ກະຊວງຍຸດຕິທຳສະຫະລັດ ເປີດເຜີຍວ່າ ນັກວິທະຍາສາດຄົນຈີນສອງຄົນຖືກຈັບ ແລະ ຕັ້ງຂໍ້ຫາລັກລອບນຳເຂົ້າ “ຟັງກັສ” ຫຼື “ເຊື້ອລາ” ທີ່ເປັນພິດ ເຂົ້າສູ່ສະຫະລັດ ຊຶ່ງພວກເຂົາວາງແຜນຈະນຳມາໃຊ້ ໃນງານວິໄຈຂອງມະຫາວິທະຍາໄລໃນອາເມຣິກາ ຊຶ່ງຜູ້ທີ່ຖືກຈັບ ມີຊື່ວ່າ ຢູຊີງ ຈ້ຽນ ອາຍຸ 33 ປີ ແລະ ຊຸນຫຢົງ ຫລິວ ອາຍຸ 34 ປີ ຕາມລາຍງານລະບຸວ່າ ທັງສອງ ເປັນຄູ່ຮັກກັນ ຖືກຕັ້ງຂໍ້ຫາສົມຄົບຄິດ, ລັກລອບ ໃຫ້ຂ້ມູນທີ່ບໍ່ມີມູນຄວາມຈິງ ແລະ ປຼອມແປງວີຊ່າ

ກະຊວງຍຸດຕິທຳໃຫ້ລາຍລະອຽດເພີ່ມເຕີມວ່າ ສິ່ງທີ່ທັງສອງຄົນໄດ້ລັກລອບນຳເຂົ້າມາໃນສະຫະລັດ ຄືເຊື້ອລາທີ່ມີຊື່ວ່າ Fusarium Graminearum ຊຶ່ງເຮັດໃຫ້ເກີດໂລກ “head blight”

ເປັນໂລກທີ່ສ້າງຄວາມເສຍຫາຍໃຫ້ກັບເຂົ້າ, ສາລີ ແລະ ເຂົ້າບາເລ່້ ຢ່າງຫຼວງຫຼາຍ ເຮັດໃຫ້ຜົນຜະລິດຫຼຸດລົງ ແລະ ສ້າງສານພິດປົນເປື້ອນໃນເມັດທີ່ເປັນອັນຕະລາຍຕໍ່ຜູ້ບໍລິໂພກ

ໂດຍໃນຕອນທຳອິດ ຊຸນຫຢົງ ຫລິວ ປະຕິເສດວ່າບໍ່ໄດ້ເຮັດຜິດ ກ່ອນທີ່ຈະຍອມຮັບໃນເວລາຕໍ່ມາວ່າໄດ້ລັກລອບນຳເຊື້ອລາ ນີ້ເຂົ້າມາໃນອາເມຣິກາ ເພື່ອທີ່ຈະເອົາໄປໃຊ້ທົດລອງໃນຫ້ອງແລັບທີ່ມະຫາວິທະຍາໄລມິຊິແກນ ຊຶ່ງ ຢູຊີງ ຈ້ຽນ ແຟນຂອງລາວເຮັດວຽກຢູ່ວິທະຍາໄລແຫຼ່ງນັ້ນ

ເຊື້ອລາຊະນິດນີ້ນັບໄດ້ວ່າເປັນອາວຸດກໍ່ການຮ້າຍທາງການ ເກດດີ ຊຶ່ງສ້າງຄວາມເສຍຫາຍເປັນເງິນຫຼາຍພັນລ້ານໂດລາໃນແຕ່ລະປີ ແລະ ຫາກເຊື້ອລາຊະນິດນີ້ເຂົ້າສູ່ຮ່າງກາຍ ຈະເຮັດໃຫ້ປວກຮາກ, ເສຍສຸຂະພາບທາງປອດ ແລະ ລະບົບສືບພັນ

ທ່ານ ເຈໂຣມ ກໍກອນ ຈູເນຍ ໄອຍະການຂອງສະຫະລັດ ບອກວ່າການລັກລອບນຳເຊື້ອລາຊະນິດນີ້ເຂົ້າມາໃນສະຫະລັດ ເປັນໄພຄຸກຄາມຄວາມໝັ້ນຄົງ ແລະ ພົບວ່າ ຢູຊີງ ຈ້ຽນ ເປັນສະມາຊິກຂອງພັກຄອມມູນິດໃນປະເທດຈີນອີກດ້ວຍ

ທ່ານ ມາໂກ ຣູບິໂອ ລັດຖະມົນຕີຕ່າງປະເທດຂອງສະຫະລັດ ຫາກໍ່ປະກາດເມື່ອອາທິດທີ່ຜ່ານມາ ວ່າຈະຍົກເລີກວີຊ່າຂອງນັກສຶກສາຈີນຈຳນວນຫຼາຍ ຊຶ່ງທາງຈີນປະນາມກັບມາວ່າເປັນມາດຕະການທີ່ບໍ່ມີເຫດຜົນ ແລະ ກີດກັນເຊື້ອຊາດ

ສະແດງຄຳຄິດເຫັນ