ຫນ່ວຍງານສາທາລະນະສຸກແຂວງມິເອະ ເປີດເຜີຍວ່າ ສັດຕະວະແພດຄົນໜຶ່ງໄດ້ເສຍຊີວິດຈາກການຕິດເຊື້ອໄວຣັສ SFTS (Severe Fever with Thrombocytopenia Syndrome)

ຫຼັງຈາກການປິ່ນປົວແມວທີ່ເຈັບປ່ວຍ ເຊິ່ງອາດເປັນກໍລະນີທຳອິດຂອງການແຜ່ລາມເຊື້ອຈາກແມວສູ່ຄົນທີ່ໄດ້ຮັບການຢືນຢັນໃນຍີ່ປຸ່ນ

SFTS ເປັນພະຍາດຕິດເຊື້ອຮຸນແຮງທີ່ເກີດຈາກໄວຣັສທີ່ແຜ່ລາມໂດຍ ເຫັບຫມັດ ແຕ່ເຊື້ອສາມາດຕິດຕໍ່ຈາກສັດສູ່ຄົນຜ່ານທາງສານຄັດຫຼັ່ງຂອງສັດທີ່ຕິດເຊື້ອໄດ້ເຊັ່ນກັນ ໂດຍສະເພາະຢ່າງຍິ່ງກັບແມວ

ຕາມລາຍງານ ສັດຕະວະແພດລາຍນີ້ເປັນຜູ້ຊາຍອາຍຸປະມານ 50 ປີ ເຮັດວຽກຢູ່ຄລີນິກສັດຕະວະແພດແຫ່ງໜຶ່ງໃນແຂວງມິເອະ

ໃນເດືອນພຶດສະພາທີ່ຜ່ານມາ ລາວໄດ້ປິ່ນປົວແມວທີ່ມີອາການເຈັບປ່ວຍຮຸນແຮງ ແລະ ແມວໂຕນັ້ນໄດ້ເສຍຊີວິດໃນເວລາຕໍ່ມາ ພາຍໃນບໍ່ເທົ່າໃດມື້ຫຼັງຈາກປິ່ນປົວແມວໂຕນັ້ນ ສັດຕະວະແພດເລີ່ມມີໄຂ້ ແລະ ອາການທາງລະບົບທາງເດີນອາຫານ

ລາວໄດ້ເຂົ້າຮັບການປິ່ນປົວໃນໂຮງໝໍແຫ່ງໜຶ່ງແຕ່ເສຍຊີວິດຫຼັງຈາກນັ້ນບໍ່ດົນ ຜົນການກວດສອບຫຼັງເສຍຊີວິດພົບວ່າລາວຕິດເຊື້ອ SFTS ແລະ ເປັນສາຍພັນດຽວກັບເຊື້ອທີ່ກວດພົບໃນແມວໂຕນັ້ນ

ເຈົ້າໜ້າທີ່ສາທາລະນະສຸກ ລະບຸວ່າ ບໍ່ມີຮ່ອງຮອຍວ່າລາວຖືກເຫັບຫມັດກັດ ຈຶ່ງເຊື່ອວ່າການຕິດເຊື້ອນີ້ມາຈາກການສຳຜັດກັບແມວໂດຍກົງ ເຊັ່ນ: ນ້ຳລາຍ, ເລືອດ ຫຼື ສານຄັດຫຼັ່ງອື່ນໆ

ທາງແຂວງມິເອະໄດ້ອອກຄຳເຕືອນໃຫ້ສັດຕະວະແພດ ແລະ ຜູ້ທີ່ເຮັດວຽກໃກ້ຊິດກັບສັດຕ້ອງໃຊ້ຄວາມລະມັດລະວັງຫຼາຍຂຶ້ນ ໂດຍສະເພາະເມື່ອປິ່ນປົວສັດທີ່ມີອາການບໍ່ປົກກະຕິ ເຊັ່ນ: ມີໄຂ້ ຫຼື ຊຶມ SFTS (Severe Fever with Thrombocytopenia Syndrome) ເປັນພະຍາດຕິດເຊື້ອໄວຣັສຊະນິດຮຸນແຮງທີ່ຕິດຕໍ່ຜ່ານເຫັບຫມັດ ແລະ ອາດຕິດຕໍ່ຈາກສັດຕິດເຊື້ອ ເຊັ່ນ: ແມວຫຼືໝາ ຜ່ານເລືອດ ນ້ຳລາຍ ຫຼື ສານຄັດຫຼັ່ງ

ອາການສຳຄັນ

• ໄຂ້ສູງກະທັນຫັນ
• ຫາກ, ຖອກທ້ອງ
• ເກັດເລືອດຕ່ຳ
• ບາງລາຍຮຸນແຮງເຖິງຂັ້ນ ຕັບວາຍ ຫຼື ເສຍຊີວິດ
• ອັດຕາການເສຍຊີວິດສະເລ່ຍຢູ່ທີ່ຮ້ອຍລະ 10–30

ສະແດງຄຳຄິດເຫັນ