ບລູມເບີກ ລາຍງານວ່າ ປະທານາທິບໍດີໂດນານດ໌ ທຣຳ ລົງນາມຄຳສັ່ງເມື່ອວັນອັງຄານ (3 ມິຖຸນາ) ເພື່ອຂຶ້ນພາສີນຳເຂົ້າເຫຼັກ ແລະ ອະລູມິນຽມປັນ 50% ຈາກ 25% ມີຜົນເລີ່ມຕັ້ງແຕ່ວັນທີ່ 4 ມິຖຸນານີ້  ເນື່ອງຈາກຄຳໝັ້ນສັນຍາທີ່ຈະຂຶ້ນພາສີນຳເຂົ້າເພື່ອຊ່ວຍເຫຼືອຜູ້ຜະລິດໃນປະເທດ

ການຂຶ້ນພາສີຂອງທຣຳຈະມີຜົນບັງຄັບໃຊ້ເວລາ 00.01 ນ. ຂອງວັນພຸດຕາມ​ (4 ມິຖຸນາ) ເວລາທ້ອງຖິ່ນ ໂດຍຄຳສັ່ງດັ່ງກ່າວລະບຸວ່າມີຄວາມຈຳເປັນເພື່ອປົກປ້ອງຄວາມໝັ້ນຄົງຂອງຊາດ

ຄຳສັ່ງດັ່ງກ່າວລະບຸວ່າຄຳສັ່ງກ່ອນໜ້ານີ້ຍັງບໍ່ເຮັດໃຫ້ ອຸດສາຫະກຳໃນປະເທດ “ສາມາດພັດທະນາ ແລະ ຮັກສາອັດຕາການໃຊ້ກຳລັງການຜະລິດທີ່ຈຳເປັນຕໍ່ຄວາມຍືນຍົງຂອງອຸດສາຫະກຳ ແລະ ຄວາມຕ້ອງການດ້ານການປ້ອງກັນປະເທດທີ່ຄາດການໄວ້ໄດ້”

“ການເພີ່ມອັດຕາພາສີອາກອນຈະໃຫ້ການສະໜັບສະໜູນອຸດສາຫະກຳເຫຼົ່ານີ້ຫຼາຍຂຶ້ນ ແລະ ຫຼຸດຫຼືກຳຈັດໄພຄຸກຄາມຕໍ່ຄວາມໝັ້ນຄົງຂອງຊາດທີ່ເກີດຈາກການນຳເຂົ້າຜະລິດຕະພັນເຫຼັກ ແລະ ອະລູມິນຽມ ແລະ ຜະລິດຕະພັນທີ່ກ່ຽວຂ້ອງ” ຄຳສັ່ງດັ່ງກ່າວລະບຸ ຊຶ່ງທຳນຽບຂາວໂພສລົງໃນເວັບໄຊ X

• ເຫຼັກອັງກິດບໍ່ຮັບຜົນກະທົບຈາກພາສີໃໝ່

ອັດຕາພາສີອາກອນ ໂລຫະສຳລັບການນຳເຂົ້າຈາກສະຫະລາຊະອານາຈັກຈະຍັງຄົງຢູ່ທີ່ອັດຕາເກົ່າ 25% ເພື່ອໃຫ້ທັງສອງປະເທດສາມາດດຳເນີນການຈັດເກັບພາສີ ຫຼື ກຳນົດໂຄວຕານຳເຂົ້າໃໝ່ໄດ້ພາຍໃນກຳນົດເສັ້ນຕາຍວັນທີ່ 9 ກໍລະກົດ

ອົງປະກອບສຳຄັນຂອງຂອບການເຮັດວຽກ ທີ່ບັນລຸກັບອັງກິດເມື່ອເດືອນທີ່ຜ່ານມາ ຄືຄວາມພະຍາຍາມທີ່ຈະຫຼຸດອຸປະສັກທາງການຄ້າສຳລັບເຫຼັກ ເຖິງແມ່ນວ່າທັງສອງຝ່າຍຈະບໍ່ເຫັນດີກັບຂອບເຂດຂອງການ ຜ່ອນຜັນຕໍ່ອຸດສາຫະກຳເຫຼັກຂອງອັງກິດ ແລະ ຂໍ້ຕົກລົງກໍຍັງບໍ່ໄດ້ມີຜົນບັງຄັບໃຊ້

• ສົງຄາມການຄ້າຮຸນແຮງຂຶ້ນຈາກພາສີເຫຼັກ

ການຕັດສິນໃຈຂອງທຣຳເຮັດໃຫ້ຄວາມຕຶງຄຽດທາງການຄ້າເພີ່ມຄວາມຮຸນແຮງຂຶ້ນ ໃນຊ່ວງເວລາທີ່ສະຫະລັດກຳລັງເຈລະຈາກັບຫຸ້ນສ່ວນທາງການຄ້າຈຳນວນຫຼາຍກ່ຽວກັບພາສີອາກອນແບບ “ຕອບໂຕ້” ກ່ອນກຳນົດເສັ້ນຕາຍວັນທີ່ 9 ກໍລະກົດ

ການເອີ້ນເກັບພາສີອາກອນຝ່າຍດຽວຂອງທຣຳນັ້ນ ຕັ້ງຢູ່ເທິງຖານທາງກົດໝາຍທີ່ສັ່ນຄອນຫຼາຍຂຶ້ນ ຫຼັງຈາກເມື່ອອາທິດທີ່ຜ່ານມາ ສານລັດຖະບານກາງໄດ້ຍົກເລີກພາສີອາກອນຂອງລາວຫຼາຍຢ່າງທີ່ບັງຄັບໃຊ້ພາຍໃຕ້ກົດໝາຍສຸກເສີນ

• ພາສີເຫຼັກບໍ່ໄດ້ຮັບຜົນກະທົບຈາກຄຳຕັດສິນຂອງສານ

ເຖິງຢ່າງໃດກໍຕາມ ການເກັບພາສີເຫຼັກຂອງທຣຳບໍ່ໄດ້ຮັບຜົນກະທົບຈາກຄຳຕັດສິນຂອງສານ ແລະ ປະທານາທິບໍດີກໍພະຍາຍາມສະແດງໃຫ້ເຫັນວ່າ ລາວບໍ່ຫຍໍ້ທໍ້ທີ່ຈະຂຶ້ນພາສີ ແລະ ຮຽກຮ້ອງໃຫ້ປະເທດຕ່າງໆ ສະເໜີຂໍ້ສະເໜີທີ່ໂຕະເຈລະຈາ

ເມື່ອວັນສຸກທີ່ຜ່ານມາ (30 ພຶດສະພາ)  ທຣຳປະກາດການຕັດສິນໃຈດັ່ງກ່າວລະຫວ່າງການກ່າວຄຳປາໄສທີ່ໂຮງງານ United States Steel Corp ໃນລັດເພນຊິລເວເນຍ

ໂດຍລາວໃຫ້ການຮັບຮອງການຂາຍບໍລິສັດໃຫ້ກັບ Nippon Steel Corp ຂອງຍີ່ປຸ່ນ ພ້ອມທັງໃຫ້ຄຳໝັ້ນວ່າບໍລິສັດຈະຍັງຄົງຢູ່ພາຍໃຕ້ການຄວບຄຸມຂອງອາເມຣິກາໃນຮູບແບບໃດຮູບແບບໜຶ່ງ

“ນັ້ນໝາຍຄວາມວ່າຈະບໍ່ມີໃຜສາມາດຂະໂມຍອຸດສາຫະກຳຂອງເຈົ້າໄດ້” ທຣຳກ່າວກັບຄົນງານເຫຼັກ “ທີ່ 25% ພວກເຂົາຈະສາມາດຂ້າມຮົ້ວເຂົ້າມາໄດ້ ແລະ ທີ່ 50% ພວກເຂົາຈະບໍ່ສາມາດຂ້າມຮົ້ວໄດ້ອີກຕໍ່ໄປ”

ຕໍ່ມາ ລາວປະກາດໃນໂພສສື່ສັງຄົມວ່າພາສີອະລູມິນຽມຈະເພີ່ມຂຶ້ນເປັນລະດັບດຽວກັນ

ລັດຖະບານຂອງທຣຳກຳລັງຕໍ່ສູ້ທາງກົດໝາຍກ່ຽວກັບພາສີ ສ່ວນໃຫຍ່ທີ່ບັງຄັບໃຊ້ພາຍໃຕ້ກົດໝາຍອຳນາດທາງເສດຖະກິສຸກເສີນລະຫວ່າງປະເທດ

ພາສີນຳເຂົ້າເຫຼັກ ແລະ ອະລູມິນຽມບໍ່ໄດ້ຮັບຜົນກະທົບຈາກການຟ້ອງຮ້ອງຄະດີດັ່ງກ່າວ ເພາະທຣຳໃຊ້ອຳນາດທາງກົດໝາຍທີ່ແຕກຕ່າງກັນ

ສະແດງຄຳຄິດເຫັນ