ປະເທດຈີນກຳລັງປະສົບຜົນສຳເລັດໃນການດຶງດູດນັກທ່ອງທ່ຽວຕ່າງຊາດເຂົ້າສູ່ປະເທດ ດ້ວຍກະແສຕອບຮັບທີ່ດີ ແລະ ຄົນຫລັ່ງໄຫລເຂົ້າມາຫຼາຍຂຶ້ນ

ໂດຍຂໍ້ມູນຫຼ້າສຸດ ຈາກກະຊວງວັດທະນະທຳ ແລະ ການທ່ອງທ່ຽວຂອງຈີນ ທີ່ໄດ້ເປີດເຜີຍ ໃນລາຍການ China Economic Roundtable ຂອງສຳນັກຂ່າວຊິນຫົວເມື່ອບໍ່ດົນມານີ້ລະບຸວ່າ ປີທີ່ຜ່ານມາ (ປີ 2024) ມີນັກທ່ອງທ່ຽວຂາເຂົ້າສູ່ຈີນໃນປີ 2024 ຫຼາຍເຖິງ 132 ລ້ານຄົນ ແລະ ຍັງມີການໃຊ້ຈ່າຍສູງເຖິງ 94,200 ລ້ານໂດລາສະຫະລັດ

ເພີ່ມຂຶ້ນເຖິງ 97.2% ຈາກປີກ່ອນ ສ່ວນປີນີ້ກໍຍັງຮ້ອນແຮງຕໍ່ເນື່ອງ ເພາະມີຕົວເລກນັກທ່ອງທ່ຽວຂາເຂົ້າສູ່ຈີນໃນໄຕມາດທຳອິດ (ມັງກອນ-ມີນາ) ຂອງປີນີ້ຢູ່ທີ່ 35.02 ລ້ານຄົນ ເພີ່ມຂຶ້ນ 19.6% ເມື່ອທຽບປີຕໍ່ປີ

ຕົວເລກການໃຊ້ຈ່າຍໃນຈີນ ກາລັນຕີໄດ້ຊັດເຈນຈາກຍອດການໃຊ້ຈ່າຍໃນການເດີນທາງເຂົ້າປະເທດ ເຊັ່ນ: ຜູ້ໃຫ້ບໍລິການຊຳລະເງິນຜ່ານໂທລະສັບມືຖືລາຍໃຫຍ່ຢ່າງ Alipay ຂອງຈີນອອກລາຍງານວ່າການໃຊ້ຈ່າຍຂອງນັກທ່ອງທ່ຽວຂາເຂົ້າເພີ່ມຂຶ້ນ 180% ຕັ້ງແຕ່ວັນທີ 1 ເຖິງ 3 ພຶດສະພາຂອງປີນີ້ ເມື່ອທຽບກັບຊ່ວງເວລາດຽວກັນຂອງປີກ່ອນ (ປີ 2024)

ເຊັ່ນດຽວກັນກັບຂໍ້ມູນຈາກເຄືອຂ່າຍລົດໄຟຂອງຈີນລະບຸວ່າ ໄດ້ໃຫ້ບໍລິການຜູ້ໂດຍສານຫຼາຍເຖິງ 1,860 ລ້ານເທື່ອໃນຊ່ວງ 5 ເດືອນທຳອີດ ຂອງປີນີ້ ອ້າງອີງຈາກຂໍ້ມູນຂອງບໍລິສັດຜູ້ດຳເນີນການລົດໄຟແຫ່ງຊາດ “China State Railway Group Co., Ltd.” ເປີດເຜີຍວ່າ ຕົວເລກດັ່ງກ່າວນີ້ເພີ່ມຂຶ້ນມາ 7.3% ເມື່ອທຽບກັບຊ່ວງດຽວກັນຂອງປີກ່ອນ ແລະ ຖືເປັນລະດັບສູງສຸດເປັນປະຫວັດການສຳລັບຊ່ວງເວລາດຽວກັນໃນອະດີດ

ຫນຶ່ງໃນຫົວໃຈສຳຄັນທີ່ເຮັດໃຫ້ຄົນແຫ່ໄປທ່ຽວຈີນກໍຄືຟຣີວີຊາ ຈາກເດີມຈີນອາດຈະບໍ່ເປີດປະຕູໃຫ້ຄົນຕ່າງປະເທດງ່າຍໆ

ມື້ນີ້ຈີນກຳລັງປະກາດຟຣີວີຊາໃຫ້ຫຼາຍໆປະເທດທົ່ວໂລກເພີ່ມຂຶ້ນຢ່າງຕໍ່ເນື່ອງ ເຊັ່ນ: ລ່າສຸດ ປະເທດໃນລາຕິນອະເມລິກາຈີນໄດ້ເລີ່ມທົດລອງໃຫ້ ພົນລະເມືອງຈາກປະເທດບຣາຊິລ, ອາເຈນຕິນາ, ຊິເລ, ເປຣູ, ອູຣູກວາຍ ເຂົ້າຈີນໂດຍບໍ່ຕ້ອງໃຊ້ວີຊາ ນັບຕັ້ງແຕ່ 1 ມິຖຸນາທີ່ຜ່ານມາ ລວມທັງຍັງໄດ້ຍົກເວັ້ນວີຊາໃຫ້ກັບທຸກປະເທດໃນກຸ່ມສະພາຄວາມຮ່ວມມື ອ່າວເອີຣົບດ້ວຍ

ສະແດງຄຳຄິດເຫັນ