ລັດຖະບານຂອງ ປະທານາທິບໍດີໂດນັລ ທຣຳ ເປີດເຜີຍວ່າ ຈະສົ່ງ ກອງກຳລັງປ້ອງກັນຊາດ (National Guard) 2,000 ນາຍ ໄປປະຈຳການໃນພື້ນທີ່ ໃນຂະນະທີ່ເຈົ້າໜ້າທີ່ລັດຖະບານກາງໃນລອສແອນເຈລິສ ປະເຊີນໜ້າກັບຜູ້ປະທ້ວງສອງສາມຮ້ອຍຄົນ ໃນວັນປະທ້ວງວັນທີ 2 ຫຼັງຈາກມີການປາບປາມຜູ້ອົບພະຍົບ

ພີທ ເຮກເຊັດ ລັດຖະມົນຕີກະຊວງປ້ອງກັນຊາດສະຫະລັດ ເຕືອນວ່າກະຊວງ ພ້ອມລະດົມທະຫານປະຈຳການ “ຖ້າຫາກຍັງຄົງມີຄວາມຮຸນແຮງເກີດຂຶ້ນ” ໃນລອສແອນເຈລິສ ແລະ ວ່າ ນາວິກໂຍທິນ ໃນຄ່າຍເພນເດີລຕັນ ທີ່ຕັ້ງຢູ່ໃກ້ຄຽງ “ຢູ່ໃນສະພາບເຝົ້າລະວັງ ແລະ ກຽມພ້ອມລະດັບສູງ”

ໜ່ວຍງານຄວາມໝັ້ນຄົງລັດຖະບານກາງໄດ້ປະເຊີນໜ້າກັບຜູ້ຊຸມນຸມປະທ້ວງໃນພື້ນທີ່ພາຣາເມົາທ໌ ທາງຕາເວັນອອກສຽງໃຕ້ຂອງລອສແອນເຈລິສ ເມື່ອວັນເສົາ (ວັນທີ່່ 7 ) ຊຶ່ງເປັນພື້ນທີ່ທີ່ມີຜູ້ປະທ້ວງບາງຄົນຖືປ້າຍ ແລະ ທຸງປະເທດເມັກຊິໂກຮ່ວມຊຸມນຸມ

ໃນຂະນະທີ່ຈຸດປະທ້ວງທີ່ 2 ເກີດຂຶ້ນໃນໃຈກາງເມືອງລອສແອນເຈລິສໃນຄືນວັນເສົາ ໂດຍມີຜູ້ຄົນຮ່ວມຊຸມນຸມປະມານ 60 ຄົນ ແລະ ພາກັນຮ້ອງສະໂລແກນປະທ້ວງຫຼາຍຢ່າງ ເຊັ່ນ: ICE out of L.A.! ຊຶ່ງໝາຍເຖິງ ໃຫ້ສຳນັກງານກວດຄົນເຂົ້າເມືອງ ແລະ ໜ່ວຍງານທີ່ຮັບຜິດຊອບຄວບຄຸມຄົນເຂົ້າເມືອງແລະພາສີ ໃນອາເມລິກາ.

ສະຫະລັດອາເມລິກາ (U.S. Immigration and Customs Enforcement: ICE) ຢຸດຕິການດຳເນີນງານໃນແອລເອ ຫຼື ລອສແອນເຈລິສ

ດ້ານທຳນຽບຂາວຖະແຫຼງການວ່າ ທຣຳ ໄດ້ລົງນາມບັນທຶກຂໍ້ຕົກລົງຂອງປະທານາທິບໍດີ ຈະສົ່ງກອງກຳລັງປ້ອງກັນຊາດໄປແກ້ໄຂບັນຫາການຊຸມນຸມທີ່ບໍ່ມີຄວາມເປັນລະບຽບທີ່ລຸກລາມຫຼາຍຂຶ້ນ

ທອມ ໂຮແມນ ຜູ້ນຳຂອງທຣຳທີ່ທຳໜ້າທີ່ເບິ່ງແຍງຊາຍແດນ ເປີດເຜີຍກັບຟັອກຊ໌ນິວສ໌ວ່າ ກອງກຳລັງປ້ອງກັນຊາດສົ່ງກອງທັບໄປລອສແອນເຈລິສຕັ້ງແຕ່ວັນເສົາແລ້ວ

ກາວິນ ນິວຊຳ ຜູ້ວ່າການລັດແຄລິຟໍເນຍ ກ່າວວ່າ ການຕັດສິນໃຈຂອງລັດຖະບານໃນຄັ້ງນີ້ເປັນການ “ຕັ້ງໃຈຍຸໂຢງ” ໂດຍນິວຊຳໄດ້ໂພສໃນ X ວ່າທຣຳກຳລັງສົ່ງກອງກຳລັງປ້ອງກັນຊາດ “ບໍ່ແມ່ນເພາະຂາດແຄນເຈົ້າໜ້າທີ່ ແຕ່ເພາະຕ້ອງການໃຫ້ເກີດການປະທ້ວງ” ແລະ ເສີມວ່າ “ຢ່າເຮັດຕາມຄວາມປະສົງພວກເຂົາ ຢ່າໃຊ້ຄວາມຮຸນແຮງ ປະທ້ວງຢ່າງສັນຕິ”

ນິວຊຳບອກອີກວ່າ ການທີ່ເຮກເຊັດ “ຂູ່ຈະສົ່ງນາວິກໂຍທິນທີ່ປະຈຳການຢູ່ໄປຕ້ານພົນລະເມືອງຂອງຕົນເອງນັ້ນເປັນ “ການປະພຶດທີ່ກໍ່ໃຫ້ເກີດຄວາມວຸ່ນວາຍ”

ທຣຳຕອບໂຕ້ນິວຊຳຜ່ານທຣູດໂຊຊ້ຽວວ່າ ຖ້ານິວຊຳ ແລະ ແຄເຣນ ບາສ ຜູ້ວ່າການລອສແອນເຈລິສ ບໍ່ສາມາດເຮັດໜ້າທີ່ໄດ້ ລັດຖະບານກາງຈຶ່ງເຂົ້າມາມີສ່ວນຮ່ວມ ແລະ ແກ້ໄຂບັນຫາ “ການຈະລາຈົນ ແລະ ການປຸ້ນສະດົມ” ຄວນໄດ້ຮັບການຈັດການ

ການປະທ້ວງດັ່ງກ່າວ ຖືເປັນການຕໍ່ສູ້ລະຫວ່າງລອສແອນເຈລິສ ພື້ນທີ່ທີ່ພັກເດໂມແຄຣັດເບິ່ງແຍງ ຊຶ່ງມີປະຊາກອນສ່ວນໃຫຍ່ເປັນຄົນຮິສແປນິກ ແລະ ປະຊາກອນທີ່ເກີດໃນຕ່າງປະເທດ ກັບລັດຖະບານທຣຳຊຶ່ງເປັນພັກຣີພັບລິກັນ ທີ່ມີນະໂຍບາຍປາບປາມຜູ້ອົບພະຍົບເປັນນະໂຍບາຍສຳຄັນໃນການດຳລົງຕຳແໜ່ງສະໄໝທີ່2 ຂອງທຣຳ

ຕາມຄຳບອກເລົ່າຂອງພະຍານຂອງຣອຍເຕີ ເປີດເຜີຍວ່າວິດີໂອທີ່ບັນທຶກພາບການປະທ້ວງໃນພາຣາເມົາທ໌ ສະແດງໃຫ້ເຫັນ ເຈົ້າໜ້າທີ່ໃນຊຸດສີຂຽວຫຼາຍສິບຄົນພ້ອມຫນ້າກາກກັນແກັສຢືນຮຽງແຖວເທິງຖະໜົນຫົນທາງ ພ້ອມກັບບໍລິເວນທີ່ເຕັມໄປດ້ວຍກະປ໋ອງແກັສຂະໜາດນ້ອຍທີ່ລະເບີດທີ່ສົ່ງຄວັນໄປທົ່ວພື້ນທີ່ ແລະ ເຈົ້າໜ້າທີ່ໄດ້ເລີ່ມຄວບຄຸມຕົວຜູ້ປະທ້ວງບາງສ່ວນແລ້ວ

ທັງນີ້ ກົດໝາຍປີ 1807 ໃຫ້ສິດປະທານາທິບໍດີສົ່ງກອງທັບສະຫະລັດ ໄປບັງຄັບໃຊ້ກົດໝາຍ ແລະ ປາບປາມເຫດການຕ່າງໆ ເຊັ່ນ: ຄວາມບໍ່ສະຫງົບທາງສັງຄົມ ຊຶ່ງຄັ້ງສຸດທ້າຍທີ່ມີການບັງຄັບໃຊ້ກົດໝາຍນີ້ແມ່ນຊ່ວງຈະລາຈົນໃນລອສແອນເຈລິສໃນປີ 1992 ຕາມຄຳຮ້ອງຂໍຂອງຜູ້ວ່າການລັດແຄລິຟໍເນຍ

ດ້ານເຈົ້າໜ້າທີ່ຕຳຫລວດລອສແອນເຈລິສໂພສໃນ X ວ່າ “ມີຄົນຖືກຄວບຄຸມຕົວຫຼາຍຄົນເພາະບໍ່ຍອມປ່ອຍຕົວ ຫຼັງຈາກມີການອອກຄຳເຕືອນຫຼາຍຄັ້ງ” ແຕ່ຍັງບໍ່ໃຫ້ລາຍລະອຽດເພີ່ມເຕີມ ແລະ ຂະນະນີ້ຍັງບໍ່ມີຂໍ້ມູນກ່ຽວກັບການຈັບກຸມຢ່າງເປັນທາງການ

ທັງນີ້ ການປະທ້ວງວັນທຳອິດມີຂຶ້ນໃນຄືນວັນສຸກ (6 ມິຖຸນາ) ຫຼັງຈາກເຈົ້າໜ້າທີ່ກວດຄົນເຂົ້າເມືອງ ແລະ ໜ່ວຍງານທີ່ຮັບຜິດຊອບຄວບຄຸມຄົນເຂົ້າເມືອງແລະພາສີ ໃນອາເມລິກາ ດຳເນີນການບັງຄັບໃຊ້ກົດໝາຍ ແລະ ຈັບກຸມຜູ້ຕ້ອງສົງໄສຢ່າງໜ້ອຍ 44 ລາຍ ຂໍ້ຫາລະເມີດກົດໝາຍກວດຄົນເຂົ້າເມືອງ

ດ້ານກະຊວງຄວາມໝັ້ນຄົງແຫ່ງມາຕຸພູມິ ( Department of Homeland Security) ລະບຸໃນຖະແຫຼງການວ່າ ມີຜູ້ກໍ່ຈະລາຈົນປະມານ “1,000 ຄົນ” ໃນການປະທ້ວງເມື່ອວັນສຸກ

ສະແດງຄຳຄິດເຫັນ