ສານຈີນສັ່ງປະຫານຊີວິດ “ອະດີດຜູ້ບັນຊາການຕຳຫຼວດປາບປາມຢາເສບຕິດ” ຖານຮັບສິນບົນ ລວມ 121 ລ້ານຫຍວນຕັດສິດທາງການເມືອງ-ຍຶດຊັບສົມບັດທັງໝົດ

ສຳນັກຂ່າວຊິນຫົວ ລາຍງານວ່າ ເມື່ອວັນທີ 23 ມິຖຸນາ 2025 ທີ່ຜ່ານມາວ່າ ສານແຂວງຟູເຈ້ຍນທາງຕາເວັນອອກຂອງຈີນເປີດເຜີຍວ່າ ຫລິວ ເຍ່ຈິນ ອະດີດທີ່ປຶກສາທາງການເມືອງລະດັບຊາດ ແລະ ອະດີດຜູ້ບັນຊາການຕຳຫຼວດປາບປາມຢາເສບຕິດ ຖືກຕັດສິນໂທດປະຫານຊີວິດໂດຍລໍຖ້າລົງອາຍາ 2 ປີ ຖານກະທຳຄວາມຜິດກ່ຽວກັບການຮັບສິນບົນ

ໂດຍຄຳພິພາກສາຂອງສານເປີດເຜີຍວ່າ ລະຫວ່າງປີ 1992-2020 ຫລິວ ເຍ່ຈິນ  ໄດ້ໃຊ້ອຳນາດຈາກຫຼາຍຕຳແຫນ່ງໃນອົງການຕຳຫຼວດເພື່ອສະແຫວງຫາຜົນປະໂຫຍດໃຫ້ຜູ້ອື່ນ ເຊັ່ນ: ການດຳເນີນທຸລະກິດ ແລະ ການຈັດຫາເງິນທຶນ ຊຶ່ງຫລິວ ເຍ່ຈິນ  ໄດ້ຮັບເງິນ ແລະ ຂອງຕິດສິນບົນຢ່າງຜິດກົດໝາຍເປັນການຕອບແທນ ລວມມູນຄ່າຫຼາຍກວ່າ 121 ລ້ານຫຍວນ

ດ້ວຍສາເຫດນີ້ ສານຈຶ່ງມີຄຳພິພາກສາໃຫ້ ຫລິວ ເຍ່ຈິນ ຖືກເພີກຖອນສິດທາງການເມືອງຕະຫຼອດຊີວິດ ຊັບສິນສ່ວນຕົວທັງໝົດຖືກຍຶດ ແລະ ຊັບສິນທີ່ໄດ້ມາໂດຍບໍ່ຊອບທຳຖືກນຳຄືນໃຫ້ລັດ

ສານລະບຸວ່າ ຈຳນວນການຕິດສິນບົນໃນຄະດີຂອງບລາວສູງເປັນພິເສດ ແລະ ກໍໃຫ້ເກີດຄວາມເສຍຫາຍຮ້າຍແຮງຕໍ່ຜົນປະໂຫຍດຂອງປະເທດ ແລະ ປະຊາຊົນ ແຕ່ສານໄດ້ພິຈາລະນາຜອ່ນຜັນບົດລົງໂທດຕາມກົດໝາຍເນື່ອງຈາກມີປັດໄຈຫຼຸດໂທດ ໄດ້ແກ່ ການຮັບສາລະພາບ ແລະ ການຄືນຊັບສິນທີ່ໄດ້ມາໂດຍບໍ່ຊອບທຳທັງໝົດແລ້ວ

ສຳລັບ ຫລິວ ເຍ່ຈິນ ເຄີຍດຳລົງຕຳແຫນ່ງເປັນສະມາຊິກຄະນະກຳມະການແຫ່ງຊາດປະຈຳສະພາທີ່ປຶກສາທາງການເມືອງແຫ່ງປະຊາຊົນຈີນ (CPPCC) ຊຸດທີ່ 13 ແລະ ເປັນຜູ້ບັນຊາການສຳນັກປາບປາມຢາເສບຕິດ ສັງກັດກະຊວງຄວາມໝັ້ນຄົງສາທາລະນະ

ສະແດງຄຳຄິດເຫັນ