ທຳນຽບຂາວລະບຸວ່າ ໂດນັລ ທຣຳ ປະທານາທິບໍດີສະຫະລັດ ໄດ້ກຳນົດເສັ້ນຕາຍສອງອາທິດໃນການຕັດສິນໃຈວ່າສະຫະລັດຈະເຂົ້າຮ່ວມສົງຄາມກັບອີຫຣ່ານ ຄຽງຂ້າງອິສຣາເອນຫຼືບໍ່ ໂດຍໃຫ້ເວລານີ້ເປັນໂອກາດໃນການຫາທາງອອກໂດຍການເຈລະຈາ
ການເປີດຊ່ອງທາງການທູດດັ່ງກ່າວເກີດຂຶ້ນຫຼັງຈາກລັດຖະມົນຕີກະຊວງພາຍໃນອິສຣາເອນ ປະກາດວ່າເປົ້າໝາຍຂອງສົງຄາມຄືການປ່ຽນແປງລະບອບການປົກຄອງໃນກຸງເຕຫະຣານ
ໂດຍລະຫວ່າງການຢ້ຽມຢາມໂຮງໝໍແຫ່ງໜຶ່ງຊຶ່ງຖືກຂີປະນາວຸດຂອງອີຫຣ່ານໂຈມຕີ ລາວກ່າວວ່າ ຜູ້ນຳສູງສຸດຂອງອີຫຣ່ານ ອາຢາຕອນເລາະຮ໌ ອາລີ ຄາເມເນອີ ບໍ່ຄວນໄດ້ຮັບອະນຸຍາດໃຫ້ມີຊີວິດຢູ່ ພ້ອມເປີດເຜີຍວ່າລາວໄດ້ສັ່ງເພີ່ມການໂຈມຕີເພື່ອທຳລາຍລັດຖະບານອີຫຣ່ານ
ຕໍ່ມາ ທ່ານ ເບັນຈາມິນ ເນທັນຢາຮູ ນາຍົກລັດຖະມົນຕີອິສຣາເອນ ກ່າວຢ້ຳວ່າ ການໂຄ່ນລົ້ມຜູ້ນຳອີຫຣ່ານ ບໍ່ແມ່ນເປົ້າໝາຍຢ່າງເປັນທາງການ
ແຫຼ່ງຂ່າວທີ່ໃກ້ຊິດກັບການພິຈາລະນາຄັ້ງນີ້ເປີດເຜີຍວ່າ ການຕັດສິນໃຈຂອງທຣຳວ່າຈະຮ່ວມໂຈມຕີອີຫຣ່ານຫຼືບໍ່ ຍັງຂຶ້ນຢູ່ກັບວ່າລະເບີດ “ບັງເກີບັສເຕີ” ພະລັງທຳລາຍສູງຂອງສະຫະລັດ ຈະສາມາດທຳລາຍສະຖານທີ່ຜະລິດນິວເຄຼຍທີ່ມີການປ້ອງກັນແໜ້ນໜາທີ່ສຸດຂອງອີຫຣ່ານໄດ້ຫຼືບໍ່
ອິສຣາເອນບໍ່ມີອາວຸດທີ່ສາມາດທຳລາຍສູນຟອໂດວ໌ ຊຶ່ງຝັງເລິກເຖິງ 100 ແມັດ ກ້ອງພູໃກ້ເມືອງສັກສິດໂກມ ເນທັນຢາຮູ ແລະ ພັນທະມິດໄດ້ໂນ້ມນ້າວໃຫ້ສະຫະລັດ ປ່ຽນບົດບາດຈາກການສະໜັບສະໜູນການປ້ອງກັນຂອງອິສຣາເອນ ມາເປັນການເຂົ້າຮ່ວມການໂຈມຕີ ໂດຍບອກກັບທຣຳວ່າ ລາວເປັນຜູ້ດຽວທີ່ສາມາດຢຸດໂຄງການນິວເຄຼຍຂອງອີຫຣ່ານໄດ້
ເຖິງແມ່ນວ່າຈະມີການຈັດກະກຽມແຜນໂຈມຕີໄວ້ແລ້ວ ແຕ່ທຣຳຍັງລໍຖ້າເບິ່ງວ່າອີຫຣ່ານຈະຍອມຕົກລົງໃນວິນາທີສຸດທ້າຍເພື່ອຢຸດຕິໂຄງການນິວເຄຼຍຫຼືບໍ່
ທ່າມກາງຄຳເຕືອນຈາກທົ່ວໂລກກ່ຽວກັບການຍົກລະດັບຄວາມຂັດແຍ້ງຢ່າງຮຸນແຮງ ເອີຮົບກຳລັງກົດດັນໃຫ້ເກີດການເຈລະຈາທາງການທູດ ໂດຍລັດຖະມົນຕີຕ່າງປະເທດຂອງອີຫຣ່ານກຳລັງເດີນທາງໄປເຈນີວາ ເພື່ອພົບປະກັບລັດຖະມົນຕີຕ່າງປະເທດຂອງອັງກິດ ຝຣັ່ງ ແລະ ເຢຍລະມັນ
ຂະນະດຽວກັນ ປະທານາທິບໍດີລັດເຊຍ ວລາດິເມຍ ປູຕິນ ແລະ ປະເທດໃນພູມິພາກລວມທັງໂອມານ ກໍໄດ້ເສະເໜີຕົວເປັນຄົນກາງໃນການໄກ່ເກ່ຍ
ເມື່ອອິສຣາເອນເປີດສາກໂຈມຕີເມື່ອອາທິດກ່ອນ ເນທັນຢາຮູອະທິບາຍວ່າ ຄືປະຕິບັດການຈຳກັດ ເພື່ອຢຸດຢັ້ງຄວາມຄືບໜ້າຂອງອີຫຣ່ານໃນການສ້າງລະເບີດນິວເຄຼຍ ແຕ່ກໍເລີ່ມສະແດງອອກຊັດເຈນຫຼາຍຂຶ້ນວ່າຕ້ອງການໃຫ້ລັດຖະບານໃນອີຫຣ່ານລົ່ມສະຫຼາຍ
ລະຫວ່າງການຢ້ຽມຢາມໂຮງໝໍໂຊໂຣກາໃນເບເອີເຊວາ ຊຶ່ງຖືກຂີປະນາວຸດອີຫຣ່ານໂຈມຕີ ເນທັນຢາຮູ ກ່າວວ່າ ອິສຣາເອນກຳລັງສ້າງເງື່ອນໄຂໃຫ້ເກີດການປ່ຽນແປງລະບອບການປົກຄອງໃນອີຫຣ່ານ ແຕ່ປະຊາຊົນອີຫຣ່ານຕ້ອງເປັນຜູ້ລຸກຂຶ້ນສູ້
ການໂຈມຕີໂຮງໝໍໂຊໂຣກາໂດຍອີຫຣ່ານບໍ່ເຮັດໃຫ້ມີຜູ້ໄດ້ຮັບບາດເຈັບສາຫັດ ເນື່ອງຈາກເຈົ້າໜ້າທີ່ ແລະ ຜູ້ປ່ວຍຢູ່ໃນພື້ນທີ່ປອດໄພ ຂີປະນາວຸດລູກອື່ນໆ ຕົກໃນພື້ນທີ່ອ້ອມຮອບກຸງເທລອາວີຟ ເຮັດໃຫ້ມີຜູ້ບາດເຈັບກວ່າ 200 ຄົນທົ່ວປະເທດ ໃນຈຳນວນນີ້ 4 ຄົນ ບາດເຈັບສາຫັດ ໜຶ່ງລູກຕົກຖືກຖານອາຄານສູງໃນຣາມັດກັນ ໃກ້ໃຈກາງເທລອາວີຟ ຫ່າງຈາກສູນການຄ້າເພັດປະມານ 200 ແມັດ
ກອງທັບອີຫຣ່ານໄດ້ເຄື່ອນຍ້າຍຂີປະນາວຸດເພື່ອກະກຽມໂຈມຕີຜົນປະໂຫຍດຂອງສະຫະລັດ ຫາກເຂົ້າຮ່ວມສົງຄາມ ແລະ ເຈົ້າໜ້າທີ່ກຳລັງພິຈາລະນາທາງເລືອກຕອບໂຕ້ໜຶ່ງໃນໄພຂຸກຄາມທີ່ຮ້າຍແຮງທີ່ສຸດຕັ້ງແຕ່ການປະຕິວັດປີ 1979 ທີ່ນຳໂດຍກຸ່ມນັກບວດ
ສຳນັກຂ່າວຣອຍເຕີລາຍງານວ່າ ເບຮ໌ນຳ ຊາອີດີ ສະມາຊິກຄະນະກຳມາທິການຄວາມໝັ້ນຄົງແຫ່ງຊາດຂອງອີຫຣ່ານ ກ່າວວ່າ ອີຫຣ່ານອາດພະຍາຍາມປິດຊ່ອງແຄບອໍມຸດ ຊ່ອງແຄບແຄບໆ ແຫ່ງນີ້ເປັນເສັ້ນທາງລຳລຽງນ້ຳມັນໜຶ່ງໃນຫ້າຂອງຄວາມຕ້ອງການນ້ຳມັນລາຍວັນຂອງໂລກ
ຂະນະນີ້ຫຼາຍປະເທດກຳລັງກະກຽມອົບພະຍົບພົນລະເມືອງຂອງຕົນອອກຈາກອີຫຣ່ານ ແລະ ອິສຣາເອນ ໃນຂະນະທີ່ມີການຈັດຖ້ຽວບິນເພື່ອພາຄົນອິສຣາເອນຫຼາຍໝື່ນຄົນທີ່ຕິດຄ້າງໃນຕ່າງປະເທດກັບບ້ານ ໂດຍສະໜາມບິນຫຼັກຂອງອິສຣາເອນຍັງຄົງປິດຕັ້ງແຕ່ການໂຈມຕີອີຫຣ່ານເລີ່ມຕົ້ນຂຶ້ນ
ສະແດງຄຳຄິດເຫັນ
