“Trump Organization” ອານາຈັກທຸລະກິດຂອງຕະຣະກູນທຣໍາ ປະກາດເປີດຕົວສະມາດໂຟນຊື່ວ່າ “Trump Mobile” ໂດຍລຸ້ນ “T1” ມີລາຄາ 499 ໂດລາ ແລະ ມີກຳນົດວາງຈຳໜ່າຍໃນເດືອນກັນຍາ 2025

ທັງນີ້ Trump Mobile ຄິດຄ່າບໍລິການລາຍເດືອນໃນລາຄາ 47.45 ໂດລາ ໂດຍຜູ້ໃຊ້ບໍລິການສາມາດໂທໂດຍບໍ່ຈຳກັດ, ສົ່ງຂໍ້ຄວາມໂດຍບໍ່ຈຳກັດ, ຫຼິ້ນອິນເຕີເນັດໂດຍບໍ່ຈຳກັດ ລວມທັງໄດ້ຮັບບໍລິການຊ່ວຍເຫຼືອສຸກເສີນຫາກລົດປະສົບບັນຫາ ແລະໄດ້ຮັບສິດທິປະໂຫຍດດ້ານບໍລິການການແພດທາງໄກ

ສະມາດໂຟນລຸ້ນ “T1” ມີຕົວເຄື່ອງເປັນໂລຫະສີທອງ ພ້ອມລາຍທຸງຊາດສະຫະລັດແກະສະຫຼັກຝາຫຼັງ ໂດຍ T1 ໃຊ້ລະບົບປະຕິບັດການ Android 15 ແລະ ມາພ້ອມກັບໜ້າຈໍ AMOLED ຂະໜາດ 6.8 ນິ້ວ ພ້ອມກ້ອງໜ້າ (ເຊວຟີ) ຄວາມລະອຽດ 16 ລ້ານພິກເຊລ ຂະນະທີ່ກ້ອງຫຼັກມີຄວາມລະອຽດ 50 ລ້ານພິກເຊນ ໂດຍມີ RAM ຂະໜາດ 12 ກິກກະໄບ ພ້ອມດ້ວຍຄວາມຈຸພາຍໃນເຄື່ອງ 256 ກິກກະໄບ

ນອກຈາກນີ້ ການຕັ້ງຊື່ຂອງບໍລິການ “The 47 Plan” ຊຶ່ງຄິດຄ່າບໍລິການລາຍເດືອນ 47.45 ໂດລາ ກໍ່ມີທີ່ມາຂອງຕົວເລກ ທີ່ກ່ຽວຂ້ອງກັບປະທານາທິບໍດີໂດນັລດ໌ ທຣໍາ ຊຶ່ງດຳລົງຕຳແໜ່ງເປັນປະທານາທິບໍດີຄົນທີ 45 ຂອງສະຫະລັດໃນສະໄໝທຳອິດ ແລະ ປັດຈຸບັນດຳລົງຕຳແໜ່ງເປັນປະທານາທິບໍດີຄົນທີ 47

ຂະນະດຽວກັນ ເວັບໄຊທ໌ trumpmobile.com ສະແດງພາບໜ້າຈໍໂທລະສັບເປັນຂໍ້ຄວາມໂຄສະນາຫາສຽງຂອງປະທານາທິບໍດີທຣໍາທີ່ລະບຸວ່າ “Make America Great Again”

ທີ່ຜ່ານມາ Trump Organization ໄດ້ເປີດຕົວສິນຄ້າທີ່ຫຼາກຫຼາຍໃນຊ່ວງທີ່ມີການໂຄສະນາຫາສຽງເລືອກຕັ້ງ ເຊັ່ນ: ໂມງ, ເກີບຜ້າ ແລະ ຄຳພີໄບເບິນ ໂດຍ Trump Organization ບໍ່ໄດ້ຈຳໜ່າຍສິນຄ້າເຫຼົ່ານີ້ໂດຍກົງ

ແຕ່ເປັນການເຮັດຂໍ້ຕົກລົງໃຫ້ສິດໃນການໃຊ້ແບຣນ (licensing agreement) ສຳລັບທຸລະກິດທີ່ມີຄວາມສົນໃຈ ຂະນະທີ່ trumpmobile.com ລະບຸເຊັ່ນກັນວ່າ Trump Mobile ລວມທັງຜະລິດຕະພັນ ແລະ ບໍລິການຕ່າງໆ ບໍ່ໄດ້ຖືກອອກແບບ, ພັດທະນາ, ຜະລິດ, ວາງຈຳໜ່າຍ ຫຼື ຈຳໜ່າຍໂດຍ Trump Organization ຫຼື ບໍລິສັດໃນເຄືອແຕ່ຢ່າງໃດ

ເມື່ອວັນສຸກທີ່ຜ່ານມາ ປະທານາທິບໍດີໂດນັລດ໌ ທຣໍາ ແຫ່ງສະຫະລັດ ເປີດເຜີຍວ່າ ລາວມີລາຍໄດ້ຫຼາຍກວ່າ 8 ລ້ານໂດລາໃນປີ 2024 ຈາກການເຮັດຂໍ້ຕົກລົງ licensing agreement

ສະແດງຄຳຄິດເຫັນ