ເຈົ້າໜ້າທີ່ສະຫະລັດ ຈັບກຸມຜູ້ອົບພະຍົບຫຼາຍກວ່າ 70 ຄົນຫຼັງລົງກວດໂຮງງານແປງຮູບອາຫານແຫ່ງໜຶ່ງເມືອງໂອມາຮາ ທ່າມກາງສຽງຄັດຄ້ານຕໍ່ຕ້ານການຈັບກຸມຜູ້ອົບພະຍົບໃນຫຼາຍເມືອງທົ່ວສະຫະລັດ

ມື້ນີ້ (12 ມິຖຸນາ 2025) ເຈົ້າໜ້າທີ່ທາງການສະຫະລັດອາເມລິກາ ນຳໂດຍສຳນັກງານກວດຄົນເຂົ້າເມືອງ ແລະ ພາສີອາກອນ ລົງກວດຄົ້ນໂຮງງານແປງຮູບອາຫານແຫ່ງໜຶ່ງໃນເມືອງໂອມາຮາ ລັດເນແບຣສກາ ພ້ອມຈັບກຸມຄົນງານປະມານ 75-80 ຄົນ ຈາກທັງໝົດປະມານ 140 ຄົນ

ກະຊວງຄວາມໝັ້ນຄົງພາຍໃນ ລະບຸວ່າ ເປັນການປະຕິບັດການກວດຄົ້ນຄັ້ງໃຫຍ່ທີ່ສຸດຂອງລັດນີ້ ນັບຕັ້ງແຕ່ໂດນາດ໌ ທຣຳ ດຳລົງຕຳແໜ່ງປະທານາທິບໍດີສະຫະລັດອາເມລິກາ ສະໄໝທີ 2

ດ້ານເຈົ້າຂອງໂຮງງານເປີດເຜີຍວ່າ ການປະຕິບັດການດັ່ງກ່າວເກີດຂຶ້ນໂດຍບໍ່ໄດ້ແຈ້ງລ່ວງໜ້າ ແລະ ການກວດຄົ້ນຄັ້ງນີ້ອາດເຮັດໃຫ້ກຳລັງການຜະລິດລົດລົງເຫຼືອພຽງຮ້ອຍລະ 20

ຂະນະທີ່ກຸ່ມຜູ້ຄ້າຂາຍສັດ ແລະ ນັກວິເຄາະ ສະແດງຄວາມກັງວົນວ່າການປະຕິບັດການເຫຼົ່ານີ້ອາດຍິ່ງສົ່ງຜົນກະທົບຕໍ່ອຸດສາຫະກຳອາຫານໃນສະຫະລັດ ຊຶ່ງຢູ່ໃນຊ່ວງທີ່ລາຄາເນື້ອງົວສູງຫຼາຍ ແລະ ມີລາຍງານວ່າໂຮງງານແປງຮູບເນື້ອສັດຫຼາຍແຫ່ງຂາດແຄນຄົນງານ

ການດຳເນີນງານຂອງທາງການສະຫະລັດ ສວນທາງກັບກະແສການຊຸມນຸມປະທ້ວງຕໍ່ຕ້ານການຈັບກຸມຜູ້ອົບພະຍົບທີ່ຍັງຄົງຂະຫຍາຍຕົວໃນຫຼາຍເມືອງທົ່ວປະເທດ ທັງນິວຢອກ ແອັດແລນຕາ ແລະ ຊິຄາໂກ ເຖິງແມ່ນວ່າທາງການທ້ອງຖິ່ນຫຼາຍແຫ່ງຈະເພີ່ມມາດຕະການຮັບມືການຊຸມນຸມທີ່ເກີດຂຶ້ນ

ສ່ວນທີ່ລອສ ແອນເຈລິສ ຊຶ່ງເປັນເມືອງທີ່ການຊຸມນຸມເລີ່ມຕົ້ນຂຶ້ນ ກຸ່ມຜູ້ຊຸມນຸມບາງສ່ວນຍັງລວມຕົວກັນໃນຊ່ວງທີ່ມີການປະກາດເຄີຟິວ ສົ່ງຜົນໃຫ້ຕຳຫຼວດເຂົ້າຈັບກຸມຜູ້ຊຸມນຸມຫຼາຍສິບຄົນ ເມື່ອວັນທີ 10 ມິຖຸນາ ທີ່ຜ່ານມາ

ຂະນະທີ່ຜູ້ບັນຊາການກອງກຳລັງເນຊັນແນລ ກາດ ແລະ ນາວິກໂຍທິນ ທີ່ລັດຖະບານກາງສົ່ງລົງພື້ນທີ່ໃນລອສ ແອນເຈລິສ ລະບຸວ່າ ກອງກຳລັງດັ່ງກ່າວບໍ່ມີອຳນາດຈັບກຸມຜູ້ຊຸມນຸມ ແຕ່ຄວບຄຸມຕົວເອົາໄວ້ໄດ້ ຈົນກວ່າຕຳຫຼວດຈະເຂົ້າມາຈັບກຸມ ທ່າມກາງຄວາມສົງໃສຈາກເຈົ້າໜ້າທີ່ຂອງທາງການທ້ອງຖິ່ນເຖິງອຳນາດຂອງກອງກຳລັງເຫຼົ່ານີ້

ສະແດງຄຳຄິດເຫັນ