ໂອເປັກ ອົງການກຸ່ມປະເທດຜູ້ສົ່ງອອກນ້ຳມັນ (OPEC) ປະເມີນວ່າ ຄວາມຕ້ອງການພະລັງງານຂອງໂລກຈະເພີ່ມຂຶ້ນເຖິງ 24% ພາຍໃນປີ 2050 ແລະ ຄວາມຕ້ອງການໃຊ້ນ້ຳມັນອາດເກີນ 120 ລ້ານບາເຣວ ຕໍ່ມື້ ໃນຊ່ວງເວລາດັ່ງກ່າວ ຊຶ່ງເປັນໄປໃນທິດທາງດຽວກັບລາຍງານ “World Oil Outlook” ປະຈຳປີ 2024 ຂອງໂອເປັກ

 

ດ້ານສຳນັກງານຂໍ້ມູນຂ່າວສານ ດ້ານພະລັງງານຂອງສະຫະລັດ (EIA) ຄາດການວ່າ ລາຄານ້ຳມັນດິບເບຣນທ໌ (Brent) ຈະຫຼຸດລົງແຕະລະດັບໃກ້ 60 ໂດລາສະຫະລັດຕໍ່ບາເຣວພາຍໃນສິ້ນປີນີ້ ແລະ ຈະສະເລ່ຍຢູ່ທີ່ 59 ໂດລາໃນປີໜ້າ ຊຶ່ງອາດສົ່ງຜົນກະທົບຕໍ່ການຜະລິດນ້ຳມັນຂອງສະຫະລັດ ໂດຍລາຄານ້ຳມັນດິບເບຣນທ໌ໃນຕະຫຼາດໂລກເມື່ອວັນອັງຄານ (10 ມິຖຸນາ 2025) ຢູ່ທີ່ 67.28 ໂດລາຕໍ່ບາເຣວ

 

“ໄຮທາມ ອັລ-ກາອິສ” ເລຂາທິການໂອເປັກກ່າວລະຫວ່າງການປະຊຸມ “Global Energy Show” ທີ່ເມືອງຄັລກາຣີ ປະເທດແຄນາດາວ່າ ຄວາມຕ້ອງການໃຊ້ນ້ຳມັນທົ່ວໂລກຈະຍັງຄົງເຕີບໂຕຢ່າງຕໍ່ເນື່ອງໃນຊ່ວງ 25 ປີຂ້າງໜ້າ ທ່າມກາງການຂະຫຍາຍຕົວຂອງປະຊາກອນໂລກ ພ້ອມລະບຸວ່າ ຍັງບໍ່ມີສັນຍານວ່າຄວາມຕ້ອງການໃຊ້ນ້ຳມັນຈະເຖິງຈຸດສູງສຸດໃນອະນາຄົດອັນໃກ້

 

ນອກຈາກນີ້ ລາວຍັງກ່າວຊື່ນຊົມຄວາມສາມາດຂອງພາກອຸດສາຫະກຳນ້ຳມັນແຄນາດາທີ່ສາມາດເພີ່ມກຳລັງການຜະລິດໄດ້ຫຼາຍໃນຊ່ວງບໍ່ພຍງເທົ່າໃດປີທີ່ຜ່ານມາ

 

ໃນຂະນະດຽວກັນ ໂອເປັກໄດ້ຄ່ອຍໆປັບເພີ່ມການຜະລິດໄວກວ່າກຳນົດເດີມ ໂດຍເພີ່ມກຳລັງການຜະລິດລວມ 411,000 ບາເຣວຕໍ່ມື້ ໃນຊ່ວງເດືອນພຶດສະພາ ເຖິງກໍລະກົດ 2025 ຊຶ່ງເປັນປັດໄຈໜຶ່ງທີ່ກົດດັນລາຄານ້ຳມັນໃຫ້ອ່ອນຕົວລົງໃນຊ່ວງຫຼາຍເດືອນທີ່ຜ່ານມາ ຮ່ວມກັບຄວາມກັງວົນກ່ຽວກັບຜົນກະທົບຈາກສົງຄາມການຄ້າລະຫວ່າງສະຫະລັດ ແລະ ປະເທດຕ່າງໆ ພາຍໃຕ້ການນຳຂອງປະທານາທິບໍດີໂດນາລ ທຣຳ

 

ເລຂາທິການໂອເປັກຍັງໄດ້ເນັ້ນຢ້ຳເຖິງຈຸດຢືນຂອງໂອເປັກທີ່ສະໜັບສະໜູນແນວທາງຫຼຸດການປ່ອຍແກັສເຮືອນແກ້ວ ແຕ່ບໍ່ເຫັນດີກັບການກຳນົດເປົ້າໝາຍດ້ານສິ່ງແວດລ້ອມທີ່ລາວເຫັນວ່າເກີນຈິງ ໂດຍຊີ້ແນວທາງວ່າຄວນພິຈາລະນາໃຊ້ແຫຼ່ງພະລັງງານທຸກປະເພດຢ່າງສົມດຸນ ແທນທີ່ຈະເລືອກສະໜັບສະໜູນພຍງບາງແຫຼ່ງແລ້ວລະເລີຍແຫຼ່ງອື່ນໆ

ສະແດງຄຳຄິດເຫັນ