ລັດຖະບານສະຫະລັດ ພາຍໃຕ້ການນຳພາຂອງ ໂດນັລດ໌ ທຣໍາ ກຳລັງພິຈາລະນາທີ່ຈະຫ້າມປະຊາຊົນຈາກອີກ 36 ປະເທດເດີນທາງເຂົ້າສະຫະລັດ

ຫຼັງຈາກທີ່ທາງສຳນັກຂ່າວຣອຍເຕີ ໄດ້ຂໍ້ມູນນີ້ມາຈາກທາງກະຊວງການຕ່າງປະເທດຂອງສະຫະລັດ ຊຶ່ງເປັນຂໍ້ມູນທີ່ມີການລົງນາມໂດຍ ມາກໂກ ຣູບິໂອ ລັດຖະມົນຕີການຕ່າງປະເທດຂອງສະຫະລັດ

ໂດຍທາງກະຊວງການຕ່າງປະເທດຂອງສະຫະລັດ ມີຄວາມກັງວົນກ່ຽວກັບປະເທດເຫຼົ່ານີ້ ທັງ 36 ປະເທດ ທີ່ກຳລັງຖືກພິຈາລະນາຫ້າມເຂົ້າສະຫະລັດ ແລະ ແນະນຳວ່າຄວນຈະມີມາດຕະການບາງຢ່າງອອກມາໃຊ້ກັບປະເທດເຫຼົ່ານີ້ ຊຶ່ງສິ່ງທີ່ກະຊວງການຕ່າງປະເທດສະຫະລັດກັງວົນກໍ່ຄື 36 ປະເທດນີ້ ບໍ່ມີໜ່ວຍງານທີ່ຮັບຜິດຊອບ ແລະ ມີຄວາມສາມາດຫຼາຍພໍທີ່ຈະກວດກາປະຫວັດ ຫຼື ຫລັກຖານຂອງຄົນທີ່ຂໍວີຊາເດີນທາງເຂົ້າມາໃນສະຫະລັດຢ່າງມີປະສິດທິພາບ

ຈຶ່ງອາດຈະເຮັດໃຫ້ບຸກຄົນທີ່ມີຄວາມສ່ຽງຫຼຸດລອດ ເດີນທາງເຂົ້າມາໃນສະຫະລັດໄດ້ ຜ່ານການຂໍວີຊາຈາກປະເທດເຫຼົ່ານີ້

ກະຊວງການຕ່າງປະເທດຂອງສະຫະລັດ ຈຶ່ງກຳລັງພິຈາລະນາວ່າອາດຈະຫ້າມປະຊາຊົນຈາກ 36 ປະເທດນີ້ ບໍ່ໃຫ້ເຂົ້າມາໃນສະຫະລັດແບບສົມບູນ ຫຼື ອາດຈະຈຳກັດການເດີນທາງເຂົ້າສະຫະລັດໃນບາງສ່ວນ

ຊຶ່ງໝາຍຄວາມວ່າຈະຕ້ອງມີຂັ້ນຕອນການຂໍວີຊາທີ່ເຂັ້ມງວດຮັດກຸມຫຼາຍຂຶ້ນ ແລະ ໃຊ້ເວລາດົນຂຶ້ນ ໂດຍທາງສະຫະລັດ ຈະໃຫ້ເວລາປະເທດເຫຼົ່ານີ້ 60 ມື້ ໃນການປັບປຸງການກວດກາຂໍ້ມູນຫລັກຖານ ຊຶ່ງຫາກຍັງບໍ່ເປັນໄປຕາມມາດຕະຖານທີ່ທາງສະຫະລັດວາງໄວ້ ກໍ່ອາດຈະສ່ຽງຖືກຫ້າມ ຫ້າມເດີນທາງເຂົ້າສະຫະລັດ

ຄວາມກັງວົນເລື່ອງອື່ນໆ ທີ່ສະຫະລັດມີຕໍ່ປະເທດເຫຼົ່ານີ້ ຍັງມີອີກຫຼາຍເລື່ອງ ເຊັ່ນ: ປະຊາຊົນຈາກປະເທດເຫຼົ່ານີ້ທີ່ເດີນທາງເຂົ້າສະຫະລັດແລ້ວ ມັກຈະຢູ່ເກີນເວລາທີ່ອະນຸຍາດໃນອັດຕາທີ່ສູງ ແລະ ທາງລັດຖະບານຂອງປະເທດນັ້ນກໍ່ບໍ່ໃຫ້ຄວາມຮ່ວມມືໃນການສົ່ງຕົວປະຊາຊົນຂອງຕົວເອງກັບຄືນປະເທດ ແລະ ກໍ່ມີປະຊາຊົນໃນບາງປະເທດທີ່ມີການເຄື່ອນໄຫວທີ່ສົ່ງເສີມການກໍ່ການຮ້າຍ ການຕໍ່ຕ້ານຊາວຢິວ ແລະ ຕໍ່ຕ້ານອະເມລິກາ

ຊຶ່ງຫາກອະນຸຍາດໃຫ້ປະຊາຊົນຈາກປະເທດເຫຼົ່ານີ້ເດີນທາງເຂົ້າສະຫະລັດ ກໍ່ອາດຈະເຮັດໃຫ້ສະຫະລັດຕົກຢູ່ໃນຄວາມສ່ຽງທີ່ຈະເກີດອັນຕະລາຍໄດ້ ແຕ່ມາດຕະການນີ້ກໍ່ຖືກວິພາກວິຈານວ່າເປັນການເລືອກປະຕິບັດ ແລະ ທຳລາຍຄວາມຫວັງຜູ້ອົບພະຍົບແລະຜູ້ລີ້ໄພຈຳນວນຫຼາຍ ທີ່ຫວັງຈະມາເລີ່ມຕົ້ນຊີວິດໃໝ່ໃນສະຫະລັດ

ສະແດງຄຳຄິດເຫັນ