ວັນທີ່ 10 ມິຖຸນາ ຜູ້ໃຊ້ງານ ChatGPT ທົ່ວໂລກປະສົບບັນຫາບໍ່ສາມາດເຂົ້າໃຊ້ງານບໍລິການໄດ້ຕາມປົກກະຕິເປັນເວລາຫຼາຍຊົ່ວໂມງ ໂດຍມີລາຍງານວ່າເຫດຂັດຂ້ອງກິນເວລາດົນກວ່າ 10 ຊົ່ວໂມງ ສົ່ງຜົນໃຫ້ເກີດຄວາມບໍ່ສະດວກຕໍ່ຜູ້ໃຊ້ຈຳນວນຫຼາຍໃນຫຼາຍປະເທດ

ບັນຫາດັ່ງກ່າວເລີ່ມປະມານເວລາ 14:00 ນ. ຕາມເວລາໃນປະເທດລາວ ໂດຍຜູ້ໃຊ້ຈຳນວນຫຼາຍລາຍງານວ່າລະບົບສະແດງຂໍ້ຄວາມຜິດພາດ ເຊັ່ນ “A network error occurred” ຫຼື “Something went wrong” ຂະນະໃຊ້ງານ ທັງໃນເວີຊັນຟຣີ ແລະ ແບບສະໝັກສະມາຊິກ ChatGPT Plus

ນອກຈາກນີ້ ຍັງພົບກໍລະນີທີ່ລະບົບຕອບສະໜອງຊ້າ ຫຼື ບໍ່ສາມາດໂຫຼດໜ້າແຊັດໄດ້ເລີຍ ເວັບໄຊທ໌ Downdetector ຊຶ່ງຕິດຕາມການລາຍງານບັນຫາບໍລິການອອນລາຍແບບ ຣຽວໄທມ໌ ສະແດງກຣາຟການລາຍງານບັນຫາສູງຂຶ້ນ ໃນຊ່ວງເວລາດັ່ງກ່າວ ໂດຍສະເພາະໃນສະຫະລັດອາເມລິກາ ສະຫະລາຊະອານາຈັກ ແລະ ປະເທດໃນເອເຊຍ

ກຣາຟລາຍງານການຢຸດເຮັດວຽກໃນຊ່ວງ 24 ຊົ່ວໂມງທີ່ມາຜ່ານຂອງ OpenAI

OpenAI ຊຶ່ງເປັນຜູ້ພັດທະນາ ChatGPT ໄດ້ອອກຖະແຫຼງການສັ້ນໆ ຜ່ານໜ້າ status.openai.com ໂດຍລະບຸວ່າ “ພົບຕົ້ນຕໍຂອງບັນຫາແລ້ວ ແລະ ຢູ່ລະຫວ່າງການດຳເນີນການແກ້ໄຂ”

ເຖິງຢ່າງໃດກໍ່ຕາມ ຈົນເຖິງຊ່ວງຄ່ຳຂອງມື້ດຽວກັນ ຍັງບໍ່ມີການເປີດເຜີຍລາຍລະອຽດທາງເທັກນິກວ່າເຫດຜົນໃດລະບົບຈຶ່ງລົ່ມເປັນເວລາດົນປານນີ້ ໂດຍຈາກລາຍງານຂອງເວັບໄຊທ໌ The Verge ແລະ New York Post ບັນຫາດັ່ງກ່າວຖືເປັນໜຶ່ງໃນເຫດການລະບົບລົ່ມທີ່ໃຫຍ່ທີ່ສຸດຂອງ ChatGPT ນັບຕັ້ງແຕ່ເປີດໃຫ້ບໍລິການສາທາລະນະ

ຫຼັງຈາກເວລາ 19:00 ນ. ເປັນຕົ້ນໄປ ຕາມເວລາໃນປະເທດລາວ ຜູ້ໃຊ້ບາງສ່ວນເລີ່ມສາມາດເຂົ້າໃຊ້ງານ ChatGPT ໄດ້ອີກຄັ້ງ  OpenAI ຍັງລະບຸວ່າຍັງຢູ່ລະຫວ່າງການຕິດຕາມ ແລະ ປັບປຸງຄວາມສະຖຽນພາບຂອງລະບົບ ເພື່ອໃຫ້ບໍລິການກັບສູ່ພາວະປົກກະຕິຢ່າງເຕັມຮູບແບບ

ຜູ້ໃຊ້ທີ່ຍັງພົບບັນຫາສາມາດຕົວກວດສອບສະຖານະຂອງລະບົບໄດ້ຈາກເວັບໄຊທ໌ທາງການຂອງ OpenAI (status.openai.com) ຫຼື Downdetector ລວມເຖິງແນະນຳໃຫ້ ຣີເຟຣສໜ້າເວັບ ລ້າງ cache ຫຼື ທົດລອງເຂົ້າສູ່ລະບົບໃໝ່ຫາກຍັງບໍ່ສາມາດໃຊ້ງານໄດ້

ສະແດງຄຳຄິດເຫັນ