ຊີຊີທີວີຂອງຈີນລາຍງານວ່າ “ສົງຄາມ 12 ວັນ” ລະຫວ່າງອີຫຼ່ານ-ອິສຣາເອນ ລະຫວ່າງວັນທີ່ 13-24 ມິຖຸນາ ທີ່ຜ່ານມາ ໄດ້ຢຸດຕິລົງຢ່າງເປັນທາງການແລ້ວເມື່ອວານນີ້ 24 ມິຖຸນາ ທັງ 2 ປະເທດຕ່າງສະຫຼຸບຕົວເລກຜູ້ເສຍຊີວິດ ແລະ ຄວາມເສຍຫາຍ

ຮອສເຊນ ເຄີຣ໌ມານປູຣ໌ ຫົວໜ້າຝ່າຍປະຊາສຳພັນກະຊວງສາທາລະນະສຸກອີຫຼ່ານ ຢືນຢັນວານນີ້ (24 ມິຖຸນາ) ຜ່ານສື່ສັງຄົມອອນລາຍວ່າ ອິສຣາເອນໄດ້ໂຈມຕີທົ່ວອີຫຼ່ານຕັ້ງແຕ່ວັນທີ່ 13 ມິຖຸນາທີ່ຜ່ານມາ ເຮັດໃຫ້ອີຫຼ່ານເສຍຊີວິດ 610 ຄົນ ບາດເຈັບ 4,746 ຄົນ ແຕ່ບໍ່ໄດ້ລາຍງານຄວາມເສຍຫາຍທີ່ເກີດຈາກການໂຈມຕີຂອງອິສຣາເອນ

ດ້ານວິທະຍຸກອງທັບອິສຣາເອນລາຍງານວ່າ ອີຫຼ່ານຍິງຂີປະນາວຸດຖິ້ມຕົວ 500-550 ລູກ ແລະ ສົ່ງໂດຣນອາກາດຍານໄຮ້ຄົນຂັບໂຈມຕີອີຫຼ່ານກວ່າ 1,000 ລຳໃນຊ່ວງສົງຄາມ 12 ວັນ

ເຮັດໃຫ້ຊາວອິສຣາເອນເສຍຊີວິດ 28 ລາຍ ແລະ ສ້າງຄວາມເສຍຫາຍຢ່າງກວ້າງຂວາງ ໂຄງສ້າງພື້ນຖານໃນອິສຣາເອນຫຼາຍກວ່າ 10 ແຫ່ງເສຍຫາຍ ບ້ານເຮືອນເສຍຫາຍຈົນຢູ່ອາໄສບໍ່ໄດ້ຫຼາຍຮ້ອຍຫຼັງ ແລະ ພົນລະເຮືອນອິສຣາເອນໄຮ້ທີ່ຢູ່ອາໄສຈຳນວນຫຼາຍ

ມື້ວານນີ້ (24 ມິຖຸນາ) ປະທານາທິບໍດີມາຊູດ ເປເຊຊຄຽນຂອງອີຫຼ່ານ ປະກາດວ່າ ຄວາມຂັດແຍ້ງທີ່ຈຸດຊະນວນຂຶ້ນໂດຍອິສຣາເອນໃນຄັ້ງນີ້ ໄດ້ຈົບລົງແລ້ວ

ໃນການຫາລືທາງໂທລະສັບກັບນາຍົກລັດຖະມົນຕີອັນວາຣ໌ ອິບຣາຮິມຂອງມາເລເຊຍວານນີ້ ເປເຊຊຄຽນຢືນຢັນຕໍ່ຜູ້ນຳມາເລເຊຍ ເຖິງຄວາມພ້ອມຂອງອີຫຼ່ານໃນການເຄົາລົບຂໍ້ຕົກລົງຢຸດຍິງ ຖ້າຫາກວ່າອິສຣາເອນກໍເຮັດເຊັ່ນດຽວກັນ ແລະ ຢືນຢັນອີຫຼ່ານເຕັມໃຈຫວນກັບໂຕະເຈລະຈາ ແຕ່ຂະນະດຽວກັນກໍຈະປົກປ້ອງສິດອັນຊອບທຳຂອງປະຊາຊົນຊາວອີຫຼ່ານດ້ວຍ

ສ່ວນທາງກອງທັບອິສຣາເອນອອກຖະແຫຼງການວານນີ້ວ່າ ອາຍຍານ ຊາມີຣ໌ ປະທານຄະນະເສນາທິການກອງທັບອິສຣາເອນ ໄດ້ປະກາດຍຸດທະສາດຕໍ່ໄປວ່າ ກອງທັບອິສຣາເອນ ຈະຫັນກັບໄປເນັ້ນການເຮັດສົງຄາມໃນກາຊາໃໝ່ ເພື່ອກຳຈັດການປົກຄອງຂອງຮາມາສໃນຂົງເຂດກາຊາ ແລະ ໃຫ້ຄວາມສຳຄັນກັບການຊ່ວຍຕົວປະກັນທີ່ຍັງຖືກຮາມາສຈັບໄວ້ໃນກາຊາ

ສະແດງຄຳຄິດເຫັນ