ປະທານາທິບໍດີ ໂດນັນ ທຣັມ ແຫ່ງສະຫະລັດຯ ລະບຸເມື່ອວັນພຸດ (25 ມິຖຸນາ 2025 ) ວ່າ ຕົນຈະພິຈາລະນາການຈັດສົ່ງ “ຂີປະນາວຸດແພທຣິອອດ” ເພີ່ມເຕີມຊຶ່ງຢູເຄຣນຈຳເປັນຕ້ອງໃຊ້ເພື່ອປ້ອງກັນການໂຈມຕີຂອງລັດເຊຍ ພ້ອມເສີມວ່າ ປະທານາທິບໍດີ ວລາດິມີ ປູຕິນ ແຫ່ງຣັດເຊຍ “ຈຳເປັນຕ້ອງຢຸດຕິສົງຄາມນີ້ແທ້ໆ”

ຄຳເວົ້າຂອງ ທຣັມ ມີຂຶ້ນຫຼັງຈາກທີ່ເຂົາໄດ້ຫາລືນອກຮອບກັບປະທານາທິບໍດີ ໂວໂລດິມີ ເຊເລນສກີ ແຫ່ງຢູເຄຣນເປັນເວລາ 50 ນາທີ ລະຫວ່າງການປະຊຸມສຸດຍອດຜູ້ນຳອົງການສົນທິສັນຍາແອດແລນຕິກເໜືອ (ນາໂຕ) ທີ່ກຸງເຮກ ຜູ້ນຳທັງສອງກ່າວຕົງກັນວ່າ ນີ້ຄືຂັ້ນຕອນສຳຄັນເຊີງບວກສຳລັບຄວາມຂັດແຍ້ງທີ່ ທຣັມກ່າວວ່າ “ຍາກລຳບາກກວ່າສົງຄາມອື່ນໆ”

ລະຫວ່າງຖະແຫຼງຂ່າວຍົກຍ້ອງຄວາມພະຍາຍາມທາງການທູດຂອງຕົວເອງໃນຕາເວັນອອກກາງ ທຣັມ ກ່າວວ່າຂີປະນາວຸດແພທຣິອອດ “ຍາກຫຼາຍທີ່ຈະໄດ້ມາ” ແຕ່ “ເຮົາຈະລອງເບິ່ງວ່າພໍຈະຈັດຫາໃຫ້ໄດ້ຫຼືບໍ່”

ທາງດ້ານ ເຊເລນສກີ ເວົ້າເຖິງລະບົບປ້ອງກັນໄພທາງອາກາດຕ່າງໆ ແຕ່ບໍ່ຄ່ອຍຊັດເຈນປານໃດວ່າ ສິ່ງທີ່ ທຣັມ ເວົ້ານັ້ນໝາຍເຖິງສະເພາະຕົວຂີປະນາວຸດຫຼືຫມູ່ຍິງທີ່ຄົບຊຸດ

ທຣຳ ຍັງເປີດໂອກາດໃນການໃຫ້ຄວາມຊ່ວຍເຫຼືອທາງທະຫານເພີ່ມເຕີມແກ່ເຄຍຟ ຊຶ່ງກຳລັງປະເຊີນການຮຸກຢ່າງໜັກຂອງຣັດເຊຍໃນສະໜາມຮົບຕະຫຼອດຊ່ວງບໍ່ເທົ່າໃດເດືອນທີ່ຜ່ານມາ

ກ່ອນໜ້ານີ້ ທຣຳ ບໍ່ໄດ້ສະແດງທ່າທີວ່າຈະກັບມາບໍລິຈາກອາວຸດໃຫ້ຢູເຄຣນອີກຄັ້ງຢ່າງທີ່ອະດີດປະທານາທິບໍດີ ໂຈ ໄບເດນ ເຄີຍເຮັດມາຢ່າງຕໍ່ເນື່ອງ ຫຼັງຈາກທີ່ລັດເຊຍເປີດສາກການຮຸກຮານຢູເຄຣນເຕັມຮູບແບບໃນປີ 2022

ເມື່ອຖືກຖາມໂດຍກົງໆ ວ່າ ສະຫະລັດຯ ຈະສະໜັບສະໜຸນເງິນທຶນໃນການປ້ອງກັນຢູເຄຣນຫຼາຍຂຶ້ນໃນປີນີ້ຫຼືບໍ່ ທຣັມ ກ່າວວ່າ “ໃນສ່ວນຂອງເງິນນັ້ນ ລໍຖ້າເບິ່ງກ່ອນວ່າຈະເປັນແນວໃດ”

ຫມູ່ຍິງຂີປະນາວຸດແພທຣິອອດທີ່ຜະລິດໃນສະຫະລັດຯ ມີຄວາມສຳຄັນອັນຍິ່ງຕໍ່ການປ້ອງກັນຂີປະນາວຸດໄລຍະໄກຂອງລັດເຊຍທີ່ຖະຫຼົ່ມເມືອງຕ່າງໆ ຂອງຢູເຄຣນຢ່າງໜັກຕະຫຼອດຊ່ວງບໍ່ເທົ່າໃດເດືອນທີ່ຜ່ານມາ

ຢູເຄຣນມີຜູ້ເສຍຊີວິດໄປຫຼາຍສິບຄົນໃນອາທິດທີ່ແລ້ວ ທັງຢູ່ກຸງເຄຍຟ ແລະ ເມືອງດະນິໂພຣ ຊຶ່ງເປັນເມືອງເອກຂອງພູມິພາກທາງຕາເວັນອອກສຽງໃຕ້

ເຊເລນສກີ ຖະແຫຼງກ່ອນການປະຊຸມໃນວັນພຸດ ທີ່25 ວ່າຢູເຄຣນຍິນດີທີ່ຈະຈ່າຍເງິນຊື້ຂີປະນາວຸດແພທຣິອອດເພີ່ມຫາກສະຫະລັດຯ ບໍ່ເຕັມໃຈບໍລິຈາກໃຫ້ ລາວຍັງກ່າວດ້ວຍວ່າ ການເຈລະຈາກັບ ທຣັມ ນັ້ນ “ຍາວນານ ແລະ ໄດ້ເນື້ອໃນສາລະ”

“ຢູເຄຣນພ້ອມທີ່ຈະຊື້ອຸປະກອນເຫຼົ່ານັ້ນ ແລະ ຈະສະໜັບສະໜຸນຜູ້ຜະລິດອາວຸດຂອງສະຫະລັດຯ” ຜູ້ນຳຢູເຄຣນໂພສຂໍຄວາມໃນ X “ນອກຈາກນີ້ເຮົາຍັງໄດ້ຫາລືເຖິງຄວາມເປັນໄປໄດ້ໃນການຜະລິດໂດຣນຮ່ວມກັນ ເຮົາສາມາດເສີມຄວາມແຂງແກ່ງໃຫ້ແກ່ກັນແລະກັນໄດ້”

ດ້ານ ທຣັມ ປະກາດວ່າ ຕົນຈະໂອ້ລົມກັບ ປູຕິນ ອີກຄັ້ງໄວໆນີ້ ພ້ອມກັບເສີມວ່າ “ຟັງເດີ້ ວລາດິມີ ປູຕິນ ຈະຕ້ອງຢຸດຕິສົງຄາມຄັ້ງນີ້ແທ້ໆ”

ເປັນທີ່ໜ້າສັງເກດວ່າ ເຊເລນສກີ ເລືອກສວມເສື້ອແຈັກເກັດທຣົງສູດສີເຂັມໄປປະຊຸມ ຊຶ່ງຕ່າງຈາກຊຸດທະຫານທີ່ບໍ່ເປັນທາງການຊຶ່ງລາວຖືກວິພາກວິຈານວ່າໃສ່ໄປປະຊຸມທີ່ທຳນຽບຂາວກັບ ທຣຳ ເມື່ອເດືອນ ກຸມພາ

ພາຍຫຼັງເຫດການ “ວິວາທະ” ສະເທືອນໂລກທີ່ຫ້ອງເຮັດວຽກຮູບໄຂ່ຂອງທຳນຽບຂາວ ເຊເລນສກີ ກໍພະຍາຍາມຢ່າງຫຼາຍທີ່ຈະຟື້ນຟູຄວາມສຳພັນອັນດີກັບລັດຖະບານທຣຳ ຊຶ່ງໄປສະແດງທ່າທີເຫັນອົກເຫັນໃຈຝ່າຍລັດເຊຍຈົນເຮັດໃຫ້ເຄຍຟເປັນກັງວົນ

ສະແດງຄຳຄິດເຫັນ