຸກສ່ວນ ລວມທັງສະເຕັກ ເນື້ອຍ່າງ ແລະ ເນື້ອບົດ ເນື້ອງົວເປັນແຫຼ່ງທີ່ດີຂອງໂປຣຕີນທີ່ມີຄຸນນະພາບສູງ ມີກົດອະມິໂນທີ່ຈຳເປັນທັງໝົດ ແລະ ເອີ້ນວ່າເປັນແຫຼ່ງໂປຣຕີນທີ່ສົມບູນ

 

ເນື້ອໝູ: ເນື້ອໝູສ່ວນໃຫຍ່ ລວມທັງເນື້ອສັບ ແຮມ ແລະເບຄອນ ຍົກເວັ້ນເນື້ອສັນໃນ ເນື້ອໝູອຸດົມໄປດ້ວຍສານອາຫານປະເພດໂປຣຕີນ ກົດໄຂມັນ ກົດອະມິໂນທີ່ຈຳເປັນຕໍ່ການເຈີນເຕີບໂຕຂອງຮ່າງກາຍ

 

ເນື້ອແກະ: ເນື້ອແກະທັງໝົດ ລວມທັງເນື້ອສັບ, ຂາ ແລະ ເນື້ອແກະບົດ ດີຕໍ່ລະບົບພູມຄຸ້ມກັນ ເນື້ອແກະມີວິຕາມິນ ແລະ ແຮ່ທາດຈຳເປັນຫຼາຍ ໂດຍສະເພາະທາດເຫຼັກ ວິຕາມິນບີ ແລະໂອເມກ້າ 3

 

ເນື້ອແບ້: ຖືເປັນເນື້ອແດງທີ່ມີປະໂຫຍດຕໍ່ສຸຂະພາບ ມີໄຂມັນອີ່ມຕົວ ແລະ ຄໍເລັສເຕໍຣອນຕ່ຳ ແລະ ມີທາດເຫຼັກສູງກວ່າເນື້ອແດງ ຫຼື ເນື້ອຂາວຊະນິດອື່ນໆ

 

ເນື້ອກວາງ: ມີໂປຣຕີນສູງຫຼາຍແຕ່ໄຂມັນຕ່ຳ ອີກທັງຍັງຊ່ວຍເສີມທາດເຫຼັກໄດ້ດີ

 

ເປັດແລະຫ່ານ: ເຖິງແມ່ນວ່າຈະເປັນສັດປີກ ແຕ່ເປັດແລະຫ່ານກໍຈັດເປັນເນື້ອແດງ ເນື່ອງຈາກກ້າມເນື້ອຂອງພວກມັນຖືກໃຊ້ຢ່າງຕໍ່ເນື່ອງ ສົ່ງຜົນໃຫ້ມີປະລິມານໄມໂອໂກລບິນທີ່ສູງຂຶ້ນ ໂປຣຕີນສູງ ທາດເຫຼັກຫຼາຍກວ່າເນື້ອງົວ

 

 

ປະໂຫຍດຈາກເນື້ອແດງ

 

• ທາດເຫຼັກ: ເນື້ອແດງເປັນແຫຼ່ງສຳຄັນຂອງທາດເຫຼັກຮ້ຽມ ຊຶ່ງຮ່າງກາຍດູດຊຶມໄດ້ງ່າຍກວ່າເມື່ອທຽບກັບທາດເຫຼັກທີ່ບໍ່ແມ່ນຮ້ຽມທີ່ພົບໃນອາຫານຈາກພືດ ນີ້ເປັນສິ່ງສຳຄັນຢ່າງຍິ່ງສຳລັບບຸກຄົນທີ່ມີແນວໂນ້ມເປັນໂລກໂລຫິດຈາງຈາກການຂາດທາດເຫຼັກ
• ວິຕາມິນບີສູງ: ເນື້ອແດງມີວິຕາມິນບີໃນລະດັບສູງ ໂດຍສະເພາະວິຕາມິນບີ 12 ຊຶ່ງຈຳເປັນຕໍ່ການເຮັດວຽກຂອງເສັ້ນປະສາດແລະການສ້າງ DNA ແລະເຊລເມັດເລືອດແດງ ວິຕາມິນບີ 12 ຊຶ່ງບໍ່ສາມາດພົບຕາມທຳມະຊາດໄດ້
• ສັງກະສີແລະຊີລີນຽມ: ເປັນແຫຼ່ງສັງກະສີທີ່ດີ ມີຄວາມສຳຄັນຕໍ່ການເຮັດວຽກຂອງລະບົບພູມຄຸ້ມກັນ ແລະ ຊີລີນຽມຊຶ່ງມີບົດບາດສຳຄັນໃນການເຜົາຜານ ແລະ ການເຮັດວຽກຂອງຕອມໄທຣອຍ
• ໂປຣຕີນຄົບຖ້ວນ: ເນື້ອແດງມີໂປຣຕີນຄົບຖ້ວນພ້ອມດ້ວຍກົດອະມິໂນທີ່ຈຳເປັນຕໍ່ການເຮັດວຽກຂອງຮ່າງກາຍ
• ມີສ່ວນຊ່ວຍໃນການເຈີນເຕີບໂຕ ແລະ ບຳລຸງຮັກສາກ້າມເນື້ອ: ໂປຣຕີນຄຸນນະພາບສູງ ແລະ ກົດອະມິໂນທີ່ຈຳເປັນໃນເນື້ອແດງມີປະໂຫຍດຕໍ່ການຈະເລີນເຕີບໂຕ ການຊ່ອມແຊມ ແລະ ການບຳລຸງຮັກສາຂອງກ້າມເນື້ອ ໂດຍສະເພາະຢ່າງຍິ່ງທີ່ສຳຄັນສຳລັບນັກກິລາ ແລະ ຜູ້ສູງອາຍຸ

 

ເນື້ອຂາວແມ່ນຫຍັງ?

 

ເນື້ອຂາວ ໝາຍເຖິງໂປຣຕີນຈາກສັດທີ່ມີສີຂາວທັງກ່ອນ ແລະ ຫຼັງປຸງສຸກ ໂດຍທົ່ວໄປຈະມາຈາກສັດປີກ ເຊັ່ນ: ໄກ່ ລວມເຖິງປາສ່ວນໃຫຍ່ ສັດເຫຼົ່ານີ້ມີເສັ້ນໃຍກ້າມເນື້ອທີ່ປັບໃຫ້ເຂົ້າກັບກິດຈະກຳຊ່ວງສັ້ນໆ ໂດຍເນື້ອຂາວມີປະລິມານໄມໂອໂກລບິນນ້ອຍກວ່າເນື້ອແດງ ຈຶ່ງມີໄຂມັນອີ່ມຕົວນ້ອຍກວ່າ ແລະ ຈັດວ່າເປັນເນື້ອທີ່ໄຂມັນຕ່ຳ

 

ຢ່າງໃດກໍຕາມ ເນື້ອສັດປີກບາງຊະນິດ ເຊັ່ນ: ໄກ່ ຫຼືໄກ່ງວງ ມີທັງ ເນື້ອຂາວ (light meat) ແລະ ເນື້ອດຳ (dark meat) ຂຶ້ນຢູ່ກັບປະເພດຂອງເສັ້ນໃຍກ້າມເນື້ອ

 

ເນື້ອຂາວ ມີເສັ້ນໃຍກ້າມເນື້ອແບບໄວ (fast-twitch) ສຳລັບການເຄື່ອນໄຫວສັ້ນໆ ວ່ອງໄວ ເຊັ່ນ: ອົກໄກ່

 

ເນື້ອດຳ ມີເສັ້ນໃຍກ້າມເນື້ອແບບຊ້າ (slow-twitch) ໃຊ້ສຳລັບການເຄື່ອນໄຫວຕໍ່ເນື່ອງ ເຊັ່ນ: ຂາໄກ່ ຊຶ່ງມີໄມໂອໂກລບິນ ແລະ ໄຂມັນສູງກວ່າ ເນື້ອດຳຈຶ່ງມີລົດຊາດເຂັ້ມຂຸ້ນກວ່າເນື້ອຂາວ

 

 

ເນື້ອຂາວມີຫຍັງແດ່?

 

ເນື້ອໄກ່: ເນື້ອໄກ່ທຸກສ່ວນເປັນເນື້ອຂາວ ຈັດເປັນແຫຼ່ງໂປຣຕີນທີ່ຍ່ອຍງ່າຍ ໄຂມັນນ້ອຍ ມີວິຕາມິນຫຼາກຫຼາຍ ແລະ ກົດອະມິໂນຈຳເປັນ

 

ເນື້ອປາ: ປາທຸກປະເພດເປັນເນື້ອຂາວ ເນື້ອປາເປັນໂປຣຕີນທີ່ຍ່ອຍງ່າຍ ບຳລຸງສະໝອງ ແລະ ລະບົບປະສາດ ລວມເຖິງມີສ່ວນຊ່ວຍໃນການຫຼຸດຄວາມສ່ຽງໂລກຕ່າງໆ

 

ອາຫານທະເລ: ກຸ້ງ ປູ ກຸ້ງກ້າມກາມ ແລະ ຫອຍອື່ນໆ ອຸດົມໄປດ້ວຍໂປຣຕີນ ກົດໄຂມັນໂອເມກ້າ 3 ແລະ ແຮ່ທາດຕ່າງໆ ທີ່ຈຳເປັນຕໍ່ຮ່າງກາຍ

 

ເນື້ອໝູ: ບາງສ່ວນຂອງເນື້ອໝູ ເຊັ່ນG ສ່ວນສັນໃນ ອາດເອີ້ນໄດ້ວ່າເປັນເນື້ອຂາວ ແຕ່ການຈັດປະເພດທາງວິທະຍາສາດຄວາມຈິງແລ້ວຈັດວ່າເປັນເນື້ອແດງ ເນື່ອງຈາກມີປະລິມານໄມໂອໂກລບິນສູງກວ່າເມື່ອປຽບທຽບກັບສັດປີກ ແລະ ປາ

 

ສັນໃນໝູ

 

ປະໂຫຍດຈາກເນື້ອຂາວ

 

ໄຂມັນອີ່ມຕົວແລະຄໍເລັສເຕໍຣອນຕ່ຳກວ່າ:

 

ເນື້ອຂາວ ໂດຍສະເພາະເນື້ອສັດປີກແລະປາ ມັກມີໄຂມັນອີ່ມຕົວແລະຄໍເລັສເຕໍຣອນນ້ອຍກວ່າເມື່ອທຽບກັບເນື້ອແດງ ເຮັດໃຫ້ເປັນທາງເລືອກທີ່ດີຕໍ່ສຸຂະພາບຂອງຫົວໃຈແລະການຈັດການຄໍເລັສເຕໍຣອນ

 

ໂປຣຕີນຄຸນນະພາບສູງ:

 

ເນື້ອຂາວເປັນແຫຼ່ງໂປຣຕີນໄຮ້ມັນທີ່ດີເລີດ ຊຶ່ງຈຳເປັນສຳລັບການຈະເລີນເຕີບໂຕ ແລະ ການຊ່ອມແຊມກ້າມເນື້ອ ໂດຍບໍ່ມີໄຂມັນອີ່ມຕົວເພີ່ມເຕີມ

 

ອຸດົມໄປດ້ວຍສານອາຫານຫຼາຍຊະນິດ:

 

ປາຊຶ່ງເປັນເນື້ອຂາວຊະນິດໜຶ່ງມີກົດໄຂມັນໂອເມກ້າ 3 ສູງ ຊຶ່ງມີປະໂຫຍດຕໍ່ສຸຂະພາບຂອງຫົວໃຈ ການເຮັດວຽກຂອງສະໝອງ ແລະທການຫຼຸດການອັກເສບ

 

ປະລິມານແຄລໍຣີທີ່ຕ່ຳກວ່າ:

 

ໂດຍທົ່ວໄປແລ້ວ ເນື້ອຂາວມີແຄລໍຣີນ້ອຍກວ່າເນື້ອແດງ ຈຶ່ງເປັນຕົວເລືອກທີ່ດີກວ່າສຳລັບການຄວບຄຸມນ້ຳໜັກ ແລະ ການອົດອາຫານ

 

ຄວາມສ່ຽງດ້ານສຸຂະພາບທີ່ຫຼຸດລົງ:

 

ການບໍລິໂພກເນື້ອຂາວຊ່ວຍຫຼຸດຄວາມສ່ຽງໃນການເກີດໂລກບາງຊະນິດໄດ້ ເຊັ່ນ: ມະເຮັງລຳໄສ້ໃຫຍ່ແລະໂລກຫົວໃຈ

 

ໃຊ້ງານໄດ້ຫຼາກຫຼາຍ:

 

ເນື້ອຂາວສາມາດນຳມາໃຊ້ໃນອາຫານໄດ້ຫຼາກຫຼາຍ ແລະມັກປຸງໄດ້ໄວກວ່າເນື້ອແດງ ເຮັດໃຫ້ເປັນຕົວເລືອກທີ່ສະດວກສຳລັບມື້ອາຫານ

 

ຂໍ້ດີຂໍ້ເສຍ ເນື້ອແດງ-ເນື້ອຂາວ

 

ເນື້ອຂາວ ເປັນເນື້ອທີ່ມີໄຂມັນນ້ອຍ ເສັ້ນໃຍໃນເນື້ອຄ່ອນຂ້າງລະອຽດ ມີຂໍ້ດີຄື ເປັນເນື້ອທີ່ດີຕໍ່ສຸຂະພາບ ມີແຄລໍຣີຕ່ຳ ຍ່ອຍງ່າຍ ມີກິ່ນຄາວນ້ອຍ ແຕ່ວິຕາມິນແລະແຮ່ທາດຕ່າງໆ ຍັງນ້ອຍກວ່າເນື້ອແດງ

 

ເນື້ອແດງ ເປັນແຫຼ່ງໂປຣຕີນ ແລະວິຕາມິນ ແຮ່ທາດທີ່ສຳຄັນຕໍ່ຮ່າງກາຍ ແຕ່ເນື້ອແດງນັ້ນຄ່ອນຂ້າງຍ່ອຍຍາກ ອາດເຮັດໃຫ້ມີບັນຫາກັບລຳໄສ້ຫຼາຍກວ່າ ຈຶ່ງຄວນຮັບປະທານໃນປະລິມານທີ່ເໝາະສົມ

 

ການຕັດສິນໃຈວ່າເນື້ອຂາວຫຼືເນື້ອແດງ “ດີກວ່າ” ຂຶ້ນຢູ່ກັບເປົ້າໝາຍດ້ານສຸຂະພາບຂອງແຕ່ລະຄົນ ຄວາມມັກດ້ານອາຫານ ແລະ ຄວາມຕ້ອງການທາງໂພຊະນາການສະເພາະຂອງແຕ່ລະຄົນ ເນື້ອສັດທັງສອງປະເພດມີຂໍ້ດີສະເພາະຕົວ ແລະ ສາມາດເປັນສ່ວນໜຶ່ງຂອງອາຫານເພື່ອສຸຂະພາບໄດ້

 

ສະແດງຄຳຄິດເຫັນ