ເມຕາ ແພລດຟອມສ໌ (Meta Platforms) ເຈົ້າຂອງເຟສບຸກ (Facebook) ແລະ ອິນສະຕາແກຣມ (Instagram) ສ້າງຄວາມຄຶກຄັກໂດຍ ການປະກາດບັນລຸຂໍ້ຕົກລົງຄັ້ງປະຫວັດສາດກັບ ຄອນສະເຕເລຊັນ ເອເນີຈີ (Constellation Energy) ບໍລິສັດພະລັງງານໃຫຍ່ຂອງສະຫະລັດ

ເພື່ອທຸ່ມເງິນສະໜັບສະໜູນໃຫ້ເຕົາປະຕິກອນນິວເຄລຍແຫ່ງໜຶ່ງ ໃນລັດອິລລິນອຍສ໌ຍັງຄົງເດີນເຄື່ອງຜະລິດໄຟຟ້າຕໍ່ໄປໄດ້ອີກເຖິງ 20 ປີ ນັບເປັນຄັ້ງທຳອິດທີ່ບໍລິສັດເທັກໂນໂລຢີຍັກສ໌ໃຫຍ່ຢ່າງເມຕາກະໂດດເຂົ້າມາລົງທຶນໂດຍກົງໃນໂຮງໄຟຟ້ານິວເຄລຍ

ຄວາມເຄື່ອນໄຫວນີ້ເກີດຂຶ້ນກາງສະຖານການທີ່ກຸ່ມບໍລິສັດເທັກໂນໂລຢີລາຍໃຫຍ່ກຳລັງພົບກັບຄວາມທ້າທາຍໃນການຈັດຫາພະລັງງານໄຟຟ້າໃຫ້ພຽງພໍຕໍ່ຄວາມຕ້ອງການທີ່ສູງຂຶ້ນຢ່າງກ້າວກະໂດດໃນສະຫະລັດ ເປັນຄັ້ງທຳອິດໃນຮອບ 2 ທົດສະວັດ ໂດຍມີປັດໄຈຫຼັກມາຈາກຄວາມຕ້ອງການພະລັງງານມະຫາສານຂອງລະບົບປັນຍາປະດິດ (AI) ແລະ ສູນກາງຂໍ້ມູນທີ່ຂະຫຍາຍຕົວຢ່າງວ່ອງໄວ

ປັດຈຸບັນ ໂຮງໄຟຟ້ານິວເຄລຍຄລິນຕັນ (Clinton Clean Energy Center) ຂອງຄອນສະເຕເລຊັນ ໄດ້ຮັບເງິນອຸດໜູນຈາກ ລັດອິລລິນອຍສ໌ ຜ່ານໂຄງການໃຫ້ເຄຣດິດການປ່ອຍແກັສເຮືອນກະຈົກເປັນສູນ ຊຶ່ງໃຊ້ເງິນທຶນສ່ວນໜຶ່ງຈາກຜູ້ໃຊ້ໄຟຟ້າ ເພື່ອສົ່ງເສີມການຜະລິດໄຟຟ້າສະອາດ

ຢ່າງໃດກໍຕາມ ໂຄງການນີ້ຈະສິ້ນສຸດລົງໃນປີ 2027 ຈຸດນີ້ເອງທີ່ຂໍ້ຕົກລົງຊື້ຂາຍໄຟຟ້າ (PPA) ຂອງເມຕາຈະເຂົ້າມາມີບົດບາດສຳຄັນ ໂດຍຈະອັດສີດເງິນທຶນ (ເປັນຈຳນວນທີ່ບໍ່ເປີດເຜີຍ) ເພື່ອຊ່ວຍໃນການຕໍ່ອາຍຸໃບອະນຸຍາດ ແລະ ສະໜັບສະໜູນການດຳເນີນງານຂອງໂຮງໄຟຟ້າຕໍ່ໄປ

ຂໍ້ຕົກລົງຄັ້ງນີ້ອາດກາຍເປັນແບບຈຳລອງຕົ້ນແບບທີ່ກະຕຸ້ນໃຫ້ບໍລິສັດເທັກໂນໂລຢີລາຍໃຫຍ່ເຈົ້າອື່ນໆ ຫັນມາໃຫ້ຄວາມສຳຄັນກັບການສະໜັບສະໜູນໂຮງໄຟຟ້ານິວເຄລຍທີ່ມີຢູ່ແລ້ວ ຄຽງຄູ່ໄປກັບການວາງແຜນໃຊ້ພະລັງງານຈາກໂຮງໄຟຟ້ານິວເຄລຍແຫ່ງໃໝ່ ແລະ ແຫຼ່ງພະລັງງານທາງເລືອກອື່ນໆ ເພື່ອປ້ອນໃຫ້ກັບສູນກາງຂໍ້ມູນຂອງຕົນ

ເອີຣວີ ປາເຣຄ ຫົວໜ້າຝ່າຍພະລັງງານລະດັບໂລກຂອງເມຕາ ກ່າວວ່າ “ສິ່ງທີ່ເຮົາໄດ້ຍິນຕະຫຼອດຈາກຜູ້ໃຫ້ບໍລິການສາທາລະນຸປະໂພກຄື ພວກເຂົາຕ້ອງການຄວາມໝັ້ນໃຈວ່າໂຮງໄຟຟ້າທີ່ເປີດດຳເນີນການຢູ່ທຸກມື້ນີ້ ຈະຍັງຄົງເດີນໜ້າຕໍ່ໄປໄດ້”

ທ່ານ ໂຈ ໂດມິງເກສ CEO ຂອງຄອນສະເຕເລຊັນ ເປີດເຜີຍວ່າ “ເຮົາກຳລັງເຈລະຈາກັບລູກຄ້າລາຍອື່ນໆ ທົ່ວປະເທດ ບໍ່ແມ່ນແຕ່ໃນ ອິລລິນອຍສ໌ ເພື່ອໃຫ້ພວກເຂົາເຂົ້າມາສະໜັບສະໜູນຄືທີ່ເມຕາເຮັດ ຊຶ່ງກໍຄືການສ້າງຫຼັກປະກັນໃຫ້ເຮົາສາມາດລົງທຶນຕໍ່ອາຍຸໃບອະນຸຍາດ ແລະ ເດີນເຄື່ອງຊິນຊັບເຫຼົ່ານີ້ຕໍ່ໄປໄດ້”

ຂະນະທີ່ ທ່ານ ບັອບບີ ເວນເດລ ເຈົ້າໜ້າທີ່ຈາກສະຫະພາບແຮງງານຊ່າງໄຟຟ້າສາກົນ ສະແດງຄວາມເຫັນວ່າ ຂໍ້ຕົກລົງນີ້ຈະຊ່ວຍສ້າງ “ຄວາມໝັ້ນຄົງໃນອາຊີບ” ໃຫ້ກັບພະນັກງານທີ່ໂຮງໄຟຟ້າແຫ່ງນີ້

ນອກຈາກນີ້ ຂໍ້ຕົກລົງດັ່ງກ່າວຍັງເປີດທາງໃຫ້ ຄອນສະເຕເລຊັນ ສາມາດຂະຫຍາຍກຳລັງການຜະລິດຂອງໂຮງໄຟຟ້າຄລິນຕັນ ຊຶ່ງປັດຈຸບັນມີກຳລັງການຜະລິດ 1,121 ເມກາວັດ (MW) ເພີ່ມຂຶ້ນອີກ 30 MW ໂດຍໂຮງໄຟຟ້າແຫ່ງນີ້ສາມາດຜະລິດໄຟຟ້າກະຈາຍໃຫ້ບ້ານເຮືອນໃນສະຫະລັດໄດ້ປະມານ 800,000 ຫຼັງ

ທັງນີ້ ໂຮງໄຟຟ້າ ຄລິນຕັນ ເລີ່ມເປີດດຳເນີນການມາຕັ້ງແຕ່ປີ 1987 ແລະ ເມື່ອປີ 2024 ຄອນສະເຕເລຊັນໄດ້ຍື່ນເລື່ອງຕໍ່ຄະນະກຳມະການກຳກັບກິດຈະການນິວເຄລຍຂອງສະຫະລັດ ເພື່ອຂໍຕໍ່ອາຍຸໃບອະນຸຍາດໄປຈົນເຖິງປີ 2047

ສະແດງຄຳຄິດເຫັນ