ສຳນັກຂ່າວຊິນຫົວລາຍງານ ມະນົດໄຫ່ຫນານ (ໄຫຫຼໍາ) ທາງໃຕ້ສຸດຂອງຈີນ ປະກາດໃຊ້ມາດຕະການຮັບມືພາຍຸສູງລະດັບ 2 ກຽມພ້ອມຮັບພາຍຸໄຕ້ຝຸ່ນລູກທຳອິດແຫ່ງປີ ໄຕ້ຝຸ່ນ “ຫວູ່ຕິບ” ຫຼັງຄາດວ່າ ຈະຂຶ້ນຝັ່ງມົນທົນໄຫ່ຫນານ ທາງໃຕ້ສຸດຂອງຈີນໃນມື້ນີ້ ທີ່ບໍລິເວນລະຫວ່າງເມືອງຊານຢ່າ ແລະ ເມືອງຕົງຟາງໃນມົນທົນໄຫ່ຫນານ

ຈາກນັ້ນ ພາຍຸຫວູ່ຕິບຈະເຄື່ອນຕົວຕໍ່ໄປທີ່ ມົນທົນກວາງຕຸ້ງ ແລະ ມົນທົນກວ່າງຊີ ຫຼື ເຂດປົກຄອງຕົນເອງກວ່າງຊີ ໃນວັນທີ່ 14 ມິຖຸນາ 2025 ນີ້

ທາງດ້ານສໍານັກອຸຕຸນິຍົມວິທະຍາໃນລະດັບທ້ອງຖິ່ນຂອງຈີນ ປະກາດເຕືອນໄພພາຍຸຝົນ ແລະ ນ້ຳທ່ວມກະທັນຫັນຫຼາຍເມືອງໃນໄຫ່ຫນານ ຄາດວ່າ ຈະເກີດຝົນຕົກໜັກຫຼາຍກວ່າ 100 ມິນລິແມັດພາຍໃນ 24 ຊົ່ວໂມງນີ້ໃນ 6 ເມືອງ ແລະ ເຂດໃນໄຫ່ຫນານ

ເມືອງຊານຢ່າຊຶ່ງຄາດວ່າຈະເປັນຈຸດທີ່ ທີ່ພາຍຸຸຫວູ່ຕິບຂຶ້ນຝັ່ງ ໄດ້ເລີ່ມໃຊ້ມາດຕະການຮັບມືພາຍຸໄຕ້ຝຸ່ນ ແລະ ນ້ຳທ່ວມໃນລະດັບ 2 ຫຼື ເກືອບສູງສຸດແລ້ວຕັ້ງແຕ່ຕອນຄ່ຳວານນີ້ (12 ມິຖຸນາ) ສະໜາມບິນຊານຢ່າຍົກເລີກຖ້ຽວບິນທັງໝົດຕັ້ງແຕ່ 22.00 ໂມງ

ສ່ວນໃນມົນທົນໄຫ່ຫນານ ທີ່ຕັ້ງຂອງຊານຢ່າ ລົດໄຟຄວາມໄວສູງຢຸດເປີດບໍລິການທົ່ວທັງມົນທົນ ແຕ່ຄາດວ່າຈະສາມາດກັບມາເປີດໄດ້ໃນວັນເສົາມື້ອື່ນນີ້ (14 ມິຖຸນາ) ໂຮງຮຽນທັງໝົດລວມເຖິງໂຮງຮຽນອະນຸບານທົ່ວເມືອງປິດຮຽນ ລວມໄປເຖິງແຫຼ່ງທ່ອງທ່ຽວ ແລະ ພື້ນທີ່ງານກໍ່ສ້າງໃນຊານຢ່າ ກໍປິດດ້ວຍ

ສ່ວນອ່າງເກັບນ້ຳຫຼັກຫຼາຍແຫ່ງໃນຊານຢ່າ ເລີ່ມລະບາຍນ້ຳອອກຈາກອ່າງເກັບນ້ຳເພື່ອກຽມຮັບນ້ຳຝົນ ລະບົບຈ່າຍນ້ຳ ແລະ ລະບົບລະບາຍນ້ຳໄດ້ຮັບການກວດສອບວ່າໃຊ້ການໄດ້ດີ

ກ່ອນໜ້ານີ້ ກົມອຸຕຸນິຍົມວິທະຍາທ້ອງຖິ່ນຈີນລາຍງານວ່າ ພາຍຸໂຊນຮ້ອນຫວູ່ຕິບ ໄດ້ທະວີກໍາລັງແຮງຂຶ້ນເປັນພາຍຸໄຕ້ຝຸ່ນມື້ຄືນນີ້ (12 ມິຖຸນາ) ໂດຍສູນກາງ ຫຼື ຕາພາຍຸ ຢູ່ນອກຊາຍຝັ່ງມົນທົນໄຫ່ຫນານ ຫ່າງຈາກເມືອງຊານຢ່າໃນມະນົດໄຫ່ຫນານປະມານ 95 ກິໂລແມັດ ເຮັດໃຫ້ເກີດກະແສລົມແຮງກິນບໍລິເວນກວ້າງ

ສະແດງຄຳຄິດເຫັນ